小傳：女長老升天
Sió-toān: Lú Tiúⁿ-ló seng-thian
文獻資訊
| 項目 | 資料 |
|---|---|
| 作者 | 林照 Lîm Chiàu |
| 卷期 | 台灣教會公報 |
| 卷期 | 第579卷 |
| 日期 | 1933/6 |
| 頁數 | 18 |
白話字（原文數位化）
Sió-toān
Lú Tiúⁿ-ló seng-thian
Lîm Chiàu kì
1933.06, no. 579, pp. 18-19
Lîm--sī Kuì-moē sī Hong-goân Kàu-hoē ê lú Tiúⁿ-ló, iā-sī Hong-goân lú-kài ê bêng-seng. Tī 3 goe̍h 18 hō, ū thoân-ta̍t kóng, “Chú ê thiⁿ-sài chin chē beh lâi chih goá, nā lâi ê sî, m̄-thang ti̍t-ti̍t kā goá kiò, lâi hō͘ goá kan-khó͘ lī-khui”. Kèng-jiân kàu 22 hō pài-saⁿ àm, siū Chú chiap-la̍p chiūⁿ-thiⁿ, hióng-siú 63 hoè.
I ê lī-khui, oán-jiân sit-lo̍h chi̍t-lia̍p ê kng-chheⁿ, hō͘ kàu-hoē, siā-hoē m̄-kam, ke-thâu hāng-boé, toā-toā sè-sè liām i ê miâ kap i ê chò lâng.
Ah! I ê sí, chin-chiàⁿ sī sèng-lī ê sí, bo̍k-koài Chú ài i tńg-khì lâi hióng-siū thiⁿ ê seng-oa̍h. Nā-sī i koè-khì ê só͘-chò, si̍t-chāi chiâⁿ-chò hiān-chāi kap chiong-lâi ê siàu-liām. Siá tām-po̍h siāu-kài i ê seng-pêng, chò lâng chhin-chhiat, jîn-ài, thiàⁿ Chú, thiàⁿ kàu-hoē, gâu chiap-thāi lâng, chiâⁿ-chò chit-ê.
1. Chhim-sìn kî-tó ê lâng. Tuì kî-tó tit-tio̍h lâm-chú kái-koat ka-têng ê lân-tê, tháu-khui i ê kan-khó͘. Tuì án-ni, ēng kî-tó chò i ê sèⁿ-miā kap i ê khuì-la̍t, bô sî làng-soah.
2. ài tha̍k Sèng-keng bô ià-siān.
3. ài lé-pài. Tû-khí bē khí-chhn̂g í-goā, ta̍k-pái ê chi̍p-hoē, ū i tī-hia.
4. ài sûn hoē-iú. Ū chīn tiúⁿ-ló ê chit, kàu ta̍k ke an-uì, bián-lē kó͘-bú.
5. ài chhut-chîⁿ. Hoān-nā kàu-hoē só͘ khiàm, pa̍t kàu-hoē só͘ tê, kap lī-ek lâng ê sū, i kóng, “Bô chhut, sim kan-khó͘ bē pêng-an.”
6. ài chò hó sū. Khoàⁿ-tio̍h kan-khó͘, sòng-hiong ê lâng, àm-chīⁿ pang-chān i, khiàm-khoeh ê lâng, chîⁿ chioh i bô lāi, oán-jiân To-ka chi̍t-iūⁿ.
- ài thoân tō-lí kiù-lâng. Sì-kè ín-chhoā lâng thiaⁿ tō-lí, khah hn̄g ê lâng kap chhia-thâu, uí-thok 傳道社 ta̍k lé-pài ēng 神國新聞 kià hō͘ in.
Ah! Chit ê lâng ê lī-khui, chin-chiàⁿ sī kàu-hoē só͘ m̄-kam, sit-lo̍h tiong-si̍t ê lâng.
Tuì i kap Chú kiat-liân, oá-khò Chú lâi oa̍h, Chú ū in-huī hō͘ i heng-ōng.
Tiōng-hu sī i-seng, Chú-ji̍t khîn-siú. Cha-bó͘-kiáⁿ 4 ê o̍h lāu-bó ê khoán-sit, gâu ín-chhoā ka-têng kui Chú. Kiáⁿ-sài lóng chhut-tioh. Ta-po͘-kiáⁿ nn̄g-ê, tī Khí-kho, Tiong-ha̍k. ǹg-bāng in liām Chú ê thiàⁿ kap kì-tit lāu-bó kî-tó, lâi toè i ê kha-pō͘, sī só͘ siàu-liām.
漢羅（Ùi原文改寫）
小傳
女長老升天
林照 記
1933.06, no. 579, pp. 18-19
林--氏貴妹是豐原教會的女長老，也是豐原女界的名星。 佇3月18號，有傳達講，”主的天使真濟欲來chih我，若來的時，毋通直直共我叫，來予我艱苦離開。” 竟然到22號拜三暗，受主接納上天，享壽63歲。
伊的離開，宛然失落一粒的光星，予教會，社會毋甘，街頭巷尾，大大細細念伊的名佮伊的做人。
啊！ 伊的死，真正是勝利的死，莫怪主愛伊轉去來享受天的生活。 若是伊過去的所做，實在成做現在佮將來的數念。 寫淡薄紹介伊的生平，做人親切，仁愛，疼主，疼教會，gâu接待人，成做這个。
1. 深信祈禱的人。 Tuì祈禱得著男子解決家庭的難題，tháu開伊的艱苦。 Tuì 按呢，用祈禱做伊的性命佮伊的氣力，無時l甕-煞。
2. 愛讀聖經無厭倦。
3. 愛禮拜。 除起bē起床以外，逐擺的集會，有伊佇遐。
4. 愛巡會友。 有盡長老的職，到逐家安慰，勉勵鼓舞。
5. 愛出錢。 凡若教會所欠，別教會所tê，佮利益人的事，伊講，”無出，心艱苦bē平安。”
6. 愛做好事。 看著艱苦，宋凶的人，暗靜幫贊伊，欠缺的人，錢借伊無內，宛然To-ka一樣。
7. 愛傳道理救人。 四界引chhoā人聽道理，較遠的人佮車頭，委託傳道社逐禮拜用神國新聞寄予in。
啊！ 這个人的離開，真正是教會所毋甘，失落忠實的人。
對伊佮主結聯，倚靠主來活，主有恩惠予伊興旺。
丈夫是醫生，主日勤守。 查某囝4个學老母的款式，gâu引chhoā家庭歸主。 囝婿攏出擢。 查埔囝兩個，佇齒科，中學。 向望in念主的疼佮記得老母祈禱，來toè伊的腳步，是所數念。