高雄中會：國寶就是人物
Ko-hiông Tiong-hoē:Kok-pó chiū-sī jîn-bu̍t
文獻資訊
| 項目 | 資料 |
|---|---|
| 作者 | 許水露 Khó͘ Chuí-lō͘ |
| 卷期 | 台灣教會公報 |
| 卷期 | 第577卷 |
| 日期 | 1933/4 |
| 頁數 | 5 |
白話字（原文數位化）
Kok-pó chiū-sī jîn-bu̍t
(Khó͘ Chuí-lō͘)
- 04, no. 577, pp. 5
Kok-ka ê iu-lū put-chāi hui-siông-sî, sī chāi tī khiàm-khoeh ē chhú-lí hui-siông-sî ê jîn-bu̍t. Nā ū hit khoán jîn-bu̍t, chiū hui-siông-sî ē tit khai-choán. Tuì án-ni, pek-liân chi tāi-kè ē tit sêng-li̍p.
Kok-ka ê iu-lū put-chāi bu̍t-chu ê khoat-hoa̍t, sī chāi tī khiàm-khoeh ē chí-tō kok-ka, khai-thok kok-ūn ê toā jîn-bu̍t.
Kok-ka ê iu-lū put-chāi kok-lāi bô pù-ong, bô n̂g-kim; sī chāi tī khiàm-khoeh hit khoán ē chō-chhut pù-ū ê khek kí, khîn-bián, jím-nāi le̍k-hêng ê cheng-sîn ê jîn-bu̍t. Chá-nî Teng-boa̍t-kok (Denmark) ê kok-thó͘ chin bái, bu̍t-chu châi-goân khoat-hoa̍t. Put-tàn án-ni, iū-koh siū-tio̍h Tek-kok ê ap-pek, chiàn-pāi, tò-chhù hām-lo̍h tī ki-hng kap chhiah-thé ê pi-kéng. Chhin-chhiūⁿ hit khoán kok-ūn ke̍k bái ê sî,ū chi̍t ê chhut miâ lâng Gû-lun-to-bí(Gruntobi) chhut-thâu chhòng-siat kok-bîn ko-téng ha̍k-hāu. Tuì i ê chí-tō, Ko-lu-loh (Goldo) lâi oân-chiâⁿ hit ê ūn-tōng. Tuì án-ni, chō-chhut chē-chē jîn-bu̍t, ta̍k só͘-chāi lóng ū jîn-bu̍t thang chí-tō. Hiah ê jîn-bu̍t lóng m̄-sī tham bêng-ū, ho͘N3 hi êng ê lâng; chiū-sī hi-seng beh kiù it-kok, it-ka ê chì-sū. In lóng jia̍t-sim kèng-uì Siōng-tè, hōng-sū kok-ka, thiàⁿ tông-pau ê toā jîn-bu̍t. In ê khoài-lo̍k, put-chāi tham sè-kan ê êng-hoâ hù-kuì, sī chāi tī kiù kok-ka. Bô kàu-io̍k ê kok, bô kàu-io̍k ê ka-têng, bô kàu-io̍k ê lâng, ū chai-hō ah! In-uī hit ê kok tek-khah loān, hit ê ke tek-khak pāi, hit ê lâng tek-khak siū-bê. Só͘-í lán tio̍h ke̍k-le̍k soan-thoân Hok-im, hō͘ chē-chē toā jîn-bu̍t chhut-thâu.
漢羅（Ùi原文改寫）
國寶就是人物
（許水露）
- 04, no. 577, pp. 5
國家ê憂慮不在非常時，是在佇欠缺會處理非常時ê人物。若有彼款人物，就非常時會得開轉。對按呢，pek-liân chi代價會得成立。
國家ê憂慮不在物資ê缺乏，是在佇欠缺會指導國家，開拓國運ê大人物。
國家ê憂慮不在國內無富翁、無黃金；是在佇欠缺彼款會造出富有ê克己、勤勉、忍耐力行ê精神ê人物。早年Teng-bo̍at-kok (Denmark) ê國土真bái，物資財源缺乏。不但按呢，又koh受著德國ê壓迫，戰敗，到處陷落佇飢荒kap赤體ê悲境。親像彼款國運極bái ê時，有一個出名人Gû-lun-to-bí(Gruntobi)出頭創設國民高等學校。對伊ê指導，Ko-lu-loh (Goldo)來完成彼个運動。對按呢，造出濟濟人物，逐所在攏有人物thang指導。遐个人物攏毋是貧名譽、好虛榮ê人；就是犧牲欲救一國、一家ê志事。In攏熱心敬畏上帝，奉事國家，疼同胞ê大人物。In ê快樂，不在貧世間ê榮華富貴，是在佇救國家。無教育ê國、無教育ê家庭、無教育ê人，有知災禍ah！因為彼个國的確亂，彼个家的確敗，彼个人的確受迷。所以咱著極力宣傳福音，予濟濟大人物出頭。