數念過去ê人
Siàu-liām Koè-khì ê lâng
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第577卷 |
| 日期 | 1933/4 |
| 頁數 | 10 |
白話字（原文數位化）
Siàu-liām Koè-khì ê lâng
(Lîm Bō͘-seng)
- 04, no. 577, pp. 10
Lâng chi̍t-sì-lâng, put-sî tī seⁿ-sí ê koan-mn̂g teh chhut-ji̍p. Kan-ta chit chi̍t nn̄g goe̍h-ji̍t ê tiong-kan, goá pún-sin í-keng ū tú-tio̍h saⁿ-kiāⁿ song-sū ê siau-sit. Tī 2 goe̍h 15 ji̍t, hó pêng-iú N̂g Sū-bēng Bo̍k-su, ū sit-lo̍h chi̍t-ê chhut-sì 11 goe̍h-ji̍t ê sè-kiáⁿ. Koh bô kuí ji̍t, goá ū chiap-tio̍h Bí-kok chi̍t-ê pêng-iú ê siau-sit; in iā sī sit-lo̍h in chi̍t ê chhut-sì 6 hoè ê kiáⁿ-jî. Chit-ê pêng-iú miâ kiò-chò Walter A. Taylor, bat chò koè 7 nî kú ê soan-kàu-su, tī Lâm-kiaⁿ Kim-lêng Toā-o̍h chò kàu-siū. āu-lâi ū tńg-khì Bí-kok Ko-lûn-pí-a Toā-o̍h koh teh gián-kiù. Chin chhàu-khiáu, chiū-sī tng goá tī Bí-kok chiap-tio̍h goá chhù-ni̍h ê gín-á koè-sin ê pháiⁿ siau-sit ê sî, i sī thâu-chi̍t lâng cháu lâi an-uì goá ê sim ê lâng. Bô phah-sǹg, taⁿ put-hēng lûn tio̍h goá tio̍h siá phoe kā in an-uì. In chi̍t-ke sī jia̍t-sim ê Ki-tok-kàu sìn-tô͘. I ê sè-kiáⁿ phah-sńg khì ê sî, i ê lāu-pē chiū-sī gín-á ê a-kong, ū siá chhin-chhiūⁿ ē-té só͘ kì ê oē lâi teh thong-ti in ê pêng-iú. Goá sūn-soà hoan-e̍k tī-chia, sī ài hō͘ hoān-nā lâu ba̍k-sái iáu-boē ta ê lâng, khoàⁿ liáu siū an-uì.
It is not meet for us to judge God’s way.
And if he calls a child it is because He needs him.
Some live long and never learn.
Some are called early, because they have finished their training.
There is work to do beyond the sky, work that the Architect of Space wants done by children.
That’s why he asks them to come early, that may fit themselves for higher work.
Lâng beh phoàⁿ-toàn Siōng-tè só͘ kiâⁿ ê sū, sī bô ha̍p-gî. I nā-sī ū tiàu gín-á tǹg-khì I tau, sī in-uī I ū khiàm-ēng i.
Ū lâng chia̍h tn̂g-hoè-siū, iā lóng bô o̍h poàⁿ hāng. Ū lâng khah chá siū-tiàu, sī in-uī i í-keng siū hùn-liān chheng-chhó.
Tī thiⁿ-ni̍h hit-pêng iû-goân ū kang thang chò. Hit ê kang sī chit ê Ú-tiū kiàn-tiok ê toā sai-hū, ài gín-ná khì tàuchò.
In-uī án-ni, I chiah tiàu gín-ná khah chá tńg-khì; ài hō͘ in pī-pān lâi ha̍h hit ê khah ko-siōng ê kang-tiâⁿ.
Tē saⁿ hāng ê pháiⁿ siau-sit, chiū-sī Tâi-oân ū sit-lo̍h Bān Ko͘-niû. Lūn Bān Ko͘-niû ê it-seng, si̍t-chāi sī tuì thâu kàu boé, chin-chiàⁿ ū thé-thiap Ki-tok ê sim ê lâng. I ê kang ū chhiau-oa̍t chit-gia̍p-tek ê cheng-sîn. I ê só͘ chò, chiū-sī tú-tú “tò-chhiú bô hō͘ chiàⁿ-chhiú chai.” I m̄-nā sī hó-gia̍h lâng ê pêng-iú, iā sī sòng-hiong lâng ê pêng-iú. I m̄-nā sī kàu-hoē lâng ê pêng-iú, iā sī sè-sio̍k lâng ê pêng-iú, ài ín-chhoā in lâi chiū-kīn tō-lí. I m̄-nā sī hū-jîn-lâng ê pêng-iú, iā sī lâm-chú chheng-liân lâng ê pêng-iú. Goá iáu tī Tâi-pak ê sî, i bat siá phoe hō͘ goá, kóng i chin tì-ì tī chiah ê Tâi-oân chheng-liân ê sū, ài goá tio̍h koh-khah chhut-la̍t kó͘-bú. Goá khoàⁿ i ê phoe, sim chin siū kám-kek. Khó-sioh kàu i koè-sin ê ji̍t, goá chi̍t-ji̍t koè chi̍t-ji̍t, iáu-boē ū chú-chhiòng sím-mi̍h kū-thé-tek ê chheng-liân thoân-tō ê sū-gia̍p lâi an-uì i. Si̍t-chāi goá khoàⁿ i koè-óng ê bīn kap i saⁿ-sî ê sî, goá ê sim chin kan-khó͘, iā chin kiàn-siàu. Chóng-sī i ê oē iáu tī goá ê hī-khang-piⁿ.
Taⁿ Bān Ko͘-niû í-keng ū oân-choân hiàn i ê jio̍k-thé kap cheng-sîn tī Tâi-oân ê Hái-tó. I ê thiàⁿ Tâi-oân m̄-sī tuì giân-gú, sī tuì hêng-uî. Goá tuì i ū khoàⁿ-kìⁿ Tâi-oân Sim-lêng-kài khai-thok-chiá ê chin cheng-sîn. Goá toā ǹg-bāng chit lia̍p be̍h ka-la̍uh tī tē-ni̍h bē hoà-khì : ē puh-íⁿ, toā-châng, khui-hoe, kiat-chí, lâi kè-sio̍k i ê oa̍h-miā.
漢羅（Ùi原文改寫）
數念過去ê人
（林茂生）
- 04, no. 577, pp. 10
人一世人，不時佇生死ê關門teh出入。干但這一兩月日ê中間，我本身已經有拄著3件喪事ê消息。佇2月15日，好朋友黃俟命牧師，有失落一個出世11月日ê細囝。Koh無幾日，我有接著美國一個朋友ê消息；in也是失落in一个出世6歲ê囝兒。這個朋友名叫做Walter A. Taylor，捌做過7年久ê宣教師，佇南京金陵大學做教授。後來有轉去美國哥倫比亞大學koh teh研究。真湊巧，就是tng我佇美國接著我厝裡ê囡仔過身ê歹消息ê時，伊是頭一人走來安慰我ê心ê人。無拍算，taⁿ不幸輪著我著寫批kā in安慰。In一家是熱心ê基督教信徒。伊ê細囝拍損去ê時，伊ê老父就是囡仔ê阿公，有寫親像下底所記ê話來teh通知in ê朋友。我順續翻譯佇遮，是ài予凡若流目屎猶未ta ê人，看了受安慰。
It is not meet for us to judge God’s way.
And if he calls a child it is because He needs him.
Some live long and never learn.
Some are called early, because they have finished their training.
There is work to do beyond the sky, work that the Architect of Space wants done by children.
That’s why he asks them to come early, that may fit themselves for higher work.
人欲判斷上帝所行ê事，是無合宜。伊若是有召囡仔轉去伊兜，是因為伊有欠用伊。
有人食長歲壽，也攏無學半項。有人khah早受召，是因為伊已經受訓練清楚。
佇天裡彼爿猶原有工thang做。彼个工是即个宇宙建築ê大師傅，ài囡仔去鬥做。
因為按呢，伊chiah召囡仔khah早轉去；ài予in備辦來合彼个khah高尚ê工程。
第三項ê歹消息，就是台灣有失落萬姑娘。論萬姑娘ê一生，實在是對頭到尾，真正有體貼基督ê心ê人。伊ê工有超越職業tek ê精神。伊ê所做，就是拄拄「倒手無予正手知。」伊毋若是好額人ê朋友，也是喪鄉人ê朋友。伊毋若是教會人ê朋友，也是世俗人ê朋友，ài引chhōa in來就近道理。伊毋若是婦人人ê朋友，也是男子青年人ê朋友。我猶佇台北ê時，伊捌寫批予我，講伊真致意佇遮个台灣青年ê事，ài我著koh-khah出力鼓舞。我看伊ê批，心真受感激。可惜到伊過身ê日，我一日過一日，猶未有主倡啥物具體tek ê青年傳道ê事業來安慰伊。實在我看伊過往ê面kap伊相辭ê時，我ê心真艱苦，也真見笑。總是伊ê話猶佇我ê耳孔邊。
Taⁿ萬姑娘已經有完全獻伊ê肉體kap精神佇台灣ê海島。伊ê疼台灣毋是對言語，是對行為。我對伊有看見台灣心靈界開拓者ê真精神。我大ǹg望這粒欲ka-la̍uh佇地裡袂化去；會莩芛、大叢、開花、結子，來繼續伊ê活命。