小傳
Sió-toān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第577卷 |
| 日期 | 1933/4 |
| 頁數 | 19 |
白話字（原文數位化）
Sió-toān
Kán Thn̂g Chip-sū
Koeh Tiâu-sêng
1933.04, no. 577, pp. 19
Kán Thn̂g Chip-sū, sī Lâm-tâu Kàu-hoē chho͘-tāi ê sìn-tô͘, iā-sī Lâm-tâu Kàu-hoē ê tē-ki. Tī saⁿ-cha̍p nî chêng, Lâm-tâu iáu-boē ū pài-tn̂g, i ê lāu-pē A-píⁿ chek, tio̍h poâⁿ-koè Gû-káng-niā soaⁿ-kàu Toā-chng lé-pài. āu-lâi Kán Chip-sū sūn-thàn lāu pē bēng-lēng, tâng-sim chi̍t-ì chò Ki-tok-tô͘.
Lūn i ê chò lâng, sī siā-hoē, kàu-hoē ê bô͘-hoān-chiá, thang hō͘ lán kú-tn̂g siàu-liām.
-
I tng Chip-sū kuí-nā jīm, chīn-tiong chīn-chit, tuì kim-chîⁿ, í-ki̍p it-chhè bô hō͘ lâng giâu-gî.
-
Iú-hàu pē-bó, thiàⁿ sió-tī, kap lâng hô-pêng.
-
Sèng-chêng un-jiû, sìn-iōng, m̄-bat phoe-phêng lâng.
-
Jia̍t-sim kèng Siōng-tè, Kî-tó-hoē í-ki̍p ka-têng lé-pài lóng ū chhut-se̍k.
Kīn-lâi i ê sin-thé chiām-chiām lám, tī 11 goe̍h 19 hō, iáu teh chò seng-lí ê tiong-kan, bô kan-khó͘ chiū khùn--khì, an-jiân tńg-khì Thiⁿ Pē tau, hióng-siū 53 hoè, hok-khì ah! Thoat-lī sè-kan it-chhè ê kan-khó͘, chóng-sī Lâm-tâu Kàu-hoē sit-lo̍h chi̍t ê tiong-sim jîn-bu̍t, si̍t-chāi m̄-kam, 21 hō chhut-chòng, hoē-chòng-chiá pah-goā lâng tāi-ke siong-pi. Taⁿ lâu i ê hū-jîn-lâng kap boē phoè-chhin ê cha-bó͘-kiáⁿ, kap sè-hàn ê kiáⁿ kap lāu-bó. Chóng-sī i ê lāu-bó iáu-ū nn̄g ê sió-tī thang hàu-kèng. Goān Chú chiok-hok in.
Lūn Kán Chip-sū ê pia̍t-sè, chi̍t chân sim-sek ê sū, kì tī-chia chò chham-khó. Lâm-tâu ū chi̍t ê hoē-goā ê I-su Ia̍p Chāi-ian, bîn-bāng khoàⁿ-tio̍h thiⁿ ū te̍k-pia̍t ê kng, thiⁿ-sài kià chi̍t tiuⁿ phoe, kóng beh hō͘ Lâm-tâu it-téng ê lâng, Ia̍p Sian-seⁿ cheng-sîn siông-sè siūⁿ, Lâm-tâu it-téng lâng sī siáⁿ-lâng. Ah! káⁿ-sī jin-keh-chiá, Chiā Pin Sian-seⁿ ho͘N3? I sī siā-hoē jîn-keh-chiá, iā-sī Ki-tok-kàu jia̍t-sim ê Tiúⁿ-ló. Hut-jiân thiaⁿ-tio̍h Kán Thn̂g pia̍t-sè. O͘h! It-téng lâng chiū-sī Kán Thn̂g, iā ē kham-tit, in-uī i sī sêng-si̍t ê siong-jîn.
漢羅（Ùi原文改寫）
小傳
簡Thn̂g執事
郭朝成
1933.04, no. 577, pp. 19
簡Thn̂g執事，是南投教會初代的信徒，也是南投教會的地基。 佇三十年前，南投猶未有拜堂，伊的老父阿扁叔，著盤過牛港嶺山到大庄禮拜。 後來簡執事順趁老父命令，同心一意做基督徒。
論伊的做人，是社會，教會的模範者，通予咱久長數念。
-
伊當執事幾若任，盡忠盡職，tuì金錢，以及一切無予人僥疑。
-
有孝父母，疼小弟，佮人和平。
-
性情溫柔，信用，毋捌批評人。
-
熱心敬上帝，祈禱會以及家庭禮拜攏有出席。
近來伊的身體漸漸lám，佇11月19號，猶teh做生理的中間，無艱苦就睏--去，安然轉去天父兜，享壽53歲，福氣啊！ 脫離世間一切的艱苦，總是南投教會失落一個中心人物，實在毋甘，21號出葬，會葬者百外人大家傷悲。 今留伊的婦人人佮boē配親的查某囝，佮細漢的囝佮老母。 總是伊的老母猶有兩個小弟通孝敬。 願主祝福in。
論簡執事的別世，一chân心適的事，記佇遮做參考。 南投有一個會外的醫師葉Chāi-ian，眠夢看著天有特別的光，天使寄一張批，講欲予南投一等的人，葉先生精神詳細想，南投一等人是啥人。 啊！ 敢是人格者，謝Pin先生ho͘N3？ 伊是社會人格者，也是基督教熱心的長老。 忽然聽著簡Thn̂g別世。 O͘h！ 一等人就是簡Thn̂g，也會堪得，因為伊是誠實的商人。