牧會ê苦心
Bo̍k-hoē ê Khó͘-sim
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第576卷 |
| 日期 | 1933/3 |
| 頁數 | 26 |
白話字（原文數位化）
Bo̍k-hoē ê Khó͘-sim
(Tō͘-pō͘ Goân)
- 03, no. 576, pp. 26-27
Phí-jîn 30 goā nî kú, tī chi̍t ê sió kàu-phài (Loē-tē) choè bo̍k-hoē ê kang, ū tām-po̍h khó͘-sim ê keng-giām.
Tē-it huì-khì ê, chiū-sī hoē-iú ê thài-tō͘ léng-tām ê sî. Pûn ta̍t-á iā m̄ tiô-thiàu, soà beh kóng, án-ni bô chhái-kang lah.
Tē-jī huì-khì ê, chiū-sī ka-tī chi̍t ê teh jia̍t-sim ê hoē-iú, m̄-nā khoàⁿ bô pa̍t ê hoē-iú, liân bo̍k-su mā i pàng hē tī piⁿ-á, chí-ū pún-sin to̍k-toàn teh jia̍t-sim ê thài-tō͘. Hit hō hoē-iú khah-siông boē kú-tn̂g; kuí ge̍h-ji̍t kú chiū piàn khoán.
Bô lūn tó chi̍t ê kàu-hoē, to ū kuí-ê-á ài hong-sîn-khì ê sìn-chiá. Chit hō lâng ū-sî kap bo̍k-su hia̍p-le̍k liāu-lí kàu-hoē, jia̍t-sim thoân tō-lí, chhin-chhiūⁿ nā bô goá tī-teh, kàu-hoē chiū khiā boē tiâu, hit khoán ê thài-tō͘. Siat-sú nā m̄-sī án-ni, chiū-sī pí bo̍k-su khah ū sè-le̍k; á-sī kap bo̍k-su tiàm tī hoán-tuì ê tē-uī, tì-kàu bo̍k-su put-tek-í tio̍h thàn i ê ì-kiàn hit khoán.
Kin-á-ji̍t ê kàu-hoē thang kóng sī chu-pún chú-gī-tek ê. Nā bô chîⁿ, kàu-hoē chiū keng-êng boē khí. Chho͘-tāi kàu-hoē tek-khak m̄-sī án-ni. ǹg-bāng kin-á-ji̍t ê kàu-hoē m̄-thang ēng chu-pún choè tē-it, tio̍h ēng sìn-gióng choè tē-it. Tio̍h khì thiám-mī chu-pún-ka ê kàu-hoē, lēng-khó͘(sic.) kín kái-sàn khah hó. Bo̍k-su bián tú-tú ǹg-bāng niá koân ê ge̍h-kip, tio̍h kap hoē-iú saⁿ-kap oē lún-tit keng-chè ê khùn-lân chiah hó.
Hoē-iú tiong nā ū put-hô ê sî, choè bo̍k-su ê, sī chhin-chhiūⁿ beh pûn huih ê khoán, bô tóng-phài, choân hoē-iú lóng bô chha-piat(sic.), sī tē-it iàu-kín.
Hû chit sè-kan ū hó tē-uī ê, choè toā khah bô ha̍h; kàu-hoē m̄-sī sè-sio̍k ê thoân-thé, sī sìn Ki-tok choè Kiù-chú, bô hun kai-kip ê thoân-thé; sī chhin-chhiūⁿ chi̍t ê toā ka-cho̍k. Sui-bóng ū toā-soè, lâm-lú ê cheng-chha, iáu-kú sī hiaⁿ-tī, tio̍h ū pē-kiáⁿ ê ài-chêng. Bô lūn sī iú-sek-chiá, á-sī lô-tōng-chiá, kàu-hoē tio̍h hō͘ hoē-iú chiâⁿ-choè ēng tâng chi̍t-iūⁿ sim, saⁿ kau-poê ê só͘-chāi. Bo̍k-su choa̍t-tuì tio̍h kong-tō, khoàⁿ hit ê khah ū tio̍h, khoàⁿ chit ê khah bô khí, hit khoán lâng bô choè bo̍k-su ê chu-keh. Chóng-sī bo̍k-su tek-khak m̄-thang bô siông-sek, tio̍h ū lé-gî; tio̍h ū jîn-chêng, tio̍h un-sûn, iā tio̍h kiông-ngī. Hoē-iú kóng, ‘Goán ê bo̍k-su chin m̄ thiaⁿ lâng kóng,’ án-ni chi̍t bīn sī teh hiâm, chi̍t bīn sī ū thang hō͘ hoē-iú sìn-khò ê só͘-chāi. M̄-thang hō͘ hoē-iú boē khò tit ê pat-hong bí-jîn (八方美人) chú-gī.
Lūn-kàu soat-kàu ê khó͘-sim, che mài kóng sī khah gâu. Tio̍h tha̍k-chheh, tio̍h kî-tó, tio̍h thàm hoē-iú, chhut-la̍t choè kang, iā tio̍h hioh-khùn. Bo̍k-hoē ê kang si̍t-chāi oh ah! (Tuì Sin-heng Ki-tok-kàu e̍k).
漢羅（Ùi原文改寫）
牧會的苦心
(Tō͘-pō͘ Goân)
1933.03，no.576，pp.26-27
鄙人30外年久，佇一个小教派(內地)做牧會的工，有淡薄苦心的經驗。
第一費氣的，就是會友的態度冷淡的時。歕笛仔也毋tiô跳，紲欲講，按呢無彩工lah。
第二費氣的，就是家己一个teh熱心的會友，毋若看無別的會友，連牧師嘛伊放hē佇邊仔，只有本身獨斷teh熱心的態度。彼號會友較常袂久長；幾月日久就變款。
無論tó一个教會，都有幾个仔愛風神氣的信者。這號人有時佮牧師協力料理教會，熱心傳道理，親像若無我佇teh，教會就徛袂牢，彼款的態度。設使若毋是按呢，就是比牧師較有勢力；á是佮牧師踮佇反對的地位，致到牧師不得已著趁伊的意見彼款，
今仔日的教會通講是資本主義的的。若無錢，教會就經營袂起。初代教會的確毋是按呢。向望今仔日的教會毋通用資本做第一，著用信仰做第一。著去諂媚資本家的教會，寧可緊解散較好。牧師免拄拄向望領懸的月給，著佮會友相佮會忍得經濟的困難才好。
會友中若有不和的時，做牧師的，是親像欲pûn血的款，無黨派，全會友攏無差別，是第一要緊。
扶這世間有好地位的，做大較無合；教會毋是世俗的團體，是信基督做救主，無分階級的團體；是親像一个大家族。雖罔有大細，男女的精差，猶過是兄弟，著有父囝的愛情。無論是有識者，á是勞動者，教會著予會友成做用同一樣心，相交陪的所在。牧師絕對著公道，看彼个較有著，看這个較無起，彼款人無做牧師的資格。總是牧師的確毋通無常識，著有禮儀；著有人情，著溫純，也著強硬。會友講，「阮的牧師真毋聽人講，」按呢一面是teh嫌，一面是有通予會友信靠的所在。毋通予會友袂靠得的八方美人主義。
論到說教的苦心，這莫講是較gâu。著讀冊，著祈禱，著探會友，出力做工，也著歇睏。牧會的工實在oh ah！(對新興基督教譯)。