感謝主
Kám-siā Chú
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第576卷 |
| 日期 | 1933/3 |
| 頁數 | 1 |
白話字（原文數位化）
Kám-siā Chú
- 03, no. 576, pp. 01
Chú ah! Goán sìn Lí ê miâ kap Lí Sèng ê Kàu-hoē. uī-tio̍h Lí ê miâ, Lí ū kiàn-siat Lí ê kàu-hoē tī phó͘ thiⁿ-ē, goán tio̍h o-ló kám-siā Lí.
Goán tio̍h te̍k-pia̍t kám-siā Lí, in-uī Lí ū kiàn-siat Lí Sèng ê kàu-hoē tī Tâi-oân Lâm-pō͘. Lí ê Sèng-hoē teh heng-khí, lâng-gia̍h teh ke-thiⁿ; sìn-tô͘ teh chìn-pō͘ tī Ki-tok ê in-tián, toā-toā kám-siā bô soah.
Kám-siā Siōng-chú, tī koè-khì ū chiàu-kò͘, iúⁿ-chhī Lí ê kàu-hoē; tī kin-a-ji̍t thang khoàⁿ-kìⁿ sì-ê Tiong-hoē í-keng sī tē sì-hoê, loē-iông ná teh chhiong-si̍t, goán tio̍h tuì Lí seh-siā. Goān chit sì-ê Tiong-hoē thang chò Lí ê kng-teng tī Tâi-oân Lâm-pō͘ ê sì-kak-thâu.
Khún-kiû Siông-tè pang-chān, siúⁿ-sù tuì thiⁿ lâi, hō͘ Lí ê Sèng-hoē oē kian-kò͘ chhin-chhiūⁿ chio̍h-poâⁿ, lâi chò lâng tit-kiù ê só͘-chāi.
Bān chú ê Chú, Lí ê chhiú teh hû tē-bīn-chiūⁿ ê sì-kak-thâu, Lí ê koân-lêng ke̍k toā, goán ài si̍t-sim, sêng-ì kám-siā Chú Iâ-hô-hoa.
Goán kàu Lí ê bīn-chêng, to̍k-to̍k tio̍h tuî-heng, m̄-káⁿ gia̍h-thâu; in-uī choē-koà moá-moá, uī-tio̍h Lí ê kok ê tio̍h-boâ sī ke̍k sió-khoá. Kiû Chú hoaⁿ-hí sià-bián, chān goán tio̍h-boâ tī Chú bô ià-siān. Goán goān chiong sim, sin hiàn hō͘ Lí, chò Lí lō͘-ēng kàu chi̍t-sì; goān Lí put-sî kap goán khiā-khí, éng bô saⁿ-lī.
Khún-kiû Siōng-tè sù hok-khì, hō͘ sì Tiong-hoē toā heng-khí, chín-heng kàu-hoē, hō͘ choē-jîn thang tit sià-choē ê hoaⁿ-hí, kî-kiû Sèng Sîn chhoā goán kiat-liân tī Lí, thang tit hok-khì.
Chú ah! Goān Lí àⁿ-lo̍h khoàⁿ goán, ēng Lí ê sèng-chhiú sî-siông lâi khan, tī Chú thang tit pêng-an.
Kám-siā, kî-kiû khò Chú, sī sim só͘-goān.
漢羅（Ùi原文改寫）
感謝主
- 03, no. 576, pp. 01
主ah！阮信你ê名kap你聖ê教會。為著你ê名，你有建設你ê教會佇普天下，阮著呵咾感謝你。
阮著特別感謝你，因為你有建設你聖ê教會佇台灣南部。你ê聖會teh興起，人額teh加添；信徒teh進步佇基督ê恩典，大大感謝無soah。
感謝上主，佇過去有照顧、養飼你ê教會；佇今仔日thang看見4个中會已經是第四回，內容ná teh充實，阮著對你說謝。願這4个中會thang做你ê光燈佇台灣南部ê四角頭。
懇求上帝幫贊，賞賜對天來，予你ê聖會會堅固親像石磐，來做人得救ê所在。
萬主ê主，你ê手teh扶地面上ê四角頭，你ê權能極大，阮ài實心、誠意感謝主耶和華。
阮到你ê面前，獨獨著搥胸，毋敢額頭；因為罪過滿滿，為著你ê國ê著磨是極小可。求主歡喜赦免，贊阮著磨佇主無厭倦。阮願將心、身獻予你，做你路用到一世；願你不時kap阮徛起，永無相離。
懇求上帝賜福氣，予4中會大興起，振興教會，予罪人thang得赦罪ê歡喜，祈求聖神chhōa阮結聯佇你，thang得福氣。
主ah！願你àⁿ落看阮，用你ê聖手時常來牽，佇主thang得平安。
感謝，祈求靠主，是心所願。