比教士會khah長命
Pí Kàu-sū-hoē khah tn̂g-miā
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第575卷 |
| 日期 | 1933/2 |
| 頁數 | 17 |
白話字（原文數位化）
Pí Kàu-sū-hoē khah tn̂g-miā
(iûⁿ Chù siá--ê)
- 02, no. 575, pp. 17
Bī-ti hiaⁿ teh mn̄g, Tāi-hoē, Tiong-hoē, Kàu-sū-hoē ê sìⁿ-miā, chī-chuī khah tn̂g? Chú-tiuⁿ sàng ìn i kóng, Kàu-sū-hoē khah té, Tāi Tiong-hoē khah tn̂g.
M̄-kú Kàu-sū-hoē tī Eng-kok chin kú, kiám m̄-sī khah tn̂g? ìn, Eng-kok bô kóng Kàu-sū-hoē, ū Soan-tō-hoē, sī Kàu-sū-hoē ê Bó-hoē. Pa̍t ji̍t Tâi-oân Tāi-Tiong-hoē ka-tī khiā-chāi hoat-tián, Kàu-sū-hoē chiū m̄-bián. Hé, m̄-chai tī-sî chiah ē án-ni? ìn, m̄-chai tī-sî, chóng-sī tek-khak ē.
Nā án-ni, chiū-sī bô thang tit-tio̍h hit khoán pó͘-chō͘-kim. Khah hó, á khah m̄ hó? “Khah hó,” siāng m̄ hó--ê, chiū-sī Tāi Tiong-hoē bô hoat-tián, pó͘-chō͘-kim kiám-chió. Siāng hó--ê, chiū-sī Tāi Tiong-hoē hoat-tián, pó͘-chō͘-kim lóng bô. Phó͘-thong bóng-koè--ê, chiū-sī Tāi Tiong-hoē teh hoat-tián, Kàu-sū-hoē ia̍h teh pó͘-chō͘-kim. M̄-kú bē thang án-ni. Nā-sī soe-jio̍k, chiah ē-tit siū pó͘-chō͘. Nā-sī heng-ōng, chiū ná bô siū pó͘-chō͘.
Nā-sī án-ni, tio̍h pàng-teh hō͘ lán soe-jio̍k lâi ná siū chē pó͘-chō͘. M̄-thang án-ni siūⁿ. (1) Sui-jiân kin-nî khah soe-jio̍k, ia̍h bē-thang tit-tio̍h ná chē pó͘-chō͘. (2) Pàng hē-teh soe-jio̍k, sī hāi-tio̍h lán ka-tī. (3) Chú ia̍h bô hoaⁿ-hí, kóng, “Lán sī pîn-toāⁿ ê lô͘-po̍k (Lō͘ ka 19 : 22-27).
Pàng hē-teh soe-jio̍k, bô lâng beh pó͘-chō͘, m̄-kú ū ê si̍t-chāi soe-jio̍k, bē tit-tio̍h pó͘-chō͘, án-ni beh cháiⁿ-iūⁿ ? Ka-tī to̍k-li̍p, lóng m̄-bián kap lâng liân-lo̍k ; che chiū toā chhò lah ! Ka-tī nā ē to̍k-li̍p, àn-choáⁿ tio̍h hō͘ lâng pó͘-chō͘.Tio̍h hō͘ lâng pó͘-chō͘, àn-choáⁿ ka-tī ē to̍k-li̍p. Tāi-ke lâi saⁿ-liân, chiah ē siⁿ khuì-la̍t, chiah ē hoat-tián. Chhin-chhiūⁿ chhiū, ū ki, ū hio̍h (Iok-hān 15 :1-9). Chú Iâ-so͘ sī chhiū-sin, chhin-chhiūⁿ sin-khu : Iâ-so͘ sī Thâu, ta̍k thé to hó, tio̍h ha̍p chò-hoé, chiah ē chhin-chhiūⁿ chi̍t ê lâng, chiah ē oa̍h lah ! (ⅠLîm 12 : 12-31).
漢羅（Ùi原文改寫）
比教士會khah長命
（楊註寫--ê）
- 02, no. 575, pp. 17
未知兄teh問，大會、中會、教士ê性命，chī-chūi khah長？子張sàng應伊講：教士會khah短，大中會khah長。
毋過教士會佇英國真久，kiám毋是khah長？應，英國無講教士會，有宣道會，是教士會ê母會。別日台灣大中會家治徛在發展，教士會就毋免。Hé，毋知佇時chiah會按呢？應，毋知佇時，總是的確會。
若按呢，就是無thang得著彼款補助金。khah好，á khah毋好？「khah好」，siāng毋好--ê，就是Tāi中會無發展，補助-kim減少。Siāng好--ê，就是大中會發展，補助金攏無。普通bóng過--ê，就是大中會teh發展，教士會亦teh補助金。毋過袂thang按呢。若是衰弱，chiah會得受補助。若是興旺，就ná無受補助。
若是按呢，著放teh予咱衰弱來ná受坐補助。毋thang按呢想。(1)雖然今年khah衰弱，亦袂thang得著ná坐補助。(2)放下teh衰弱，是害著咱家治。(3)主亦無歡喜，講：「咱是貧憚ê奴僕（路加19 : 22-27）。
放下teh衰弱，無人欲補助，毋過有ê實在衰弱，袂得著補助，按呢欲怎樣？家治獨立，攏毋免kap人連絡；這就大錯lah！家治若會獨立，按怎著予人補助。著予人補助，按怎家治會獨立。大家來相連，chiah會生氣力，chiah會發展。親像樹，有枝、有葉（約翰15 :1-9）。主耶穌是樹身，親像身軀；耶穌是頭，逐體to好，著合作伙，chiah會親像一个人，chiah會活lah！（Ⅰ林12 : 12-31）。