朱朝來長老的小傳

Chu Tiâu-lâi Tiúⁿ-ló ê Sió-toān

文獻資訊

項目	資料
作者	無lo̍h名
卷期	台灣教會報
卷期	第573期
日期	1932/12
頁數	21

白話字（原文數位化）

Chu Tiâu-lâi Tiúⁿ-ló ê Sió-toān

Koeh Tiâu-sêng kì

1932.12, no. 573, pp. 21

Chu Tiâu-lâi Tiùⁿ-ló, chá-chêng toà tī Bū-hong-chng ê Bān-táu-la̍k keng-lông. Tí9 nî chêng lâi Chháu-tun Kàu-hoē, siū Muî Kam-bū Bo̍k-su sé-lé. In-uī O͘-khe ê chó͘-tòng, khah-siông khì Tāi-lí Kàu-hoē lé-pài. Tī 26 nî chêng chò Tāi-lí Kàu-hoē ê Chip-sū. āu-lâi poaⁿ-soá toà tī Pak-soaⁿ-kheⁿ keng-lông. Bô loā-kú, Pak-soaⁿ-kheⁿ siat kàu-hoē, i iā chiap-soà chò Chip-sū, soà seng chò Tiúⁿ-ló.

I ê chò lâng sī tiong-tit7, un-jiû, jia̍t-sim kèng-pài Siōng-tè, gâu chò kàu-hoē ê kang. I toà Pak-soaⁿ-kheⁿ kuí-cha̍p nî kú, ke-têng la̍p-kha̍p, bu̍t-chit hong-biān thang kóng sī sit-pāi, ke-têng sàn-chhaih, hū-jîn-lâng sit-bêng, kiáⁿ chi̍t ê chò lô-kang, chi̍t ê sè-hàn, pún-sin tài chek-chuí ê pēⁿ kuí-nā nî kú. Si̍t-chāi sī thang khió-lîn ê ka-têng. Nā-sī Chu Tiúⁿ-ló, sī an-pîn lo̍k-tō, put-sî chhiò-iông, bô giâu-gî Siōng-tè, bô hiâm lâng.

Chit kuí nî Pak-soaⁿ-kheⁿ Kàu-hoē bô thoân-kàu-chiá thang chai-poê. Chu Tiúⁿ-ló sī thoa-pēⁿ chò chú-lí, chhoā lâng lé-pài kèng Siōng-tè, bô ià-siān, kám-sim ah! Tī 8 goe̍h 9 hō, an-jiân tńg-khì Pē tau, thoat-lī sè-kan it-chhè ê khó͘-lān, hok-khì ah! Lâu sit-bêng ê Tiuⁿ-ló-niû kap nn̄g ê kiáⁿ. Goān Chú chiok-hok i ê uî-cho̍k.

漢羅（Ùi原文改寫）

朱朝來長老的小傳

郭朝成 記

1932.12, no. 573, pp. 21

朱朝來長老，早前toà佇霧峰庄的萬斗六耕農。 佇29年前來草屯教會，受梅甘霧牧師洗禮。 因為湖溪阻擋，較常去大里教會禮拜。 佇26年前做大里教會的執事。 後來搬徙toà佇北山坑耕農。 無偌久，北山坑設教會，伊也接續做執事，續升做長老。

伊的做人是中直，溫柔，熱心敬拜上帝，gâu做教會的工。 伊toà北山坑幾十年久，家庭la̍p-kha̍p，物質方面通講是失敗，家庭散赤，婦人人失明，囝一個做勞工，一個細漢，本身代積水的病幾若年久。 實在是通可憐的家庭。 若是朱長老，是安貧樂道，不時笑容，無僥疑上帝，無嫌人。

這幾年北山坑教會無傳教者通栽培。 朱長老是拖病做主理，chhoā人禮拜敬上帝，無厭倦，感心啊！ 佇8月9號，安然轉去父兜，脫離世間一切的苦難，福氣啊！ 留失明的長老娘佮兩個囝。 願主祝福伊的遺族。