宗教音樂雜感
Chong-kàu Im-ga̍k Cha̍p-kám
文獻資訊
| 項目 | 資料 |
|---|---|
| 作者 | H. T. S. |
| 卷期 | 台灣教會報 |
| 卷期 | 第572期 |
| 日期 | 1932/11 |
| 頁數 | 17 |
白話字（原文數位化）
Chong-kàu Im-ga̍k Cha̍p-kám
H. T. S.
1932.11, no. 572, pp. 17
Kīn-lâi Chong-kàu im-ga̍k chiām-chiām hoat-ta̍t chìn-pō͘, si̍t-chāi thang hoaⁿ-hí ê hiān-siōng. Kàu-hoē ū kuí-nā só͘-chāi chám-jiân tì-ì tī chit chân, ū cho͘-chit Sèng-koa-tuī lâi teh hōng-sū kàu-hoē, che si̍t-chāi chin thang kiong-hí! Chiàu só͘ sìn, kàu-hoē kap im-ga̍k, chū-jiân sī bē thang saⁿ pun-lī-tit ê chi̍t hāng. Sìn-gióng seng-oa̍h ê thiat-tí, kèng-ài Siōng-tè ê ke̍k-tì, chū-jiân ē seⁿ-chhut chàn-bí ê sim, só͘-í tio̍h ēng im-ga̍k lâi piáu-hiān. Le-pài ê thoā iàu-sò͘ ê chi̍t hāng, chiū-sī gîm-si, chhiùⁿ-koa o-ló.
San-tiân Keng-chok (Yamada) Sian-siⁿ kóng, “Im-ga̍k the̍h-lâi ji̍t tī ji̍t-siông seng-oa̍h ê lāi-bīn, che sī goá ê liām-goān.” Chò sìn-tô͘ ê lâng tehpbeh kóng, “Im-ga̍k the̍h ji̍p-lâi chong-kàu seng-oa̍h ê lāi-bīn, che sī goán ê liām-goān.” Hō-chhoan Hong-gān Sian-siⁿ (Kagawa) kóng, “Hiong-chhoan ê lâng kiám-chhái bô bí thang chia̍h teh chin kan-khó͘, chóng-sī chàn-bí Siōng-tè ê koa, ún-tàng ū tiâu tī in ê sim-lāi.” Ah! Si̍t-chāi ê sìn-tô͘ bô lūn tú-tio̍h siáⁿ kéng-gū, bô sit-chì, koh ē choan-sim oá-khò tī Siōng-tè ê thiàⁿ lâi tit pêng-an, chi̍t hāng chiū-sī tuì i ū chàn-bí Siōng-tè ê koa, tiâu tī i ê sim-lāi, iā put-sî ū piáu-hiān chàn-bí Siōng-tè ê in-toaⁿ.
Kàu-hoē im-ga̍k kap sè-sio̍k im-ga̍k ū toā cheng-chha. Chêng--chiá, sī chò lé-pài, chàn-bí ê lō͘-ēng, lâi hiòng-siōng lán lâng ê chong-kàu kám-chêng. Hō͘--chiá, sī kan-ta chò chi̍t khoán ngō͘-lo̍k, lâi hō͘ lâng ê sim chiām-sî hoaⁿ-hí sóng-khoài nā-tiāⁿ.
Lūn kàu-hoē im-ga̍k ê khí-chho͘, chiū-sī Chú-āu oá 600 nî ê Lô-má Hoat-ông Gregrius tē 1 sè ê chhòng-siat; hit ê iūⁿ-sek, chiū sī Gregorian chant (グレゴリウス象讚歌). Chú-āu oá 1500 nî ê sî-tāi, koh ū Lô-má ga̍k-phài ê chong-kàu im-ga̍k put-chí hoat ta̍t. Chit phài ê tāi-piáu-chiá kiò-chò Giovaⁿi Palestrina (1526-1594). Chit ê ga̍k-phài, sī kàu-hoē im-ga̍k ê hoat-ta̍t sú-chiūⁿ, put-chí tiōng-iàu ê sî-tāi. Kīn-tāi im-ga̍k ê khai-chó͘ J. Sebastian Bach (1685-1750) ê sî-tāi, chong-kàu im-ga̍k iā sī toā chhiong-sēng. I it-seng só͘ hōng-sū ê kàu-hoē, chiū-sī tī Tek-kok ê Leipzig ê Sèng T-má Kàu-hoē, tī-hia chò ga̍k-tiúⁿ. Kàu taⁿ hit ê só͘-chāi chheng-chò im-ga̍k ê bêng-só͘. Kàu hiān-tāi, chong-kàu im-ga̍k iû-goân toā hoat-ta̍t. Hiān-tāi kéng-īⁿ-tek ê chok-khek-chiá, chiū-sī Paul Hindemith (1895-). Í-siōng só͘ kì 3, 4 khoán ê sî-tāi, kok ū i ê iūⁿ-sek; chong-kàu im-ga̍k chin chhiong-sēng, soà kàu tī kin-á-ji̍t.
Chiàu só͘ sìn, chong-kàu nā tī-teh, im-ga̍k iā teh-khak tī-teh. M̄-nā án-ni, chiong-lâi chin ê im-ga̍k, chiū-sī tio̍h tuì chong-kàu im-ga̍k lâi chhut-hiān. Kó͘-chá chhut-miâ ê im-ga̍k-ka choē-choē-sī Ki-tok-tô͘, iā chhut-miâ ê ha̍p-chhiùⁿ-khek, lóng sī koan-hē chàn-bí Siōng-tè, o-ló Kiù-sè chú.
Lō͘-tek Má-teng kóng, “Im-ga̍k sī Siōng-tè só͘ siúⁿ-sù chi̍t hāng chin suí, chin ko-siōng ê gē-su̍t. Mô͘-kuí put-chí kiaⁿ im-ga̍k, im-ga̍k ē an-uì lâng, hō͘ lâng ê sim un-jiû, hō͘ i pìⁿ-cho tō-tek-tek, lí-sióng-tek ê lâng, hō͘ m̄-hó ê su-siúⁿ it-chīn siau-bô. Goá bô in-uī chi̍t hāng uí-tāi ê sū-kiān, lâi pàng-sak goá só͘ ū sió-khoá ê im-ga̍k. Ha̍k-hāu ê sian-siⁿ nā bē hiáu gîm-si, goá bô kiò i chò sian-siⁿ. Chheng-liân lâng tio̍h o̍h im-ga̍k, in-uī ē chè-chō siān-liông koh ū liān-ta̍t ê sū (士)”. Chiàu só͘ sìn, im-ga̍k chûn-chāi, á-si hit ê chin ê kè-ta̍t, chiū-sī tio̍h piáu-hiān su-siúⁿ lâi kám-tōng lâng. Kan-ta ē gîm chin hó thiaⁿ, chin hiang, án-ni sī bó kàu-gia̍h. Koa-sû kap koa-phó͘ tio̍h ū oân-choân ê thóng-it, hiông-hô, put-khó hun-lī ê kiat-ha̍p chiah ē ēng-tit. Kīn-tāi ê seng-ga̍k-ka chē-chē lóng khiā tī siang-chhe-lō͘. In iáu m̄-chai tio̍h chù-tiōng tī chit ê só͘-chāi. Kiám-chhái sī kan-ta gîm hó thiaⁿ, beh hō͘-lâng ài-bō͘ iā bô tek-khak. Nā-sī chong-kàu im-ga̍k koh-khoh bē ēng-tit, in-uī beh hō͘ pa̍t lâng lâi loân-bō͘ lán chiah lâi gîm, choan-choan sī in-uī chàn-bí Siōng-tè ê thiàⁿ, só͘-í ū piáu-hiān i ê chin-chêng. Chiàu só͘ siūⁿ, lâng ê sim nā chheng-khì, chū-jiân i ê kám-chêng sī ko-siōng, só͘ piáu-hiān ê im-ga̍k sī suí, sī ū la̍t, sī ē kám-tōng lâng, iā sī Siōng-tè só͘ kàm-la̍p hoaⁿ-hí ê.
Chóng kóng, koa-sû sī put-chí iàu-kín, sī chhin-chhiūⁿ chú-lâng. Koa-phó͘ sī beh chān koa-sû hō͘ i ē oa̍h-oa̍h, koh ū la̍t thang kú-tn̂g ìn-siōng tī lâng ê thâu-náu-lāi. Só͘-í koa-sû sī put-chí tiōng-iàu, beh hō͘ i ē chin bêng, ū la̍t thang kám-tōng lâng, tio̍h put-sî liān-si̍p, koh pún-sin iā tio̍h ū hit khoán ê kám-chêng. Só͘-í nā beh gîm chhut-miâ ê chong-kàu-khek, bē bián-tit ài hoán-séng, chū-kí m̄-chai ē kham-tit, á-sī ū hit khoán lêng-tek ê ìn-siōng, chong-kàu ê kám-chêng á-bô? Eng-kok kó͘-kim to̍k-pō͘ ê chong-kàu Si-jîn Alfred Teⁿyson ê Si, put-chí ū hoē-oā-tek (繪畫的), koh ū i m-ga̍k-tek (音樂的) ê te̍k-sek tī-teh. Chit nn̄g hāng tiâu-kiāⁿ sī si-jîn ê lí-sióng. Só͘-í chhut-miâ lâng ê Si, lâng chin ài the̍h-lâi chò tiāu lâi gîm. Thang chai koa-sû sī chin iàu-kín. Hoat-kok ê chok-khiok-ka, chí-hui-chiá, kiam to̍k-chhiùⁿ-ka Reynaldo Hahn (1874-), ke̍k-le̍k chú-tiuⁿ tī chit ê só͘-chāi. Kî-thaⁿ Í-tāi-lí ê Teno͘ Enrico Caruso (1873-1921), í-ki̍p Eng-kok ê Baritone koa-chhiú Sir Charles Santley, á-sī Tek-kok ê toā sèng-ga̍k-ka Lilli Lehmaⁿ hu-jîn lóng ū chú-tiuⁿ, lūn koa-sû ê hun-bêng kap kám-tōng-la̍t ê tiōng-iàu-sèng.
Í-siōng kán-tan kóng tām-po̍h, ǹg-bāng ē chò tāi-ke ê chham-khó. Kî-thaⁿ ū ki-hoē chiū ē koh gīlūn.
漢羅（Ùi原文改寫）
宗教音樂雜感
H. T. S.
1932.11, no. 572, pp. 17
近來宗教音樂漸漸發達進步，實在通歡喜的現象。 教會有幾若所在嶄然致意佇這層，有組織聖歌隊來teh奉事教會，這實在真通恭喜！ 照所信，教會佮音樂，自然是bē通相分離得的一項。 信仰生活的徹底，敬愛上帝的極致，自然會生出讚美的心，所以著用音樂來表現。 禮拜的大要素的一項，就是吟詩，唱歌呵咾。
山田耕作 (Yamada) 先生講：”音樂提來入佇日常生活的內面，這是我的念願。” 做信徒的人teh-beh講：”音樂提入來宗教生活的內面，這是阮的念願。” 河川豐彥先生 (Kagawa) 講，”鄉村的人減采無米通食teh真艱苦，總是讚美上帝的歌，穩當有tiâu佇in的心內。” 啊！實在的信徒無論抵著啥境遇，無失志，閣會專心倚靠佇上帝的疼來得平安，一項就是對伊有讚美上帝的歌，tiâu佇伊的心內，也不時有表現讚美上帝的因端。
教會音樂佮世俗音樂有大精差。 前--者，是做禮拜，讚美的路用，來向上咱人的宗教感情。 後--者，是干單做一款娛樂，來予人的心暫時歡喜爽快若定。
論教會音樂的起初，就是主後倚 600年的羅馬法王Gregrius第1世的創設；彼个樣式，就是Gregorian chant (グレゴリウス象讚歌)。 主後倚1500年的時代，閣有羅馬樂派的宗教音樂不止發達。 這派的代表者叫做Giovaⁿi Palestrina (1526-1594)。 這個樂派，是教會音樂的發達史上，不止重要的時代。 近代音樂的開祖J. Sebastian Bach (1685-1750) 的時代，宗教音樂也是大昌盛。 伊一生所奉事的教會，就是佇德國的Leipzig的聖馬教會，佇遐做樂長。 到今彼个所在成做音樂的明所。 到現代，宗教音樂猶原大發達。 現代景院tek的作曲者，就是Paul Hindemith (1895-)。 以上所記3、4款的時代，閣有伊的樣式；宗教音樂真昌盛，續到佇今仔日。
照所信，宗教若tī-teh，音樂也的確tī-teh。 毋旦按呢，將來真的音樂，就是著tuì宗教音樂來出現。 古早出名的音樂家濟濟是基督徒，也出名的合唱曲，攏是關係讚美上帝，呵咾救世主。
路德馬丁講：”音樂是上帝所賞賜一項真媠，真高尚的藝術。 魔鬼不止驚音樂，音樂會安慰人，予人的心溫柔，予伊變做道德tek，理想tek的人， 予毋好的思想一盡消無。 我無因為一項偉大的事件，來放sak我所有小可的音樂。 學校的先生若bē曉吟詩，我無叫伊做先生。 青年人著學音樂，因為會製造善良閣有練達的士”。 照所信，音樂存在，抑是彼个真的價值，就是著表現思想來感動人。 干單會吟真好聽，真香， 按呢是無夠額。 歌詞佮歌譜著有完全的統一，向和，不可分離的結合chiah會用得。 近代的聖樂家濟濟攏徛佇雙叉路。 In猶毋知著注重佇這个所在。 減采是干單吟好聽，欲予人愛慕也無的確。若是宗教音樂閣較bē用得，因為欲予別人來戀慕咱chiah來吟，專專是因為讚美上帝的疼，所以有表現伊的真情。 照所想，人的心若清氣，自然伊的感情是高尚，所表現的音樂是媠，是有力，是的感動人，也是上帝所監納歡喜的。
總講：歌詞是不止要緊，是親像主人。 歌譜是欲贊歌詞予伊的活活， 閣有力通久長印象佇人的頭腦內。 所以歌詞是不止重要，欲予伊的真明，有力通感動人，著不時練習，閣本身也著有彼款的感情。 所以若欲吟出名的宗教曲，未免得愛反省，自己毋知會堪得，抑是有彼款能德的印象，宗教的感情抑無？ 英國古今獨步的宗教詩人Alfred Teⁿyson的詩，不止有繪畫tek（繪畫的），閣有音樂tek（音樂的）的特色tī-teh。 這兩項條件是詩人的理想。 所以出名人的詩，人真愛提來做調來吟。 通知歌詞是真要緊。 法國的作曲家、指揮者，兼獨唱家Reynaldo Hahn (1874-)，極力主張佇這个所在。 其他意大利的Teno͘ Enrico Caruso (1873-1921)，以及英國的Baritone歌手Sir Charles Santley，抑是德國的大聖樂家 Lilli Lehmaⁿ夫人攏有主張論歌詞的分明佮感動力的重要性。
以上簡單講淡薄，向望會做大家的參考。 其他有機會就會閣議論。