安然歸國
An-jiân Kui-kok
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第572期 |
| 日期 | 1932/11 |
| 頁數 | 7 |
白話字（原文數位化）
An-jiân Kui-kok
Kî-āu Kàu-hoē
1932.11, no. 572, pp. 7
Lîm Thian-kok tī 1923 nî, 5 goe̍h 9 ji̍t chhut-sì tī Phiⁿ-ô͘ Tang-kiat tó-sū. I sī Lîm Thêng hiaⁿ ê tióng-lâm, 6, 7, nî chêng, Lîm Thêng hiaⁿ ū poaⁿ-soá i ê ke-koàn lâi tiàm tī Kî-āu. Lîm Thian-kok tī 1928 nî, Chiau-hô 2 nî 8 goe̍h 21 hō, tuì So͘ Io̍k-châi Bo̍k-su léng-sián chò siáu-jî hoē-oân. 5 hoè ji̍p Iù-tī-kho, siông-lia̍t iu-téng, taⁿ í-keng chìn-ji̍p Tiong-téng-kho kah-cho͘. Jîn-châi chhut-chiòng, phín-hēng ko-kiat, it-kú it-tōng, lóng sī toā lâng khì-khài, lāi-chhin goā-chhek, hoē-lāi hoē-goā put-chí o-ló.
Khó-sioh tī 8 goe̍h 21 hō, hū-pīⁿ í-lâi, ji̍p tī Hái-ló-bêng I-īⁿ tī-liâu, nn̄g lé-pài goā ū khah hó; chóng sī āu-lâi hut-jiân hoán Mô͘-tn̂g-iām, ji̍t-ji̍t tîm-tāng, Se, Hàn-i chhiáⁿ chin-chē, bû-hoat khó kiù. Ji̍p-īⁿ tiong, pún-tông ê Khó͘ Bo̍k-su ta̍uh-ta̍uh khì an-uì i, thè i kî-tó, khoàⁿ i ê bīn lóng bô chi̍t-sut-á ai-oàn ê khoán. Pē-bú iā jia̍t-sim thè i kî-tó, i pún-sin iā siông-siông kiû-kiò Chú. I ê lāu-pē siông-siông kî-tó kóng, Siōng-tè ah! Lí nā beh koh hō͘ Thian-kok ah tiàm sè-kan, kiû Lí hō͘ i chia̍h io̍h ū kong-hāu, kín thoat-lī kan-khó͘; chóng-sī nā beh tiàu i lī-khui sè-kan, kiû Lí hō͘ i beh lîm-chiong ê sî, só͘ kau-tài ê oē, hō͘ goán ē tit-tio̍h an-uì.
I tuì phoà-pīⁿ kàu lîm-chiong ê sî, cheng-sîn bô sit cheng-eng. Chia̍h io̍h, chù-siā ê sī pek-chhiat kî-tó, 3 lé-pài kú toā sió siā chù 82 ki, teh chù ê sî lóng bô kám-kak thiàⁿ, chin pa-kiat; hō͘ i-seng tio̍h kiaⁿ, kî-koài chit ê gín-ná ê ióng-khì.
Tī 9 goe̍h 14 hō, chá-khí 4 tiám-goā teh kiò i ê lāu-bú lâi, (i ê lāu pē àm-chiⁿ siūⁿ sī beh kau-tài oē lah, chiū kín kiò i ê goā-kong tò-khì kiò). oá 5 tiám, lāu-bú kàu-uī, lāu-bú kóng, án kiáⁿ, Thian-kok ah oê! Lí kiò goá mi̍h-tāi? Thian-kok kóng, A-bú ah! Goá beh tńg--lâi lah, lí tio̍h m̄-thang hoân-ló. Lāu-bú, kóng, Beh tńg lâi khì lán chhù-ni̍h? Thian-kok kóng, M̄-sī, beh tńg--lâi, lí tio̍h m̄-thang hoân-ló. Koh thêng tiap-á-kú, Thian-kok tò-chhiú kia̍h koân kí thiⁿ kóng, Hia ū chhù ū lâng, lāu-bú kóng, Lâng cháiⁿ-iūⁿ? Thian-kok, lâng chhēng pe̍h-saⁿ. I ê lāu-pē mn̄g, Thian-kok ah, lí beh kā lín bú-kū kóng siáⁿ hoè bô? (I ê bú-kū sī bī-sìn-chiá). Koh thêng tiap-á-kú, Thian-kok tuì in bú-kū kóng, A-kū ah! Lí tio̍h pài Siōng-tè, pa̍t-ji̍t chiah ē-tit ji̍p Thian-tông. Koh bô loā-kú thó beh peh--khí-lâi, lāu-pē chiū phō i, pē-bú pek-chhiat thè i kí-tó, āu-lâi pē-bú tuì i kóng, Thian-kok ah! Lí tio̍h chhim-sìn thiⁿ-téng ê Siōng-tè ò͘! I hit-sî bē kòng-oē, chí-ū tìm-thâu. Pē-bú mn̄g kóng, Thian-kok ah! Lí ū chin pêng-an bô? Tìm-thâu an-jiân kui-thian. Miâ Thian-kok, an-jiân kui thian-kok, chin-chiàⁿ hēng-hok. Só͘-í i ê pē-bú chin hoaⁿ-hí kám-siā Siōng-tè, Ia-hô-hoa siúⁿ-sù, Iâ-hô-hoa the̍h--khì, tio̍h o-ló Iâ-hô-hoa (Iok-pek 1:21).
漢羅（Ùi原文改寫）
安然歸國
旗後教會
1932.11, no. 572, pp. 7
林天國佇1923年，5月9日出世佇澎湖東吉島嶼。 伊是林Têng兄的長男， 6、7年前，林Têng兄有搬徙伊的家眷來踮佇旗後。 林天國佇1928年， 昭和2年8月21號，tuì蘇育才牧師領先做小兒會員。 5 歲入幼稚科，常列優等，今已經進入中等科甲組。 人才出眾，品行高潔，一舉一動，攏是大人氣慨，內親外戚，會內會外不止呵咾。
可惜佇8月21號，負病以來，入佇海老明醫院治療，兩禮拜外有較好；總是後來忽然患盲腸炎，日日沉重，西、漢醫請真濟，無法可救。 入院中，本堂的許牧師ta̍uh-ta̍uh去安慰伊，著伊祈禱，看伊的面攏無一屑仔哀怨的款。 父母也熱心著伊祈禱，伊本身也常常求叫主。 伊的老父常常祈禱講：上帝啊！ 你若欲閣予天國啊踮世間，求你予伊食藥有功效，緊脫離艱苦；總是若欲召伊離開世間，求你予伊欲臨終的時，所交代的話，予阮會得著安慰。
伊tuì破病到臨終的時，精神無失精英。 食藥，注射的時切祈禱，3禮拜久大小射注82支，teh注的時攏無感覺疼，真巴結；予醫生著驚，奇怪這个囝仔的勇氣。
佇9月14號，早起4點外teh叫伊的老母來，（伊的老父暗靜想是欲交代話啦，就緊叫伊的外公倒去叫)。 徛5點，老母到位，老母講：俺囝，天國啊喂！ 你叫我物代？ 天國講：阿母啊！ 我欲轉來啊，你著毋通煩惱。 老母，講：欲轉來去咱厝裡？ 天國講：毋是，欲轉來，你著毋通煩惱。 閣停輒仔久，天國左手舉懸指天講：彼有厝有人，老母講：人怎樣？天國，人穿白衫。 伊的老父問，天國啊，你欲共恁母舅講啥貨無？ （伊的母舅是未信者）。 閣停輒仔久，天國對in母舅講：阿舅啊！ 你著拜上帝，別日chiah會得入天堂。 閣無偌久討欲peh起來，老父就抱伊，父母迫切替伊祈禱，後來父母對伊講，天國啊！ 你著深信天頂的上帝哦！ 伊彼時bē講話，只有頓頭。 父母問講：天國啊！ 你有真平安無？ 頓頭安然歸天。 名天國，安然歸天國，真正幸福。 所以伊的父母真歡喜感謝上帝，耶和華的賞賜，耶和華提去，著呵咾耶和華（約伯1:21）。