教會佮社會
Kàu-hoē kap Siā-hoē
文獻資訊
| 項目 | 資料 |
|---|---|
| 作者 | 柯設偕 Koa Siat-kai |
| 卷期 | 台灣教會報/芥菜子 |
| 卷期 | 第569期 |
| 日期 | 1932/8 |
| 頁數 | 25 |
白話字（原文數位化）
Kàu-hoē kap Siā-hoē
Koa Siat-kai
1932.08, no. 569 (KCC, no. 79), pp. 25-26
Kàu-hoē sī sím-mi̍h?
Kàu-hoē sī Siōng-tè tuì sè-kan lâng ê tiong-kan kéng--chhut-lâi ê peh-sìⁿ, lâi kui tī I ê miâ, i sī Ki-tok ê seng-khu (Sù-tô͘ Hēng-toān 15 chiuⁿ 14 chat; Í-hut-só͘ 5 chiuⁿ 30 chat).
Siā-hoē sī sím-mi̍h?
Siā-hoē sī sè-kan lâng kiat-ha̍p chū-chi̍p ê thoân-thé, ta̍k téng-hō ê lâng chū-chi̍p ê só͘-chāi, sī Sèng-keng só͘ kóng, sè-sio̍k ê thoân-thé.
Kàu-hoē kap siā-hoē chit nn̄g ê, boē-oē choè phoāⁿ, boē-oē siong-thong, boē-oē kau-poê--ê (Ko-lîm-to hō͘-su 6 chiuⁿ 14-18chat).
Chóng-sī sìn-tô͘ khiok-sī tiàm tī sè-kan (Iok-hān 17 chiuⁿ 11 chat).
Só͘-í sìn-tô͘ kap sè-kan-siā-hoē ū tām-po̍h koan-hē, m̄-sī lóng bô kan-sia̍p.
Khí-thâu ê kàu-hoē, tē-it tāi-seng sìn-thàn Chú Iâ-so͘, āu lâi thiàⁿ-thàng sèng-tô͘ (kàu-hoē), koh āu-lâi thiàⁿ chèng-lâng (siā-hoē). (Pí-tek hō͘-su 1 chiuⁿ 7 chat).
Kàu-hoē tio̍h choè siā-hoē ê chí-tō, bô͘-hoān. Kàu-hoē m̄-thang thàn siā-hoē, tè siā-hoē; sī siā-hoē tio̍h thàn kàu-hoē, tè kàu-hoē chiah tio̍h.
M̄-thang siūⁿ, kàu-hoē beh cháiⁿ-iūⁿ lâi thàn siā-hoē, èng siā-hoē ê iau-kiû, tè siā-hoē ê chhu-hiòng.
Tio̍h khoà-lū cháiⁿ-iūⁿ lâi hō͘ siā-hoē lâi o̍h kàu-hoē, chiū-kūn kàu-hoē, thàn kàu-hoē chiah tio̍h.
Chú Iâ-so͘ bat keh2-sī Sù-tô͘ Iok-hān siá phoe hō͘ A-se-a 7 ê kàu-hoē, phêng-lūn in ê chōng-hóng: -
(1) Í-hut-só͘ ê Kàu-hoē, í-keng lī-khui khí-thâu ê thiàⁿ.
(2) Pia̍t-ka-mô͘ ê Kàu-hoē, ū lâng chhî-siú Pa-lân ê kàu.
(3) Chhui-ngá-chhui-lat ê Kàu-hoē, iông-ún lâ-sián-piat.
(4) Sat-te̍k ê Kàu-hoē, chiàu miâ sī oa̍h, kî-si̍t sī sí.
(5) Ló-tí-ka ê Kàu-hoē, bô jia̍t bô-léng, lâ-lûn-sio.
Chóng-sī: -
(6) Sū-muí-ná ê Kàu-hoē, sui-sī hoān-lān kap siòng-hiong, iáu-kú chīn-tiong.
(7) Hui-lô-thiap-hui ê Kàu-hoē, ū tām-po̍h khuì-la̍t, í-keng siú Chú ê tō-lí, bē bat m̄-jīn Chú ê miâ.
(Khiok m̄-sī teh hiâm chiah ê kàu-hoē lóng-chóng pháiⁿ, put-ok3 ín khí-lâi choè chham-khó).
Lán tāi-ke tio̍h kò͘ kàu-hoē, hō͘ kàu-hoē heng-khí, iā thang chí-tō siā-hoē.
(Chóng-sī kàu-hoē kap siā-hoē sī bô siāng, iā nn̄g ê boē-oē saⁿ-chham, saⁿ kiat-ha̍p--ê, chit hāng tio̍h chù-ì).
Só͘-í lán tio̍h ēng Ki-tok choè toē-ki, iā m̄ -thang hō͘ kàu-hoē sio̍k-hoà (俗化), hoán-tńg tio̍h hō͘ siā-hoē sèng-hoà (聖化).
Chhiáⁿ tha̍k Má-thài 26 chiuⁿ 31-46 chat: Lūn-khí Chú Iâ-so͘ hun-piat gī, put-gī (á-sī thang kóng) hun-piat “Sèng” (聖) “Sio̍k” (俗)
Oāⁿ-oē lâi kóng, hun-piat kàu-hoē kap siā-hoē, -ê ū-giân.
漢羅（Ùi原文改寫）
教會佮社會
柯設偕
1932.08, no. 569 （KCC, no. 79）, pp. 25-26
教會是甚麼？
教會是上帝tuì世間人的中間揀出來的百姓，來歸佇伊的名，伊是基督的身軀（使徒後傳15章14節；以弗所5章30節）。
社會是甚麼？
社會是世間人結合聚集的團體，逐等號的人聚集的所在，是聖經所講：世俗的團體。
教會佮社會這兩個，boē會做伴，boē會相通，boē會交陪--的（哥林多後書6章14-18節）。
總是信徒卻是踮佇世間（約翰17章11節）。
所以信徒佮世間 - 社會有淡薄關係，毋是攏無干涉。
起頭的教會，第一事先信趁主耶穌，後來疼痛聖徒（教會），閣後來疼眾人（社會）。（彼得後書 1章7節）。
教會著做社會的指導，模範。 教會毋通趁社會，tè社會；是社會著趁教會，tè教會chiah 著。
毋通想，教會beh怎樣來趁社會，應社會的要求，tè社會的趨向。
著掛慮怎樣來予社會來學教會，就近教會，趁教會chiah 著。
主耶穌捌啟示使徒約翰寫批予亞西亞7的教會，評論in 的狀況：-
（1） 以弗所的教會，已經離開起頭的疼。
（2） 別迦摩的教會，有人持守巴蘭的道。
（3） 推雅推喇的教會，容允lâ-sián-piat。
（4） 撒狄的教會，照名是活，其實是死。
（5） 老底嘉的教會，無熱無冷，lâ-lûn燒。
總是：-
（6） 士每拿的教會，雖是患難佮宋凶，猶久盡忠。
（7） 非拉鐵非的教會，有淡薄氣力，已經守主的道理，未捌毋認主的名。
（卻毋是teh嫌遮的教會攏總歹，不過用起來做參考）。
咱大家著顧教會，予教會興起，也通指導社會。
（總是教會佮社會是無像，也兩個boē會相參，相結合--的，這項著注意）。
所以咱著用基督做地基，也毋通予教會俗化，反轉著予社會聖化。
請讀馬太26章31-46節：論起主耶穌分別義，不義（抑是通講）分別”聖”“俗”
換話來講：分別教會佮社會，- 的預言。