自治思想
Chū-tī Su-siúⁿ
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第551期 |
| 日期 | 1931/2 |
| 頁數 | 15 |
白話字（原文數位化）
Chū-tī Su-siúⁿ
Tân Thiam-ōng
1931.02, no. 551 (KCC, no. 60), pp. 15-16
Tui-siūⁿ “Chū-tī” kek-giâu kàu-gia̍h thang kám-kek lâng ê sim-lāi, éng bô boē kì-tit ê lí.
Só kóng “Chū-tī” m̄-sī ta̍k ê hun-thiah sì-soàⁿ, chiū-sī ke-thiⁿ kiat-ha̍p chhut-la̍t.
Chhin-chhiūⁿ pún-sin “Chū-tī” sī ka-kī tuì chek-jīm, i ta̍k-hāng ê chit-bū oē an-choân.
Chhin-chhiūⁿ ke-têng “Chū-tī”, hit ê ke kian-kò͘, kok lâng oē hū chek-jīm, ke-chú ê-tàⁿ chiū kiám-khin, bián-tit choē khoà-lū, kè-thâu lâi iu-būn, koh-chài i ê kong-lô chiâⁿ kàu ū chhun, choân-ke ū hok-khì.
Só͘-í kóng, Tī sè-kan hoān-sū lòng thang “Chū-tī” ài jīn-bêng un-chú.
Kok-ka “Chū-tī” lāi-chèng, goā-kài lóng thang an-sim, chiū hit ê kok ū tióng-toā, kian-kò͘, khiā-chāi ê toē-ki. Chhin-chhiūⁿ Tâi-oân tuì Tiân Chóng-tok chhòng-siat “Chū-tī” í-lâi, lāi-chèng, goā-hoat, ji̍t-ji̍t oāⁿ-sin kái-siān, choè peh-sìⁿ ê chū-kak chhut-la̍t, chiáng chèng-koân ê lâng khó-í khoan-sim, an-jiân chū-chai, khó-kiong khoá-hō; lóng ū chìn-pō͘, toā-hàn chū-pó pó-kok ê toē-ki.
Taⁿ iā siat-li̍p liân-bêng “Chū-tī-hoē”, sī peh-sìⁿ liân-lo̍k tâng-thé ū “Chū-tī” cheng-sîn kui êng-kng hō͘ kok-thé kàu tī Thian-hông Pè-hā.
Lâm-pō͘ Tiong-hoē tuì cha̍p-nî chêng chiū ū lâng chhim kám-kak “Chū-tī” ê pit-iàu, khí-thâu tuì Ko-hiông khu, āu-lâi chiū saⁿ-soà hun choè 4 khu, sūn-soà seng-keh choè 4 Tiong-hoē, it Tāi-hoē, si̍t-chāi lāi-chèng, goā-tī chéng-choê bô hâ-hûn, si̍t kham khó kèng-tiōng hāu-hoat ê sian-poè, lâi êng-kng Ki-tok, pò un tī Bú-hoē.
Iâ-so͘ kóng, Goá khoán-thāi lín bô ēng lô͘-po̍k, sī ēng pêng-iú, in-uī lô͘-po̍k m̄-chai chú lâng ê sim, sī ài in ū chū-kak “Chū-tī” ê cheng-sîn.
Lán Pak-pō͘ siat-kàu kūn 60 nî, siū-tio̍h Bú-hoē toā thiàⁿ-sioh pang-chān m̄-sī kóng oē chīn, siá oē liáu, nā tit-tio̍h tông-chì chū-kak hun-khu o̍h kiâⁿ “Chū-tī” ê chì-bōng, lâi piáu-beng 60 chiu-nî ê kì-liām m̄ chin bān-hēng bān-hēng.
Chhì û-sióng hun-lia̍t, kè 21 tông-ohē, 72 hoē-tn̂g:—
-
Lô-tong, Gî-lân, Koe-lâng 3 tông-hoē, 13 uī.
-
Chuí-tńg-kha, Sek-kháu, Sang-liân, Toā-tiū-tiâⁿ, Saⁿ-kak-po͘, Tām-suí 6 tông-hoē, 16 uī.
-
Sin-tiàm, Báng-kah, Saⁿ-kak-éng, Thô-hn̂g, Tiong-le̍k, 5 tông-hoē, 12 uī.
-
Sin-po͘, Sin-tek, Biâu-lek, Tāi-kah, Tun-á-kha, 5 tông-hoe, 19 ui.
-
Hoe-liân-káng, Gio̍k-lí nn̄g tông-hoē, 12 uī.
Bān-hāng sī o̍h--ê, nā oē si̍t-hêng o̍h kiâⁿ chin hēng-hok, Siōng-tè chiok-hok oē toā châng, kàu sî hi-bōng lán Tâi-oân ūnn̄g Tāi-hoē, soà oē chiâⁿ chi̍t ê choè-ko ê Chóng-hoē, chiah thang kóng Tâi-oân Kàu-hoē sêng-kong.
漢羅（Ùi原文改寫）
自治思想
陳添旺
1931.02, no. 551 (KCC, no. 60), pp. 15-16
追想”自治”激堯夠額通感激人的心內，永無boē記得的你。
所講”自治”毋是逐个分拆四散，就是加添結合出力。
親像本身”自治”是家己對責任，伊逐項的職務會安全。
親像家庭”自治”，彼个家堅固，各人會負責任，家主的擔就減輕，免得做掛慮，過頭來憂悶，閣再伊的功勞成到有剩，全家有福氣。
所以講：佇世間凡事攏通”自治”愛認明恩主。
國家”自治”內眾，外界攏通安心，就彼个國有長大、堅固、徛在的地基。親像台灣tuì田總督創設”自治”以來，內政、外法，日日換新改善，做百姓的自覺出力，掌政權的人可以寬心，安然自知，可恭可賀；攏有進步，大漢自報報國的地基。
今也設立聯盟”自治會”，是百姓連絡同體有”自治”精神歸榮光予個體到佇 天皇陛下。
南部中會tuì十年前就有人深感覺”自治”的必要，起頭tuì高雄區，後來就相續分做4 區，順續升格做4中會、一大會，實在內政、外治真濟無合份，失堪可敬重效法的先輩，來榮光基督，報恩佇母會。
耶穌講：我款待恁無用奴僕，是用朋友，因為奴僕毋知主人的心，是愛in有自覺”自治”的精神。
咱北部設教近60年，受著母會大疼惜幫贊毋是講oē盡，寫oē了，若得著同志自覺分區學行”自治”的志願，來表明60週年的記念毋真萬幸萬幸。
試預想分列，計21堂會，72會堂：─
-
羅東，宜蘭，雞籠3堂會，13位。
-
水返腳，色口，雙連，大稻程，三角埔，淡水6堂，16位。
-
新店，艋舺，三角湧，桃園，中壢，5堂會，12位。
-
新埔，新竹，苗栗，大甲，墩仔腳，5堂會，19位。
-
花蓮港，玉里，兩堂會，12位。
萬項是學--的，若會實行學行真幸福，上帝祝福會大叢，到時希望咱台灣有兩大會，soà會成一個最高的總會，chiah通講台灣教會成功。