陳熊的小傳
Tân Hîm ê Sió-toān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第544卷 |
| 日期 | 1930/7 |
| 頁數 | 20 |
白話字（原文數位化）
Tân Hîm ê Sió-toān
1930.07 tē 544 koàn p.20
Koà-chhài-chí tē 53 hō
Tân Hîm sī Chuí-tńg-kha Kàu-hoē ê Tiúⁿ-ló, 14 hè chiū tī Saⁿ-têng-po͘ tit-tio̍h tō-lí. āu-lâi tī Chuí-tn̂g-kha choè seng-lí, i ê lāu-pē m̄-chún i sìn tō-lí, soà khún-tio̍k i, pàng siaⁿ beh thâi sí i, nā lé-pài-ji̍t i ê pē khì pài-tn̂g sûn, nā khoàⁿ i tī-teh suî-sî kiò I tò-khì. I chiū kap Chan Un Tiúⁿ-ló chham-siông, Chan Tiúⁿ-ló an-uì i kóng, Siōng-tè ta̍k uī tī-teh, lí tī ta̍k uī thang ho̍k-sāi Siōng-tè.
Hoat-kok phah Tâi-oân ê sî, lé-pài-ji̍t beh khì lé-pài tú-tio̍h lâng chhiúⁿ pài-tn̂g, i chiū chhoā Chhoà Seng Thoân-tō cháu, ka-kī ê seng-lí tiàm lóng hō͘ lâng chhiúⁿ liáu-liáu, pháiⁿ-lâng chhut siúⁿ-keh, kia̍h chhèng sì-koè chhē, āu-lâi chiah cháu khì Tām-chuí, tī-hia choè sêng-lí, soà ji̍p Sîn-ha̍k, āu-lâi ū siū phài khì tiàm Lūn-á-téng, Tāi-lí-kán thoân-tō. Liáu-āu chiū hioh-khùn tī Chuí-tńg-kha choè seng-lí. I tī 1904 nî choè Chuí-tńg-kha Tiúⁿ-ló kàu taⁿ, chin jia̍t-sim tī kàu-hoē, gâu kan-chèng tō-lí, sui-jiân khah lāu ê sî ū tú-tio̍h choē-choē ê pháiⁿ kéng gū, iáu-kú bô sit-chì.
Pak-pō͘ Tiong-hoē sêng-li̍p ê sî, ū tam-tng Tiong-hoē ê Kì-sū. I ê seng-khu chin ióng-chòng, chin gâu ūn-tōng. Bô phah-sǹg tī 4 ge̍h 20 hō ū khí phoà-pīⁿ, āu-lâi ji̍p Má-kai I-īⁿ, tī 5 ge̍h 14 hō téng po͘ 5 tiám hō͘ Chú kéng-tiàu an-jiân kui-thian, hióng-siū 69 hè. Lé-pài- tn̂g kú-hêng chòng-sek, ū Soan-kàu-su, Ko͘-niû, Bo̍k-su, Thoân-tō kap hiaⁿ-tī chí-bē choē-choē lâi hù. I ū pang Tiúⁿ-ló-niû kap i 4 ê kiáⁿ, 4 ê cha-bó͘-kiáⁿ，kiû Chú an-uì i ê ka-cho̍k, koh hō͘ in oē o̍h i ê hó só͘ kiâⁿ. A-bēng.
漢羅（Ùi原文改寫）
陳熊的小傳
1930.07 第544卷 p.20
芥菜子第53號
陳熊是水返跤教會的長老，14歲就佇三重埔得著道理。後--來佇水返跤做生理，伊的老父毋准伊信道理，紲窘逐--伊，放聲欲刣死伊，若禮拜日伊的父去拜堂巡，若看伊佇--leh隨時叫倒--去。伊就佮曾溫長老參詳，曾長老安慰伊講，上帝逐位佇--leh，你佇逐位通服事上帝。
法國扑台灣的時，禮拜日欲去禮拜拄著人搶拜堂，伊就chhoā蔡昇傳道走，家己的生理店攏予人搶了了，歹人出賞格，攑銃四界chhoē,後--來才走去淡水，佇遐做生理，紲入神學，後--來有受派去踮崙仔頂、大里簡傳道。了後就歇睏佇水返跤做生理。伊佇1904年做水返跤長老到今，真熱心佇教會，gâu干證道理，雖然較老的時有拄著濟濟的歹境遇，猶過無失志。
北部中會成立的時，有擔當中會的記事。伊的身軀真勇壯，真gâu動。無扑算佇4月20 號有起破病，後--來入馬偕醫院，佇5月14號頂晡5點予主揀召安然歸天，享壽69歲。禮拜堂舉行葬式，有宣教師、姑娘、牧師、傳道佮兄弟姊妹濟濟來赴。伊有幫長老娘佮伊4个子、4个查某子，求主安慰伊的家族，閣予in 會學伊的好所行。A-bēng。