小傳詹長老
Sió-toān Chiam Tiúⁿ-ló
文獻資訊
| 項目 | 資料 |
|---|---|
| 作者 | 劉阿秀 Lâu A-siù |
| 卷期 | 台灣教會報 |
| 卷期 | 第538卷 |
| 日期 | 1930/1 |
| 頁數 | 20 |
白話字（原文數位化）
Sió-toān
Chiam Tiúⁿ-ló
1930 nî 1 goe̍h tē 538 koàn p.20
Koà-chhài-chí Te 47 hō
(Lâu A-siù)
Chiam A-hián sī Kong-koán-chng Kàu-hoē ê Tiúⁿ-ló. I tī Bêng-tī 12 nî 9 ge̍h 7 ji̍t chhut-sì; i ê chhut seng-toē sī Kong-koán-chng Sin-káng-liâu; 8 hè ê sî soá khì Pak-liâu khiā-khí, keng-êng lông-gia̍p lâi sêng-ka. I iáu-bē sìn Chú ê sî thàn sè-sio̍k, ho̍k-sāi sîn-bêng chin jia̍t-sim.
Tī 19 hè ê sî, tuì Chiong A-muí Thoân-tō thiaⁿ-tio̍h tō-lí, chiū pàng-sak sè-sio̍k lâi sìn Chú. Kàu i 24 hè, chiū-sī Bêng-tī 36 nî, ū siū Kong-koán-chng Kàu-hoē kéng i choè Chip-sū 6 nî kú; kàu 30 hè ê sî, chiū-sī Bêng-tī 42 nî, chiū siat-li̍p i choè Tiúⁿ-ló, 20 nî kú bô lī-jīm.
I ū nn̄g ê ta-po͘-kiáⁿ, nn̄g ê cha-bó͘-kiáⁿ. Toā-kiáⁿ Chiam Tek-kiàn, iáu tī Tâi-pak Sîn Ha̍k-hāu chāi-ha̍k tiong, 3 nî seng; tē-jī kiáⁿ teh pang-chān ke-lāi; soè-hàn ê cha-bó͘-kiáⁿ kin-nî 14 hè, iáu tī Kong-ha̍k-hāu pó͘-si̍p- kho tha̍k. I tī 11 ge̍h 10 ji̍t iáu khì Biâu-le̍k Kàu-hoē hù Tok-hoē, tī 13 ji̍t ē-po͘ 5 tiám hut-jiân tú-tio̍h náu chhut-hui ê pīⁿ, kàu 14 ji̍t téng-po͘ 11 tiám-poàⁿ chiū kè-óng, hióng-siū 50 hè. Tī 18 ji̍t ū chòng-sek, ū 7 uī Thoân-kàu-su lâi hoē-chòng, ū tiàu-tiān 20 goā thong, iā ū kuí-nā uī chiūⁿ tâi tiàu-sû.
Taⁿ ài siá kuí-nā hāng lâi siàu-liām i:
1.I sī khek-khûn khek-khiām ê lâng. Chá-khí sî chin chá chiū khí-lâi, lé-pài-ji̍t kap kong-ek ê sū ê í-goā, bô chi̍t sî êng; i chin-chiàⁿ gâu pó-sioh sî-kan.
-
I hó khoán-thāi chhut-goā lâng. Bô-lūn hn̄g-kūn, bô-lūn sím-mi̍h téng-hō ê lâng, nā kàu i ê ke, lóng it-lí hó khoán-thāi i.
-
I choan-siú lé-pài-ji̍t. Chiū-sī bô-lūn sím-mi̍h kín kang ê sî, nā lé-pài-ji̍t chiū lóng hioh-khùn lâi lé-pài; m̄-nā i ê ke-lāi ê lâng hioh-khùn nā-tiāⁿ, liân tn̂g-kang kap só͘ chhiàⁿ ê choè kang lâng iā lóng hioh-khùn bô choè kang.
-
I sī chin sêng-si̍t ê lâng. Kóng oē sī, chiū-sī; m̄-sī, chiū m̄-sī; só͘-í hoē-lāi, oē-goā hó miâ-siaⁿ, bô-lūn hoē-lāi hoē-goā ê lâng thiaⁿ-tio̍h i sí-khì, ta̍k lâng to kóng chin phah-sńg.
-
I chin chīn-tiong. I ū choè Chip-sū 6 nî, choè Tiúⁿ-ló 20 nî; i khoàⁿ Siōng-tè ê kok pí i ê ke khah iàu-kín, nā kàu-hoē ū sím-mi̍h tāi-chì, sui-jiân sī chin bô êng, iā hoaⁿ-hí pàng kang. I ū choè pó-chiàⁿ kuí-nā nî kú, tuì siā-hoē iā sī chīn gī-bū, thang kóng sī pè-hoē chi̍t ê bô͘-hoān-chiá. Taⁿ ka-têng sit chi̍t ê liông-hū, kàu-hoē sit chi̍t ki tòng-liông, boē bián-tit thòng-sim siong-pi
漢羅（Ùi原文改寫）
小傳
詹長老
1930年1月第538卷p.20
芥菜子第47號
(劉阿秀)
詹阿hián是公館庄教會的長老。伊佇明治12年9月7 日出世；伊的出生地是公館庄新港寮；8歲的時徙去北寮徛起，經營農業來成家。伊猶未信主的時趁世俗，服事神明真熱心。
佇 19歲的時，對鍾阿muí傳道聽著道理，就放sak世俗來信主。到伊24歲，就是明治36年，有受公館庄教會揀伊做執事6年久；到30歲的時，就是明治42年，就設立伊做長老，20年久無離任。
伊有2个查甫子，2个查某子。大子詹Tek-kiàn，猶佇台北神學校在學中，3 年生；第二子teh 幫贊家內；細漢的查某子今年14歲，猶佇公學校補習科讀。伊佇 11月10日猶去苗栗教會赴督會，佇 13日e 晡5點忽然拄著腦出血的病，到14日頂晡11點半就過往，享壽50歲。佇 18日有葬式，有7 位傳教師來會葬，有弔電20外通，也有幾若位上台弔詞。
今愛寫幾若項來數念--伊：
1.伊是克勤克儉的人。早起時真早就起--來，禮拜日佮公益的事以外，無1時閒；伊真正gâu寶惜時間。
2.伊好款待出外人。無論遠近，無論甚乜等號的人，若到伊的家，攏一理好款待--伊。
3.伊專守禮拜日。就是無論甚乜緊工的時，若禮拜日就攏歇睏來禮拜；毋若伊的家內的人歇睏nā-tiāⁿ，連長工佮所倩的做工人也攏歇睏無做工。
4.伊是真誠實的人。講話是就是，毋是就毋是；所以會內會外的人聽著伊死--去，逐人都講真扑損。
5.伊真盡忠。伊有做執事6年，做長老20年；伊看上帝的國比伊的家較要緊，若教會有甚乜代誌，雖然伊真無閒，也歡喜放工。伊有做保正幾若年久，對社會也是盡義務，通講是敝會1个模範者。今家庭失1个良父，教會失1枝棟樑，袂免得痛心傷悲。