批

Phoe

文獻資訊

項目	資料
作者	戴Ek-gî，戴仁理 Tè Ek-gî, Tè Jîn-lí
卷期	台灣教會報
卷期	第537卷
日期	1929/12
頁數	13

白話字（原文數位化）

Phoe

1929.12 537 koàn p.13

Koà-chhài-chí 46 hō

(Tè Ek-gî, Tè Jîn-lí)

[Chit tuiⁿ phoe sī Tè I-seng ê Lēng-chun kap Lēng-tông siá lâi kā Má-kai Pīⁿ-īⁿ ê hoān-chiá seh-siā--ê; taⁿ ài lo̍h tī chia, soà hō͘ lia̍t-uī chai hoān-chiá ê hó-ì].

Phoe kià hō͘ tiàm tī Tâi-oân só͘ thiàⁿ ê pêng-iú hiaⁿ-chí siu, pêng-an.

Lín ū kià nn̄g ki chin suí kim ê Si̍p- jī-kè lâi sàng goán, iā kā goán nn̄g lâng kiong-hō; goán kàu-ke̍k hoaⁿ-hí.

Chit nn̄g ki kim Si̍p-jī-kè, goán lia̍h- choè ke̍k pó-poè, iā sī thang sî-sî hián- bêng lín thiàⁿ-thàng ê Kì-liām-phín. Tuì chia thang chai, lín iû-goân ū teh thiàⁿ lán ê Chú Iâ-so͘ Ki-tok, chiū-sī hiàn-sin choè lán ke̍k-toā ê Kiù-chú. Taⁿ tio̍h ióng-kiāⁿ, iā tio̍h hó-táⁿ, in-uī Kiù-chú Iâ-so͘ sī lín chīn-tiong ê pêng-iú. Tio̍h kia̍h-ba̍k khoàⁿ Kiù-chú kóng, Chú Iâ- so͘ ah, goán to̍k-to̍k teh oá-khò Lí, chiū- sī toā kap pe̍h-pe̍h ê Kiù-chú; goán oá- khò Lí âng ê pó-huih lâi tit-tio̍h chheng-khì koh chiâⁿ sèng.

Siat-sú lín kiaⁿ, lín ê choē-koà hō͘ lín kap Sèng ê Siōng-tè saⁿ-lī, tio̍h hó-táⁿ, in-uī ū khui chi̍t káng ê pó-choâⁿ, thang lâi soé-chheng lín ê choē; iā tī Si̍p-jī-kè- kha, ū I i-tī ê só͘-chāi. Chhin-chhiūⁿ Sèng- si ū kóng, tī Si̍p-jī-kè-téng ū 5 ê siong-jiah:

Chiū-sī tī Kok-kok-thaⁿ só͘ siū--ê. Chiah ê siong thoè goá teh Kî-tó,

Bô m̄-sī ū kong-hāu ê Kî-tó, Chiū-sī thoè goá chhut-thâu ê Kî-tó.

Chiah ê siong ia̍h teh kóng, tio̍h sià- bián ah, tio̍h sià-bián.

ia̍h m̄-chún chi̍t-ê í-keng boē tò-tńg ê choē-jîn lâi sí-bô.

Chòng lín ê táⁿ, tī chia lín ū ke̍k-toā ê I-seng, iā ū ke̍k toā khuì-la̍t ê Pang- chō͘-chiá. Tio̍h kim-kim khoàⁿ I, soà kóng, Ki-tok ah ! goán to̍k-to̍k him-bō͘ Lí, goán só͘ khiàm-kheh--ê, tī Lí lāi-bīn ū chhē--tio̍h. Ki-tok ah ! Kiû Lí hû-chhî poa̍h-tó ê lâng, hû-chō͘ ià-lán ê lâng, i-tī ū pīⁿ ê ,iā kiû Lí tio̍h ín-chhoā chhiⁿ-mî--ê.

Goán nn̄g lâng ji̍t-ji̍t teh kî-tó siàu- liām lín; iā ū teh ǹg-bāng lín ê sin-thé chiām-chiām ná ióng-kiāⁿ. iā m̄-nā teh thoè lín kî-tó, chiū-sī goán nn̄g lâng ū koat-tēng beh khí chi̍t keng pīⁿ-sek tī Ngāu-san I-īⁿ, thang ha̍h tī 4 ê lâng ê lō͘-ēng, che sī beh nî-nî choè hoān-chiá ê lō͘-ēng. Kàu goán nā tò-khì kìⁿ Thiⁿ Pē liáu-āu, chit keng chhù thang choè goán ê Kì-liām-sek.

Taⁿ goán só͘ thiàⁿ, só͘ chun-kèng ê kiáⁿ kap sim-pū, nā tī goán nî-lāu koh loán- jio̍k ê sî, hoaⁿ-hí kap goán saⁿ-kap toà, khiok goán khah sóng-khoài. Chóng-sī in nn̄g lâng teh pang-chān lín, goán ê sim si̍t-chāi boán-chiok; só͘-í uī-tio̍h in nn̄g lâng goán kám-siā Thiⁿ Pē, iā kiû Siōng-tè, hō͘ in oē choè lín toā-toā ê lī- ek lâi hióng-hok.

ài koh kóng, goán lia̍h chit nn̄g ki Tâi-oân ê kim Si̍p-jī-kè choè kuì-khì ê sàng-phín; iā ài pò lín chai, goán sî-sî teh ǹg-bāng lín tit-tio̍h hok-khì. Tī lán ê Chú Iâ-so͘ ê kau-poê ê pêng-iú.

Tè Ek-gî,

Tè Jîn-lí.

漢羅（Ùi原文改寫）

批

1929.12 537卷 p.13

芥菜子46號

(戴Ek-gî，戴仁理)

「這張批是戴醫生的令尊佮令堂寫來共馬偕病院的患者說謝--的；今愛落佇遮，紲予列位知患者的好意。」

批寄予踮佇台灣所疼的朋友兄姊收，平安。

恁有寄2支真媠金的十字架來送阮，也共阮2人恭賀；阮到極歡喜。

這2支金十字架，阮掠做極寶貝，也是通時時顯明恁疼痛的紀念品。對遮通知，恁猶原有teh 疼咱的主耶穌基督，就是獻身做咱極大的救主。今著勇健，也著好膽，因為救主耶穌是恁盡忠的朋友。著舉目看救主講：「主耶穌--ah，阮獨獨teh倚靠你，就是大佮白白的救主；阮倚靠你紅的寶血來得著清氣閣成聖。」

設使恁驚，恁的罪過予恁佮聖的上帝相離，著好膽，因為有開一港的寶泉，通來洗清恁的罪；也佇十字架跤，有伊醫治的所在。親像聖詩有講，佇十字架頂有5个傷跡：

「就是佇各各他所受--的。遮的傷替我teh 祈禱，

無毋是有功效的祈禱，就是替我出頭的祈禱。

遮的傷亦teh 講，著赦免ah，著赦免。

亦毋准1个已經未倒轉的罪人來死無。」

壯恁的膽，佇遮恁有極大的醫生，也有極大氣力的幫助者。著金金看伊，紲講：「基督--ah！阮獨獨欣慕你，阮所欠缺--的，佇你內面有揣--著。基督ah！求你扶持跋倒的人，扶助厭懶的人，醫治有病--的，也求你著引chhoā青瞑--的。」

阮2人日日teh 祈禱數念恁；也有teh 向望恁的身體漸漸那勇健。也毋若teh替恁祈禱，就是阮2人有決定欲起1間病室佇樂山醫院，通合佇4个人的路用，這是欲年年做患者的路用。到阮若倒去見天父了後，這間厝通做阮的紀念室。

今阮所疼、所尊敬的子佮新婦，若佇阮年老閣軟弱的時，歡喜佮阮相佮蹛，卻阮較爽快。總--是in 2人teh 幫贊恁，阮的心實在滿足；所以為著in 2人阮感謝天父，也求上帝，予in會做恁大大的利益來享福。

愛閣講，阮掠這2支台灣的金十字架做貴氣的送品；也愛報恁知，阮時時teh向望恁得著福氣。佇咱的主耶穌的交陪的朋友。

戴Ek-gî，

戴仁理。