Gî Tiâu-chheng ê小傳
Gî Tiâu-chheng ê Sió-toān
文獻資訊
| 項目 | 資料 |
|---|---|
| 作者 | 卓Uí-sîn Toh Uí-sîn |
| 卷期 | 台灣教會報 |
| 卷期 | 第531卷 |
| 日期 | 1929/6 |
| 頁數 | 10 |
白話字（原文數位化）
Gî Tiâu-chheng ê Sió-toān
1929.06 531 koàn p.10
(Toh Uí-sîn)
Thoân-tō-su Gî Tiâu-chheng, i ê pún só͘-chāi tī Ko-hiông chiu Kî-san kūn Sam-nâ-chng Sin-chhù-á, i ê pē-bó chá-chá chiū koè-sin, sè-hàn ê sî lóng sī oá-khò i ê kong khan-kà. Hit-tia̍p Sin-chhù-á ū kàu-hoē tī-hia, i ê kong Gî Seng put-chí jia̍t-sim pài Siōng-tè, chiū peh-kàu hō͘ i lâi tha̍k Tiong-o̍h. āu-lâi tú-gū goá lâi tī Kau-phiâⁿ chò thoân-tō, goá ū siat chi̍t keng kàu-hoē ê sió-o̍h, hit-sî goá chiū chhiáⁿ i lâi kà sió-o̍h, só͘ keng-koè ê sêng-chek put-chí hó.
āu-lâi goán khoàⁿ i put-chí koan-sim ài chò kàu-hoē ê kang, só͘-í ū kí-chiàn i lâi tha̍k Sîn-ha̍k. I chut-gia̍p chiū khì toà tī Kau-phiâⁿ, Thâu-siā, Koan-á-niá, Tang-āu-liâu ê kàu-hoē. Tī kin-nî Thoân-tō-kio̍k ū phài i beh khì toà tī Kong-á-nâ ê kàu-hoē, i tī 4 goe̍h 14 ê lé-pài ū choán-jīm khì Kong-á-nâ. Koh koè lé-pài tò chhut-lâi beh siat-hoat i ê hêng-lí ji̍p-khì, bô phah-sǹg kàu Sin-hoà-ke, i chiū khí kip-sèng ê hì-iām, chia̍h io̍h bô hāu. Kàu 21 ji̍t chiū lī-khui sè-kan, kin-nî 37 hoè.
Lūn i toà kàu-hoē put-chí chīn-tiong chò kang iā sī chin oa̍h-tāng, bô-lūn toà sím-mi̍h kàu-hoē, m̄-bat thiaⁿ-kìⁿ kap lâng chhiong-tu̍t, tī siā-hoē put-chí pêng-hô, che iā sī chin thang khó-chhú.
Siāng khó-sioh thang thè i khoà-lū ê chiū-sī i hiān-sî ū 5 ê poàⁿ kiáⁿ, chiū sī chi̍t ê iáu boē chhut-sì, I ê kiáⁿ lóng iáu chin sè-hàn, thiaⁿ-kìⁿ i koè-sin, seng-khu-piⁿ lóng bô uî-sán.
Taⁿ Gî Sian-seⁿ-niû beh î-chhî hiah ê sè-kiáⁿ koè ji̍t, si̍t-chāi ū tn̂g-tn̂g ê khoà-lū. Toā ǹg-bāng lia̍t-uī saⁿ-thiàⁿ ê hó pêng-iú uī-tio̍h i ê ke-koàn lâi tàu tông-chêng, lâi thè i kî-tó Siōng-tè, che sī sim só͘ toā ǹg-bāng--ê.
漢羅（Ùi原文改寫）
虞朝清的小傳
1929.06 531卷 p.10
(卓Uí-sîn)
傳道師虞朝清，伊的本所在佇高雄州旗山郡杉林庄新厝仔，伊的父母早早就過身，細漢的時攏是倚靠伊的公牽教。彼霎新厝仔有教會佇遐，伊的公虞生不止熱心拜上帝，就peh-kàu予伊來讀中學。後來拄遇我來佇交坪做傳道，我有設1間教會的小學，彼時我就請伊來教小學，所經過的成積不止好。
後--來阮看伊不止關心愛做教會的工，所以有舉薦伊來讀神學。伊卒業就去蹛佇交坪、頭社、關仔嶺、東後寮的教會。佇今年傳道局有派伊欲去蹛佇岡仔林的教會，伊佇4月14 的禮拜有轉任去岡仔林。閣過禮拜倒出來欲設法伊的行李入去，無扑算到新化街，伊就起急性的肺炎，食藥無效。到21日就離開世間，今年37歲。
論伊蹛教會不止盡忠做工，也是真活動，無論蹛甚物教會，毋捌聽見佮人衝突，佇社會不止平和，這也是真通可取。
上可惜通替伊掛慮的就是伊現時有5个半子，就是1个猶未出世，伊的子攏猶真細漢，聽見伊過身，身軀邊攏無遺產。
今虞先生娘欲維持遐的細子過日，實在有長長的掛慮。大向望列位相疼的好朋友為著伊的家眷來鬥同情，來伊祈禱上帝，這是心所大向望--的。