故事
Kò͘-sū
文獻資訊
| 項目 | 資料 |
|---|---|
| 作者 | 周天來 Chiu Thian-lâi |
| 卷期 | 台灣教會報 |
| 卷期 | 第517卷 |
| 日期 | 1928/4 |
| 頁數 | 8-10 |
白話字（原文數位化）
Kò͘-sū
Sim-sim, Liām-liām
Chiu Thian-lâi
1928.04.01 517 Koàn p.8-10
(Chit phiⁿ bô-lūn toā-lâng, gín-ná lâi khoàⁿ lóng ē bêng).
Bat ū chi̍t pái tī bó͘ só͘-chāi, ū chi̍t ê Lú-o̍h ha̍k-seng kap i chi̍t ê sió-tī, nn̄g ê sio-chhoā chhut-mn̂g; chē hoé-chhia khì kàu Pîn-tong ê só͘-chāi chhoē i ê chhong-iú thit-thô. Hit-ji̍t in kàu Pîn-tong tú-tú 3 tiám poàⁿ, iā hit ê ha̍k seng ê chhong-iú ū lâi kàu chhia-thâu tán-chih in; tāi-ke kìⁿ-bīn chin hoaⁿ-hí, saⁿ-kap kóng-oē; chiū chhoā in kàu i ê chhù. Hit-àm chiū pān chhe-chhau chhiáⁿ in. Chia̍h-pá liáu thêng tiap-á-kú, in chiū chhut-khì mn̂g-kháu-tiâⁿ hioh-khùn; ū-sî chē--teh, ū-sî khí-lâi; kiâⁿ-lâi kiâⁿ-khì, kóng-tang kóng-sai kóng chin kú, sī in-uī thài-kú hán-tit sio-tú; iū-koh hioh-joa̍h ê sî-kan í-keng beh koè, tāi-ke saⁿ-chhoē chē; hiám-hiám chiū bô thang saⁿ-thàm ê ki-hoē, só͘-í tāi-ke tâm-oē chin-chē; kàu chin àm chiah bô koh hoē; tāi ke hoaⁿ-hí kàu-ke̍k, lóng-chóng chin sim-sek.
Í-keng 9 tiám poàⁿ lah, i ê chhong-iú chiū-sī tiàm tī Pîn-tong hit ê tâng-phoāⁿ, miâ-kiò Siù-jiông kóng, “Siù-jiông sàng, taⁿ lán lâi lé-pài thang khùn lah hòⁿ, lí to káⁿ chin siān leh?” Siù-jiông chiū kóng, “Bē ko̍h, goá ta̍k-ji̍t sim sim liām-liām, ài lâi chhoē lí thit-thô, taⁿ kin-á-ji̍t ū hó ki-hoē, goá khah kóng mā bē siān; sī í-keng chin àm lah, bô lán kiám m̄-sī ài koh kóng khah kú leh?” āu-lâi Siù-jiông kap in sió-tī miâ-kiò Bûn-hiông, chiū kap Gio̍k-ki í-ki̍p in ke-lāi ê lâng saⁿ-kap chò lé-pài. In teh lé-pài, tha̍k Sèng-chheh lûn-liû tha̍k, chi̍t lâng tha̍k chi̍t chat; Siù-jiông ê sió-tī Bûn-hiông iā kap lâng lûn-lâi lûn-khì. Gio̍k-ki ê lāu-bú khoàⁿ-kìⁿ Siù-jiông ê sió-tī iáu hiah-ni̍h sè-hàn liâm-piⁿ hiah gâu tha̍k Sèng-keng, siūⁿ-liáu chin kî-koài; kàu lé-pài soah chiū kiò i lâi, mn̄g khoàⁿ i kuí hoè, chiah chai-iáⁿ sī 12 hoè.
Bûn-hiông sī bó͘ kàu-hoē ê Chú-ji̍t-o̍h ha̍k-seng, 5 hoè ê sî chiū o̍h jī-bó, 7 hoè chiū ē hiáu tha̍k si, 10 hoè ê sî chiū í-keng chin gâu tha̍k Sèng-keng, chin gâu gîm-si; ta̍k-nî ê Kiù-chú-tàn lóng ū the̍h siúⁿ-phín, kū-nî ū siū-siúⁿ chi̍t-pún kim-kîⁿ ê Sin-iok Sèng-chheh; i ta̍k lé-pài lóng chiâu chhut-se̍k, só͘-í chiah hiah khoài chìn-pō͘; taⁿ í-keng sī ko-téng-kho ê ha̍k-seng lah; iā chìm-á muí lé-pài m̄-nā hù Chú-ji̍t-o̍h, iā ū kap toā-lâng chò-hoé lé-pài; gîm-si, thiaⁿ tō-lí, chin hoaⁿ-hí; ta̍k lé-pài kiâⁿ hn̄g-lō͘ bô hiâm ià-siān, ài kàu Siōng-tè ê sèng-tiān, khiam-pi seng siū kà-sī, thiaⁿ tō-lí chin chhù-bī, sim-koaⁿ chin kám-kek, si̍t-chāi ū hō͘ i tit-tio̍h chin toā ê lī-ek. Gio̍k-ki ê lāu-bó chiū tuì i ê a-ché kóng, “Lí ê sió-tī si̍t-chāi chin khiáu, chin khó-chhú, lóng sī tuì lí chin gâu kà-sī.” Siù-jiông kóng, “Bô-iáⁿ ah, pí i khah ē hiáu ê mā sī chin-chē leh!” Gio̍k-ki ê lāu-bó chiū koh kóng, “Si̍t-chāi chin gâu, án-ni to sǹg sī chin kám-sim lah!” āu-lâi kóng soah, in tāi-ke chiū lóng khì khùn.
Keh ji̍t chiū-sī pài-saⁿ, in chia̍h chá-tǹg liáu; Gio̍k-ki chiū chhoā i ê chhong-iú kap in sió-tī khì khoàⁿ chè-thn̂g hoē-siā, hui-hêng-ki-tiûⁿ hiah ê bêng-só͘. Ē po͘ ū hioh-khùn, iā 5 tiám poàⁿ chiū chia̍h ê-hng-tǹg, in-uī joa̍h-thiⁿ sî, só͘-í ji̍t-thâu iáu-boē lo̍h-soaⁿ; kàu 6 tiám in chiū sio-chhoā beh khì kong-hn̂g sàn-pō͘; iā in pêng-siông lóng chin ài tâm-lūn Sèng-keng-lāi ê kò͘-sū, í-ki̍p Iâ-so͘ ê kà-sī; só͘-í in tuì kong-hn̂g chhut-lâi ê sî, chiū ti̍t-ti̍t kiâⁿ tuì lông-tiûⁿ hit hong-bīn khì; sì-bīn ū chhân-hn̂g chháu-ba̍k chin-suí, iā liâng-hong bî-bî-á lâi chin chhio-chhìn; in ná kiâⁿ chiū ná tâm oē, taⁿ chiong in só͘ tâm-lūn ê kì tī ē-té:－
Gio̍k-ki, “Siù-jiông sang, lí khoàⁿ goán ê pài-tn̂g hiah toā keng hiah suí leh; lán tuì chiah hn̄g ê só͘-chāi iā iáu-kú khoàⁿ ē tio̍h, lí khoàⁿ hit ê thah hiah koân leh; téng-bīn ū chi̍t ki Si̍p-jī-kè, si̍t-chāi kiám m̄-sī chin chòng-giâm ê hoē-tn̂g mah?
Siù-jiông, “Ū-iáⁿ to tio̍h, si̍t-chāi khí-liáu chin hó khoàⁿ chin suí, bô-lūn sím-mi̍h goā-uī ê lâng tuì chia lâi, khoàⁿ-liáu liâm-piⁿ ē chai hit-keng chiū-sī pài-tn̂g; ē hō͘ sìn Chú ê lâng ê sim chin him-bō͘ ì-ài, sim-sim liām-liām ài ji̍p-kkhì khoàⁿ; iā tī-hia gîm-si, kî-tó, kám-siā Siōng-tè, lâi hióng-siū bû hān ê hok-khì.”
Gio̍k-ki, “Lí ē kì-tit lán tī Lú-o̍h, Lô͘ Ko͘-niû bat kóng, in hit pêng ê pài-tn̂g khí-liáu chin chhoàng, chin hó-khoàⁿ, kap pa̍t khoán ê chhù lóng ū hun-piat; hō͘ lâng tuì chin-hn̄g ê só͘-chāi lóng khoàⁿ ē tio̍h, iā ū toā-cheng hông-hun-àm ê sî nā kòng-cheng, hit ê siaⁿ thiaⁿ kàu chin hn̄g, hō͘ lâng ê sim-koaⁿ khui, ì-hiòng tuì hia khì; lí-khoàⁿ goán ê pài-tn̂g mā sī iû-goân ū toā-cheng, nā hông-hun-àm goá chhut-lâi sàn-pō͘ thiaⁿ liáu sim-koaⁿ chò chi̍t-ē khui ài koáⁿ-kín khì hù kî-tó-hoē.”
Siù-jiông, “Lán tī Lú-o̍h beh àm ê sî, lán chhut-khì chháu-po͘ kiâⁿ-iû, mā ū thiaⁿ-kìⁿ Sîn Ha̍k-hāu ê toā-cheng teh kòng, khong, khong, khong…… si̍t-chāi thiaⁿ-liáu hō͘ lâng ē kái sim būn; chai-iáⁿ sî-kan í-keng beh kàu, chiū-sī hō͘ lán thang khì Siōng-tè hoē-tn̂g, tī-hia hióng-siū, kî-kiû kám-siā ê hok-khì.”
Gio̍k-ki, “Si̍t-chāi hō͘ lán ê sim chin him-bō͘ ho͘N3: lán tí Lú o̍h tô͘ oē ê sî-kan, sian-siⁿ ū the̍h chi̍t tiuⁿ goā-kok ê ang-á-tô͘ chiū-sī oē nn̄g ê ang-á-bó͘ tī hn̂g--ni̍h teh chò-kang; kàu beh àm, hut-jiân thiaⁿ-tio̍h kàu-hoē ê toā-cheng teh kòng, in nn̄g lâng chiū pàng-kang siang-chhiú ha̍p-oá, thâu-khak chhih-chhih ǹg tuì kàu-hoē tn̂g hit bīn teh kî-tó ho͘N3; si̍t-chāi lán teh oē hit tiuⁿ tô͘ ê sî, lán ê sim kiám m̄-sī chin siū kám-kek mah?”
Siù-jiông, “Si̍t-chāi ū-iáⁿ to tio̍h, hō͘ lán ê sim chin him-bō͘, sim-sim liām-liām ài kàu Siōng-tè ê chhù.” In teh kóng ê sî hut-jiân Pîn-tong kàu-hoē ê cheng teh kòng, khong, khong, khong; Gio̍k-ki, ho͘N3, “Siù-jiông sàng, lí ū thiaⁿ-kìⁿ bô?” Siù-jiông, Hò͘--ah! Chin hó-thiaⁿ ê siaⁿ ū-iáⁿ, kin-á-ji̍t sī pài-saⁿ, só͘-í lán tio̍h kín-meh2 tò-tńg lâi-khì hù kî-tó-hoē.” Gio̍k-ki, “Taⁿ bô lán koáⁿ-kín tńg-lâi khì ko̍h.”
Só͘-í in chiū kín-me̍h tò-khì the̍h Sèng Si, Sèng-chheh khì hù Pîn-tong kàu-hoē ê kî-tó-hoē. In nn̄g-saⁿ lâng hit àm khì hù kî-tó-hoē, si̍t-chāi hō͘ in ê sim chin hoaⁿ-hí; m̄-nā chhong-iú ê chhù tāi-ke saⁿ-thàm, koh-khah iàu-kín in ū chin him-bō͘ ài kàu Siōng-tè ê chhù kap, kap hiaⁿ-tī chí-moē saⁿ kau-poê,, ná chhin-chhiūⁿ chi̍t ke ê lâng; si̍t-chāi in ê sim chin jia̍t, kàu-ke̍k hoaⁿ-hí ê khoán.
Kàu lé-pài-ji̍t ê sî, Gio̍k-ki ū chhoā i ê chhong-iú kap in sió-tī khì lé-pài , in chin chá chiū khì, sī ài thàm-khoàⁿ Chú-ji̍t-o̍h ê chōng-hóng sím-mi̍h khoán; in-uī in nn̄g lâng tī Lú-o̍h ê sî ta̍k lé-pài lóng ū teh pang-chān Chú-ji̍t-o̍h ê kang; hioh-khùn tńg-khì in chhù ê sî, iā ū tàu pang-chān Chú-ji̍t-o̍h; só͘-í in tuì sè-hàn gín-ná chám-jiân ū chhù-bī ê khoán. Só͘-í Gio̍k-ki ū chhoā i ê chhong-iú Siù-jiông, khì khoàⁿ Pîn-tong kàu-hoē ê Chú-ji̍t-o̍h, iā ū chiong i hioh-joa̍h-tiong teh kà hit pan hō͘ i kà; Siù-jiông bô the-sî hoaⁿ-hí kà, bô koh-iūⁿ i pêng-siông só͘ teh kà ê khoán, kap ha̍k-seng chin hó kóng-oē; iā chin gâu kóng kò͘-sū hō͘ in thiaⁿ; só͘-í hiah ê ha̍k-seng kàu soah ê sî, tī piⁿ-á tāi-ke teh hoē kóng, “Chit ê sian-siⁿ tuì tá-lo̍h lâi, hé chin gâu kóng--ah, goán chin ài thiaⁿ; beh oē thang ta̍k lé-pài lâi chò goán ê sian-siⁿ kiám m̄-sī chin hó.”
āu-lâi Chú-ji̍t-o̍h soah, in chiū chhoā khì hù toā-lâng ê lé-pài, hit-ji̍t chin hoaⁿ-hí, tńg-khì ná chhin-chhiūⁿ ū bē kóng--tit ê hoaⁿ-hí kap kám-kek tī in ê sim-lāi ê khoán. Keh chá-khí chiū-sī pài-it, Siù-jiông kap i ê sió-tī Bûn-hiông chiū kap i ê chhong-iú Gio̍k-ki saⁿ-sì tò-khì in ê pún só͘-chāi; ǹg-bāng koh bô loā-kú in beh koh tī Lú-o̍h lâi chò-hoé, chiū án-ni tāi-ke chiām-sî lī-pia̍t.
Lia̍t-uī hiaⁿ-tī chí-bē, í-ki̍p chèng Chú-ji̍t-o̍h ê ha̍k-seng, lán kiám m̄-sī chin ài khoàⁿ chit nn̄g, saⁿ lâng ê bô͘-iūⁿ; ; hoaⁿ-hí put-sî sim-sim liām-liām ài kàu Siōng-tè ê chhù mah? Lán chai lán lâng ê sim-sîn, jio̍k-thé, put-sî lóng ū khiàm-khoeh, só͘-í lán ê sim nā chin khiam-pi, chhin-chhiūⁿ sim-lāi chin sàn-hiong ài him-bō͘ Siōng-tè ê gī; ài thiaⁿ Bo̍k-su, Thoân-tō-su chhián-bêng Siōng-tè ê tō-lí, iúⁿ-chhī lán sim-sîn ê bí-niû tit-tio̍h chiâu-pī; kî-kiû, kám-siā, gîm-si, lán ê sim kiám bô chin hoaⁿ-hí; hióng-siū Siōng-tè só͘ siúⁿ-sù ê bû-hān ê hok-khì mah?
Iâ-so͘ tī sè-kan, tú chiah 12 hè ê sî, kap I ê pē-bú chiūⁿ Iâ-lō͘-sat-léng siú Poâⁿ-kè-choeh; tī tiān-ni̍h tuì I ê pē-bú kóng, “Kiám m̄-chai Goá eng-kai tī Goá ê Pē ê chhù mah?” (Lō͘-ka 2：49). Koh chi̍t pái, Iâ-so͘ iû-goân kàu Iâ-lō͘-sat-léng, ji̍p tiān, koáⁿ-chhut tiān-lāi bé-bē ê lâng, chhia-tó in só͘ ēng bé-bē ê khì-kū, lâi chheng-khì Sèng-tiān ê sî, iā bat kóng, “Kiám bô kì-chài kóng, Goá ê chhù beh chheng-choè bān-pang kî-tó ê chhù mah?” (Má-khó 11：17).
漢羅（Ùi原文改寫）
故事
心心，念念
周天來
1928.04.01 517卷p.8-10
(這篇無論大人，囡仔來看攏會明)。
捌有一擺佇某所在，有一個女學學生佮伊一个小弟，兩个相chhoā出門；坐火車去到屏東的所在揣伊的窗友thit-thô。彼日in到屏東拄拄3點半，也彼个學生的窗友有來到車頭等接in；大家見面真歡喜，相佮講話；就chhoā in到伊的厝。彼暗就辦腥臊請in。食飽了停霎仔久，in就出去門口埕歇睏；有時坐--teh，有時起來；行來行去，講東講西講真久，是因為太久罕得相拄；又閣歇熱的時間已經欲過，大家相揣坐；險險就無通相探的機會，所以大家談話真濟；到真暗才無閣hoē；大家歡喜到極，攏總真心適。
已經9點半lah，伊的窗友就是踮佇屏東彼个同伴，名叫秀絨講，「秀絨sàng，taⁿ咱來禮拜通睏lah hòⁿ，你to敢真僐leh？」秀絨就講，「袂ko̍h，我逐日心心念念，愛來揣你thit-thô，taⁿ今仔日有好機會，我較講嘛袂僐；是已經真暗lah，無咱kiám毋是愛閣講較久leh？」後來秀絨佮in小弟名叫文雄，就佮玉枝以及in家內的人相佮做禮拜。In teh禮拜，讀聖冊輪流讀，一人讀一節；秀絨的小弟文雄也佮人輪來輪去。玉枝的老母看見秀絨的小弟猶遐爾細漢連鞭hiah gâu讀聖經，想了真奇怪；到禮拜煞就叫伊來，問看伊幾歲，才知影是12歲。
文雄是某教會的主日學學生，5歲的時就學字母，7歲就會曉讀詩，10歲的時就已經真gâu讀聖經，真gâu吟詩；逐年的救主誕攏有the̍h賞品，舊年有受賞一本金墘的新約聖冊；伊逐禮拜攏chiâu出席，所以才hiah快進步；taⁿ已經是高等科的學生lah；也chím-á每禮拜毋但赴主日學，也有佮大人做伙禮拜；吟詩，聽道理，真歡喜；逐禮拜行遠路無嫌厭僐，愛到上帝的聖殿，謙卑先受教示，聽道理真趣味，心肝真感激，實在有予伊得著真大的利益。玉枝的老母就對伊的阿姊講，「你的小弟實在真巧，真可取，攏是對你真gâu教示。」秀絨講，「無影ah，比伊較會曉的嘛是真濟leh！」玉枝的老母就閣講，「實在真gâu，按呢to算是真感心lah！」後來講煞，in大家就攏去睏。
隔日就是拜三，in食早頓了；玉枝就chhoā伊的窗友佮in小弟去看製糖會社，飛行機場遐的名所。Ē晡有歇睏，也5點半就食的昏頓，因為熱天時，所以日頭猶未落山；到6點in就相chhoā欲去公園散步；也in平常攏真愛談論聖經內的故事，以及耶穌的教示；所以in對公園出來的時，就直直行對農場彼方面去；四面有田園草木真媠，也涼風微微仔來真chhio-chhìn；in 那行就那談話，taⁿ將in所談論的記佇下底：－
玉枝，「秀絨sang，你看阮的拜堂hiah大間hiah媠leh；咱對chiah遠的所在也iáu-kú看會著，你看彼个塔hiah懸leh；頂面有一支十字架，實在kiám毋是真莊嚴的會堂mah？
秀絨，「有影to著，實在起了真好看真媠，無論啥物外位的人對遮來，看了連鞭會知彼間就是拜堂；會予信主的人的心真欣慕意愛，心心念念愛入去看；也佇遐吟詩，祈禱，感謝上帝，來享受無限的福氣。」
玉枝，「你會記得咱佇女學，盧姑娘捌講，in彼爿的拜堂起了真chhoàng，真好看，佮別款的厝攏有分別；予人對真遠的所在攏看會著，也有大鐘黃昏暗的時若摃鐘，彼个聲聽到真遠，予人的心肝開，意向對遐去；你看阮的拜堂嘛是猶原有大鐘，若黃昏暗我出來散步聽了心肝做一下開愛趕緊去赴祈禱會。」
秀絨，「咱佇女學欲暗的時，咱出去草埔行遊，嘛有聽見神學校的大鐘teh摃，khong，khong，khong……實在聽了予人會解心悶；知影時間已經欲到，就是予咱通去上帝會堂，佇遐享受，祈求感謝的福氣。」
玉枝，「實在予咱的心真欣慕ho͘N3：咱佇女學圖畫的時間，先生有the̍h一張外國的 尪仔圖就是畫兩个翁仔某佇園裡teh做工；到欲暗忽然聽著教會的大鐘teh摃，in兩人就放工雙手合倚，頭殼chhih-chhih向對教會堂彼面teh祈禱好；實在咱teh畫彼張圖的時，咱的心kiám毋是真受感激mah？」
秀絨，「實在有影to著，予咱的心真欣慕，心心念念愛到上帝的厝。」In teh講的時忽然屏東教會的鐘teh摃，khong，khong，khong；玉枝，ho͘N3，「秀絨sàng，你有聽見無？」秀絨，Hò͘--ah！真好聽的聲有影，今仔日是拜三，所以咱著緊me̍h倒轉來去赴祈禱會。」玉枝，「Taⁿ無咱趕緊轉來去ko̍h。」
所以in就緊me̍h 倒去the̍h聖詩，聖冊去赴屏東教會的祈禱會。In兩三人彼暗去赴祈禱會，實在予in 的心真歡喜；毋但窗友的厝大家相探，閣較要緊in有真欣慕愛到上帝的厝佮，佮兄弟姊妹saⁿ交陪，那親像一家的人；實在in 的心真熱，到極歡喜的款。
到禮拜日的時，玉枝有chhoā伊的窗友佮in小弟去禮拜，in真早就去，是愛探看主日學的狀況啥物款；因為in兩人佇女學的時逐禮拜攏有teh幫贊主日學的工；歇睏轉去in厝的時，也有鬥幫贊主日學；所以in對細漢囡仔嶄然有趣味的款。所以玉枝有chhoā伊的窗友秀絨，去看屏東教會的主日學，也有將伊歇熱中teh教彼班予伊教；秀絨無推辭歡喜教，無閣樣伊平常所teh教的款，佮學生真好講話；也真gâu講故事予in聽；所以遐的學生到煞的時，佇邊仔大家teh hoē講，「這个先生對tá落來，hé真gâu講--ah，阮真愛聽；欲會通逐禮拜來做阮的先生kiám毋是真好。」
後來主日學煞，in就chhoā去赴大人的禮拜，彼日真歡喜，轉去那親像有袂講--得的歡喜佮感激佇in 的心內的款。隔早起就是拜一，秀絨佮伊的小弟文雄就佮伊的窗友玉枝相辭倒去in 的本所在；向望閣無偌久in欲閣佇女學來做伙，就按呢大家暫時離別。
列位兄弟姊妹，以及眾主日學的學生，咱kiám毋是真愛看這兩，三人的模樣；歡喜不時心心念念愛到上帝的厝mah？咱知咱人的心神，肉體，不時攏有欠缺，所以咱的心若真謙卑，親像心內真sàn-hiong愛欣慕上帝的義；愛聽牧師，傳傳道師闡明上帝的道理，養飼咱心神的米糧得著齊備；祈求，感謝，吟詩，咱的心kiám無真歡喜；享受上帝所賞賜的無限的福氣mah？
耶穌佇世間，拄才12歲的時，佮伊的父母上耶路撒冷守盤過節；佇殿裡對伊的父母講，「Kiám毋知我應該佇我的父的厝mah？」(路加2：49)。閣一擺，耶穌猶原到耶路撒冷，入殿，趕出殿內買賣的人，chhia倒in所用買賣的器具，來清氣聖殿的時，也捌講，「Kiám無記載講，我的厝欲稱做萬邦祈禱的厝mah？」(馬可11：17)。