世界第一大間的 Ho-the-lu (旅館)
Sè-kài Tē-it Toā-keng ê Ho-the-lu (Lú-koán)
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第517卷 |
| 日期 | 1928/4 |
| 頁數 | 18-19 |
白話字（原文數位化）
Sè-kài Tē-it Toā-keng ê Ho-the-lu (Lú-koán)
1928.04.01 517 Koàn (KOÀ-CHHÀI-CHÍ TĒ 26 Hō) p.18-19
Choè-kūn tī Bí-kok Si-ka-ko (Chicago) chhī ū khí chi̍t keng lú-koán kiò-choè Su-thê-bûn. Tē-siōng ū jī-cha̍p-gō͘ chàn, tē-hā ū sì chàn, pâng-keng ê sò͘ ū saⁿ-chheng keng, khí chit keng ê kiàn-tiok-huì, ū khai nn̄g-chheng chhit-pah-bān hut: (chiū-sī lán ê gō͘-chheng sì-pah bān gûn), hiān-sî sǹg sī tē-it toā-keng ê lú-koán. Siat-sú nā ū chi̍t lâng ta̍k-àm tiàm chi̍t keng pâng-keng, beh toà kàu chiah ê pâng-keng liáu, tio̍h ài poeh nî kú. Koh-chài chhit po-lê ê choè-kang lâng, ta̍k ji̍t choè poeh-tiám cheng kú ê kang, chhit hiah ê po-lê kàu chi̍t piàn chheng-chhó, iā tio̍h gō͘ ge̍h-ji̍t kú.
Lú-koán-lāi í-á ê chóng-sò͘ ū chhit-chheng tè; choan-sio̍k ê chū-tōng-chhia, gō͘-cha̍p chiah; toh-kun, cha̍p-saⁿ bān poeh-chheng tiâu; chia̍h-kun, ū saⁿ-cha̍p bān tiâu; poe, ū poeh-bān sì chheng tè; bīn-kun, gō͘-chheng táⁿ; chhu thô͘ kha ê chhio̍h, iân-tn̂g ū nn̄g phò͘ lō͘ ê hn̄g.
Tē-hā sek ū toā-keng ê thiàu-bú tiûⁿ, chi̍t sî oē iông-tit saⁿ-chheng lâng thiàu-bú, kî-û iáu ū la̍k-uī khah soè ê thiàu-bú ê só͘-chāi. Ū toā keng chiah-tn̂g hō͘ gō͘-chheng chi̍t-pah poeh-cha̍p-sì lâng siāng-sî lâi chia̍h. ia̍h ū saⁿ-bān nn̄g-chheng pêng-hong chhioh ê toā-keng thiaⁿ thang choè tián-lám-hoē ê hoē-tiûⁿ. Lú-koán-lāi ū tōng-bu̍t-hn̂g, ū put-chí choē tin-kî ê tōng-bu̍t tī-teh. Lâng-kheh só͘ chhoā-lâi ê tōng-bu̍t, iā ū siat-hoat pâng-keng hō͘ i thang hioh-khùn. Ū pī-pān chi̍t-bān pún ê chheh tī-teh; iā ū pīⁿ-īⁿ; iā ū gín-ná ê gō͘-lo̍k-sek.
Koh-chài chit keng lú-koán só͘ tē-it khoà-kháu ê chi̍t hāng, chiū-sī ū sè-kài tē-it toā ê “Tiān-oē ēng ê phoè-tiān-pán” nā lī-iōng chit-ê, chiū oē thàu kàu choân Bí-kok saⁿ-pah sì-cha̍p ê to͘-chhī ê soàⁿ, ēng saⁿ-chheng poeh-pah tiâu ê soàⁿ, ta̍k-ji̍t thèng kiò chhut chhit-bān nn̄g-chheng lâng; koh-chài lú-koán-lāi ê hoat-tiān-só͘ oē kiong-kip chi̍t-bān nn̄g-chheng ka-cho̍k só͘ tio̍h khiàm ēng ê tiān khì. uī-tio̍h “Loán-pông chong-tì” (Siat-pī hō͘ pâng-keng oē sio) kap tiān-le̍k chong-tì, ū pī-pān chhit ê hé-tiáⁿ. Muí-ji̍t chè-chhut saⁿ-chheng tùn ê peng. Chit keng lú-koán só͘ ēng ê lâng, bô êng ê sî, sī saⁿ-chheng lâng, nā khah êng, chiū nn̄g-chheng gō͘-pah lâng.
漢羅（Ùi原文改寫）
世界第一大間的 Ho-the-lu (旅館)
1928.04.01 517卷(芥菜子第26號) p.18-19
最近佇美國Si-ka-ko (Chicago)市有起一間旅館叫做Su-thê-bûn。地上有二十五層，地下有四層，房間的數有三千間，起這間的建築費，有開兩千七百萬hut：(就是咱的五千四百萬銀)，現時算是第一大間的旅館。設使若有一人逐暗踮一間房間，欲蹛到chiah 的房間了，著愛八年久。閣再擦玻璃的做工人，逐日做八點鐘久的工，擦遐的玻璃到一遍清楚，也著五月日久。
旅館內椅仔的總數有七千綴；專屬的自動車，五十隻；桌巾，十三萬八千條；食巾，有三十萬條；杯，有八萬四千綴；面巾，五千打；chhu塗跤的席，沿長有兩phò͘路的遠。
地下室有大間的跳舞場，一時會容得三千人跳舞，其餘猶有六位較細的跳舞的所在。有大間食堂予五千一百八十四人siāng時來食。ia̍h有三萬兩千平方呎的大間廳通做展覽會的會場。旅館內有動物園，有不止濟珍奇的動物佇teh。人客所chhoā來的動物，也有設法房間予伊通歇睏。有備辦一萬本的冊佇teh；也有病院；也有囡仔的娛樂室。
閣再這間旅館所第一khoà口的一項，就是有世界第一大的 「電話用的 配電板」若利用這个，就會透到全美國三百四十的都市的線，用三千八百條的線，逐日thèng叫出七萬兩千人；閣再旅館內的發電所會供給一萬兩千家族所著欠用的電器。為著「暖房裝置」(設備予房間會燒)佮電力裝置，有備辦七个火鼎。每日製出三千噸的冰。這間旅館所用的人，無閒的時，是三千人，若較閒，就兩千五百人。