真--ê，抑是假--ê？

Chin--ê, á-sī Ké--ê?

文獻資訊

項目	資料
作者	王守勇 Ông Siú-ióng
卷期	台灣教會報/芥菜子
卷期	第516卷
日期	1928/3
頁數	19-20

白話字（原文數位化）

Chin--ê, á-sī Ké--ê?

Ông Siú-ióng

1928.03.01 516 Koàn (KOÀ-CHHÀI-CHÍ TĒ 25 Hō) p.19-20

Tī Eng-kok ū chi̍t-ê siàu-liân thoân-tō sian-siⁿ, tuì Sîn-ha̍k-hāu tú chut-gia̍p bô joā-kú, siū-phài khì chi̍t ê só͘-chāi khiā pài-tn̂g, hit ê toē-hng sǹg-sī chi̍t ê soè-soè ê chng-thâu.

Chit ê siàu-liân thoân-tō chin jia̍t-sim, koh iáu-bē chhoā ke-āu, ia̍h chīn-sim chīn-la̍t teh thoân tō-lí. Sui-bóng sī toaⁿ-sin ê siàu-liân thoân-tō, m̄-kú chin hó phín-hēng, só͘-í hoē-lāi, hoē-goā ê lâng chin chun-kèng--i.

I só͘ tiàm ê só͘-chāi chiàu téng-bīn só͘-kóng sǹg-sī soè-soè ê hiuⁿ-chng, m̄-kú sìn-chiá ia̍h sī boē chió, chóng-sī bē sìn tō-lí ê lâng iáu put-chí choē, só͘-í i chiū siūⁿ chi̍t ê hoat-tō͘, tek-khak beh ín-chhoā thong hiuⁿ-siā ê lâng lâi sìn Chú. uī-tio̍h án-ni, ta̍k-ji̍t chhut-mn̂g lâi hóng-mn̄g hoē-lāi kap hoē-goā ê hiaⁿ-ché. Tuì chng-thâu kàu chng-bé, ta̍k-ji̍t hóng-mn̄g 5 kháu-chàu, bô-lūn sī sìn-chiá á m̄-sī, i lóng khì kóng tō-lí hō͘ in thiaⁿ, chio in tio̍h lâi pài Siōng-tè. án-ni chi̍t nî ê tiong-kan thong hit ê hiuⁿ-siā ê lâng lóng ū thiaⁿ-tio̍h tō-lí.

I tiàm chit ê só͘-chāi thoân tō-lí saⁿ-nî kú, só͘ í chì-chió ta̍k-kháu-chàu ū thiaⁿ-tio̍h i saⁿ-sì pái ê tō-lí. Si̍t-chāi sī chin thang khó-chhú, chīn-tiong hó ê bo̍k-chiá lah! M̄-kú to̍k-to̍k chi̍t-kháu-chàu sûn bô tio̍h, khak-si̍t m̄-sī sûn bô tio̍h, sī thiau-kò͘-ì m̄ khì thàm, chiū-sī m̄-káⁿ khì thàm. Sím-mi̍h in-toaⁿ? Chiū-sī thàn-chia̍h cha-bó͘ ê chhù. Chit ke tī chia khui thàn-chia̍h-keng, lāi-bīn ū chi̍t ê chin suí ê cha-bó͘ gín-ná tī-teh thàn, só͘-í chit ê siàu-liân thoân-tō kiaⁿ-iáu bak pháiⁿ-miâ kap hō͘ lâng gō͘-kái, sī kiaⁿ hō͘ lâng hiâm, só͘-í saⁿ-nî kú lóng m̄-káⁿ khì thàm in, ia̍h m̄-káⁿ khì kóng tō lí hō͘ in thiaⁿ. Tī chit ê hiuⁿ-siā ta̍k-ke ta̍k-kháu i lóng ū khì thàm, to̍k-to̍k chit ke-kháu bô khì nā-tiāⁿ. Che sī uī tio̍h i siàu-liân koh iáu-bē chhoā ke āu ê in-toaⁿ, kiaⁿ-liáu sit-lo̍h i ê chu-keh.

Chóng-sī ū chi̍t-ji̍t chit ê thàn chia̍h cha-bó͘ gín-ná khì lé-pài thiaⁿ tō-lí. Hit sî chit ê thoân to tú teh soat-kàu chin soah-phah, kóng kàu tin-tin iú-bī, koh kóng, “Tio̍h thiàⁿ lâng, tio̍h pêng-téng khoán-thāi lâng, m̄-thang ēng goā-phê lâi khoàⁿ lâng. Chú Iâ-so͘ lo̍h-lâi sè-kan sī beh kiù ū choē ê lâng…”. Thèng-hāu kóng tō-lí soah ê sî, chit ê hū jîn-lâng kiâⁿ-oá khì tâi-á chêng kóng, “Sian-siⁿ ah, chhiáⁿ lí tio̍h lâi thàm goá, thang kóng tō-lí hō͘ goá thiaⁿ.” Taⁿ chit ê thoân-tō m̄-káⁿ the-sî kóng, m̄, só͘-í ìn i kóng, hó, āu-lâi beh khì thàm i.

āu-lâi chit ê thoân-tō chiū khì thàm i, chóng-sī hit ê cha-bó͘ gín-ná put-chí bô hoaⁿ-hí, kóng, “Sian-siⁿ ah! Lí só͘ kóng ê tō-lí sī chin-ê mah?” I ìn, kóng, chiàⁿ-sī--lah!” Koh mn̄g i, kóng, “Lí sī Iâ-so͘ ê ha̍k-seng mah?” ìn kóng, “Sī ā chi̍t-ê m̄-sī.” Hit ê cha-bó͘ ìn i, kóng, “Goá siūⁿ lí nā-sī Iâ-so͘ ê ha̍k-seng, chiū lí ê tō-lí sī ké--ê, koh lí ê tō-lí nā-sī ké--ê, chiū lí m̄-sī Iâ-so͘ ê ha̍k-seng. In-uī lí kóng, Iâ-so͘ lâi sè-kan sī beh kiù ū choē ê lâng, m̄-sī beh chio Gī ê lâng. Chit ê tō-lí nā-sī chin--ê, lí ê lâng chiū-sī ké--ê, Tuì lí lâi chit ê só͘-chāi liáu-āu, lí lóng sī teh thoân tō-lí hō͘ hó-lâng thiaⁿ, m̄-sī beh thoân hō͘ ū choē ê lâng thiaⁿ. In-uī tī chit ê hiuⁿ-siā sím-mi̍h lâng tē-it pháiⁿ, tē-it tāng choē lí chai mah? Kiám m̄-sī goá mah? Iâ-so͘ ê tō-lí nā-sī chin--ê, tī chit ê só͘-chāi tē-it tio̍h tāi-seng kiù ê lâng kiám m̄-sī goá -mah? Lí lâi chit ê só͘-chāi saⁿ-nî kú, lóng m̄-bat lâi thàm goá poàⁿ-pái, che sī cháiⁿ-iūⁿ ah?” Kóng kàu án-ni, chit ê thoân-tō soà bô oē thang ìn, kan-ta kiû sià-choē nā-tiāⁿ. I ka-kī siūⁿ si̍t-chāi tuì Iâ-so͘ bô chīn-tiong, chóng-sī i kan-chèng i só͘ kóng ê tō-lí sī chin--ê, só͘-í chhiáⁿ i tek-khak tio̍h sìn Iâ-so͘.

Tuì keng-kè chit chân sū liáu-āu, hō͘ chit ê thoân-tō ke tit-tio̍h chi̍t hāng ê toā kà-sī, chiū-sī chin-si̍t choè Chú ha̍k-seng ê lâng, tek-khak tio̍h hó-táⁿ thàn Chú ê kà-sī khì kiâⁿ, sim-koaⁿ nā-sī sì-chiàⁿ tek-khak m̄-bián kiaⁿ lâng giâu-gî, chhin-chhiūⁿ Iâ-so͘ tng-sî ia̍h bat kóng tō-lí hō͘ pháiⁿ ê hū-jîn-lâng thiaⁿ, chiū-sī uī-tio̍h beh chín-kiù hit ê Sat-má-lī-a ê hū-jîn-lâng, I lóng boē kì-tit pak-tó͘ iau ê tāi-chì. Só͘-í choè I ê ha̍k-seng ê lâng, cháiⁿ-iūⁿ bô o̍h I só͘ kiâⁿ ê lâng oē-tit thang siū chheng-choè I chīn-tiong ê ha̍k-seng mah?

Taⁿ lūn chit ê siàu-liân thoân-tō só͘ sit-pāi ê khoat-tiám, ū thang choè lán hiān-sî teh choè Chú ê ha̍k-seng ê lâng, kap teh uī Chú choè kang ê thoân-kàu-chiá tāi-ke ê kàm-kài. Chiū-sī choè thoân-kàu ê lâng koat-toàn m̄-thang khoàⁿ-khin lâi hun-piat lâng, ta̍k-hāng tio̍h ēng kong-pîⁿ lâi khoán-thāi lâng, chiah bián hō͘ lâng āu-lâi ū phoe-phêng ê só͘-chāi, che sī choè tē-it toā iàu-kín.

Chhiáⁿ khoàⁿ tng-sî Iâ-so͘ tī lō͘-ni̍h ū chi̍t ê chhiⁿ-mî ê lâng toā-siaⁿ teh kiû Iâ-so͘ ê lîn-bín ê sî, sui-bóng chèng-lâng khoàⁿ-khin m̄ chhap--i, chóng-sī Iâ-so͘ bô khoàⁿ-khin i, tian-tò uī-tio̍h i thêng-kha lâi ún-chún i ê só͘-kiû, chóng-sī kin-ná-ji̍t teh thoân tō-lí ê lâng tio̍h bong sim-koaⁿ ka-kī mn̄g, khoàⁿ lán ū Iâ-so͘ hit khoán thiàⁿ lâng ê sim, bô? chiū-sī sui-bóng siū chèng-lâng só͘ biáu-sī khoàⁿ-khin hit khoán sàn-hiong á-sī bô tē-uī ê lâng, lán ū teh tì-ì in ê lêng-hûn á bô? Nā-sī lán pêng-sò͘ m̄ bat siūⁿ chit khoán būn-tê, chiū tio̍h kín-kín o̍h chhin-chhiūⁿ hit ê siàu-liân ê thoân-tō-su lâi hoán-hoé koé-oāⁿ hong-chiam, chiah ǹg-bāng m̄-bián ko͘-hū-tio̍h Chú só͘ kau-tāi lán chit ê sîn-sèng ê chit.