現代但以理
Hiān-tāi Tàn-í-lí
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第516卷 |
| 日期 | 1928/3 |
| 頁數 | 8 |
白話字（原文數位化）
Hiān-tāi Tàn-í-lí
1928.03.01 516 Koàn p.8
I ēng àn-choáⁿ lâi khiā tī sai ê tiong-kan? (Ū chit ê hiaⁿ-tī ê hui-siông ê thiàⁿ-thàng).
M̄-nā Tàn-í-Ií toà sai-hia̍t koè mê nā-tiāⁿ, tī bô kuí-nî chêng, iā ū chi̍t ê chám-jiân ióng-kám ê gín-ná ji̍p tī sai-hia̍t. Chit ê sū āu-lâi ū lâng kā Hián-lí tiān-hā kóng. Chit ê sū chiū-sī：－
Tī 1917 nî, ū chi̍t ê cha-bó͘ gín-ná miâ Í-sū-ta̍t (Esta Garcia), chhut-sì kha chiū phoà-siùⁿ. I ū chi̍t ê sin-chiūⁿ ê hiaⁿ, miâ Au-hut-lia̍t (Alfred) chin thiàⁿ i, iā ǹg-bāng i chit ê sió-moē bô loā-kú ē kap i thit-thò. Nā-sī chiām-chiām chai chit ê nńg-chiáⁿ sè-hàn ê Í-sū-ta̍t tek-khak liân kiâⁿ to bē.
Chit ê gín-ná lîn-bín ê sim, jú toā-hàn jú chhim, iā chīn i só͘-ē teh chò, beh hō͘ chit-ê phoà-siùⁿ ê seng-gâi khah hēng-hok. Nā-sī hit-sî ū chi̍t ê ki-hoē, chiàu khoàⁿ ē-thang hō͘ chit-ê cha-bó͘ gín-ná tit-tio̍h táⁿ-tia̍p.
Au-hut-lia̍t 12 hoè teh chò kip-sū lâi teh tō͘-oa̍h ê sî, ū chi̍t pái thiaⁿ-kìⁿ chhī-sai ê lâng kóng, Nā ū lâng káⁿ ji̍p i ê sai ê tû-lāi, beh 50 pōng (500 kho͘) siúⁿ lâng, sī in-uī bô lâng káⁿ ji̍p-khì. Hit-tia̍p chit-ê khiok-má-tiûⁿ oāⁿ lâi tī Sê-iá (Sheffield). Au-hut-lia̍t chiū chhut-goā khì hia, iā ióng-kám chiū ji̍p-khì sai-tû-lāi, chóng-sī iā bô siū hiah ê ok-béng ê siù siong-hāi. Só͘-í i chiū tit-tio̍h 50 pōng (500 kho͘) ê chhiú-hêng. iā i chiū ti̍t-thàu khì Ha-lia̍t-teng (Harley Street) chiū-sī tī Lûn-tun ê chhut-miâ i-seng ê ke. Chiong chiah ê chîⁿ beh lâi phèng-chhiáⁿ i-seng khì táⁿ-tia̍p in sió-moē.
Ū chi̍t ê chin gâu ê choan-bûn-ka, thiaⁿ-tio̍h chit ê Au-hut-lia̍t ê sū-chêng, chiū iok beh i in chit-ê phoà-siùⁿ ê sió-moē, chóng-sī tek-khak m̄ siu i chit 50 pōng. Gâu ê i-seng khah-siông chhin-chhiūⁿ án-ni, che chiū-sī in chong-kàu sim ê khoán; iā àm-chīⁿ chhiáⁿ chit ê gín-ná, jiân-āu hit ê i-seng chiū thè i siat-hoat, kiò in sió-moē tio̍h khì ji̍p Ông-li̍p ê Kî-hêng pēⁿ-īⁿ, tī-hia tit-tio̍h chiâu-chn̂g ê táⁿ-tia̍p. iā Au-hut-lia̍t chiū tiāⁿ-tio̍h ì-sù chiong hit 50 pōng the̍h hō͘ hit keng pēⁿ-īⁿ, kiò in tek-khak tio̍h siu.
Chit-ê sī iok 5 nî chêng ê sū, iā Í-sū-ta̍t chū hit-tia̍p chiū toà hia. Au-hut-lia̍t bē bián-tit ū-sî sim-koaⁿ giâu-gî i tī sai-hia̍t só͘ chò ê mō͘-hiám lóng kui khang-khang; chóng-sī kiat-kio̍k kho-ha̍k sī khah-iâⁿ pēⁿ-thiàⁿ. Hián-lí tiān-hā khì thàm i ê pēⁿ-sek ê sî, i ū kiâⁿ chhut-lâi kap i biān-hoē.
Ah! Au-hut-lia̍t ê bōng-sióng, kin-ná-ji̍t si̍t-hiān. Lán ài soà kā i kiong-hí, iā soà kiû ǹg-bāng siū toā tì-ìm ê I-sū-ta̍t ē tit-tio̍h hok-khì chiah tn̂g hoè-siū.
漢羅（Ùi原文改寫）
現代但以理
1928.03.01 516卷p.8
伊用按怎來徛佇獅的中間？(有這个兄弟的非常的疼痛)。
毋但但以理蹛獅穴過暝nā-tiāⁿ，佇無幾年前，也有一個嶄然勇敢的囡仔入佇獅穴。這个事後來有人共Hián-lí殿下講。這个事就是：－
佇1917年，有一個查某囡仔名Í-sū-ta̍t (Esta Garcia)，出世跤就破相。伊有一个身上的兄，名Au-hut-lia̍t (Alfred)真疼伊，也向望伊這个小妹無偌久會佮伊thit-thò。若是漸漸知這个軟汫細漢的 Í-sū-ta̍t的確連行to袂。
這个囡仔憐憫的心，愈大漢愈深，也盡伊所會teh做，欲予這个破相的生涯較幸福。若是彼時有一個機會，照看會通予這个查某囡仔得著打揲。
Au-hut-lia̍t 12歲teh做給仕來teh度活的時，有一擺聽見飼獅的人講，若有人敢入伊的獅的櫥內，欲50 pōng (500箍) 賞人，是因為無人敢入去。彼tia̍p這个khiok-má場換來佇Sê-iá (Sheffield)。Au-hut-lia̍t就出外去遐，也勇敢就入去獅櫥內，總是也無受遐的惡猛的獸傷害。所以伊就得著50 pōng (500箍) 的手形。也伊就直透去Ha-lia̍t-teng (Harley Street)就是佇倫敦的出名醫生的家。將chiah 的錢欲來聘請醫生去打揲in小妹。
有一個真gâu 的專門家，聽著這个Au-hut-lia̍t 的事情，就約欲伊in這个破相的小妹，總是的確毋收伊這50 pōng。Gâu 的醫生較常親像按呢，這就是in宗教心的款；也暗靜請這个囡仔，然後彼个醫生就替伊設法，叫in小妹著去入王立的畸形病院，佇遐得著齊全的打揲。也Au-hut-lia̍t就定著意思將彼50 pōng the̍h予彼間病院，叫in的確著收。
這个是約5年前的事，也Í-sū-ta̍t自彼tia̍p就蹛遐。Au-hut-lia̍t袂免得有時心肝僥疑伊佇獅穴所做的冒險攏歸空空；總是結局科學是較贏病疼。Hián-lí殿下去探伊的 病室的時，伊有行出來佮伊面會。
Ah！Au-hut-lia̍t 的夢想，今仔日實現。咱愛紲共伊恭喜，也紲求向望受大致蔭的 Í-sū-ta̍t會得著福氣才長歲壽。