耶路撒冷地動
Iâ-lō͘-sat-léng toē-tāng
文獻資訊
| 項目 | 資料 |
|---|---|
| 作者 | 偕叡廉 Kai Jōe-liâm |
| 卷期 | 芥菜子 |
| 卷期 | 第 22 號 |
| 日期 | 1927/11 |
| 頁數 | 6-7 |
白話字（原文數位化）
Iâ-lō͘-sat-léng toē-tāng
Chit pang tī Iâ-lō͘-sat-léng ū tú-tio̍h toā toē-tāng, toē-hng ê peh-sìⁿ put-chí chhiⁿ-chhám, sí-sit ê lâng ū 600 goā ê, tio̍h-siong ê ū 3000 goā. Toē-tāng hit sî thong Iû-thài kok lóng iô-choah. Iâ-lō͘-sat-léng ê peh-sìⁿ tio̍h-kiaⁿ lóng cháu chhut siâⁿ-goā. Cháu boē lī ê lâng chin choē hō͘ chhù teh sí. Sàn-hiong lâng m̄-kam pàng-sak in ê mi̍h, beh koh khì chhù-ni̍h the̍h mi̍h, choē-choē uī-tio̍h án-ni lâi sit-lo̍h in ê sìⁿ-miā. Chhù iā tó-hoāi chin choē. Tē-it siong-tiōng chiū-sī Iû-thài lâng ê Tāi-ha̍k, Chóng-tok ê siok-sià, kap Hoe-hoe-kàu ê toā Keng-tiān, hō-choè, Mosque of Omar. Chit keng tiān chiū-sī khí tī chāi-chá Só-lô-bûn só͘ khí hit keng tiān ê só͘-chāi, só͘-í thang kóng sī Iâ-lō͘-sat-léng chhut-miâ ê kó͘-chek. Beh koh siu-lí chit keng tiān, tāi-iok tio̍h koh khai chhut chi̍t pah bān gûn.
Kūn tī Iâ-lō͘-sat-léng iáu ū choē-choē só͘-chāi tú-tio̍h toā sún-hoāi. Tī Iok-phàⁿ kap Ka-ná-soaⁿ ê hiuⁿ-chng chhù iā tó-hoāi put-chí choē. Kūn-oá Iok-tàn-hô toē toā tín-tāng. Tī hô-kiⁿ kuí-nā só͘-chāi ū pang, toā-chio̍h tuì soaⁿ-ni̍h lìn lo̍h-lâi that-ba̍t khoe, chuí siau boē lī, ū só͘-chāi im chin koân.
Tī Iok-tàn-hô ê tang-pêng chiū-sī Mô͘-ap. Chit só͘-chāi Kū-iok Sèng-keng siông-siông bat kóng-khí. Mó͘-ap kap Sí-hái ê hù-kūn toē hui-siông tāng, tì-kàu ū kuí-nā só͘-chāi toē li̍h-khì, iā tuì thô͘-toé ū chhut sio-chuí kap jiû-n̂g.
Iâ-lī-ko siâⁿ iû-goân ū tú-tio̍h. Ū saⁿ ê chhut-goā lâng, tiàm tī chi̍t keng toā keng lú-koán, chhù tó, saⁿ lâng lóng teh sí.
漢羅（Ùi原文改寫）
耶路撒冷地動
這pang佇耶路撒冷有拄著大地動，地方的百姓不止淒慘，死失的人有600外的，著傷的有3000外。地動彼時通猶太國攏搖choah。耶路撒冷的百姓著驚攏走出城外。走袂lī的人真濟予厝teh死。散鄉人毋甘放拺in 的物，欲閣去厝裡the̍h物，濟濟為著按呢來失落in的性命。厝也倒壞真濟。第一傷重就是猶太人的大學，總督的宿舍佮回回教的大宮殿，號做，Mosque of Omar。這間殿就是起佇在早Só-lô-bûn所起彼間殿的所在，所以通講是耶路撒冷出名的古蹟。欲閣修理這間殿，大約著閣開出一百萬銀。
近佇耶路撒冷猶有濟濟所在拄著大損壞。佇Iok-phàⁿ佮Ka-ná山的鄉庄厝也倒壞不止濟。近倚約旦河地大振動。佇河kiⁿ幾若所在有崩，大石對山裡lìn落來塞密溪，水消袂lī，有所在im真懸。
佇約旦河的東爿就是Mô͘-ap。這所在舊約聖經常常捌講起。Mó͘-ap佮死海的附近地非常重，致到有幾若所在地裂去，也對土底有出燒水佮琉磺。
耶利哥城猶原有拄著。有三个出外人，tiàm佇一間大間旅館，厝倒，三人攏teh死。