約翰對基督的天職觀
Iok-hān tuì Ki-tok ê Thian-chit koan
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 芥菜子 |
| 卷期 | 第 22 號 |
| 日期 | 1927/11 |
| 頁數 | 2-3 |
白話字（原文數位化）
Iok-hān tuì Ki-tok ê Thian-chit koan
Chit ê Iok-hān sī Iâ-so͘ só͘ thiàⁿ-thàng ê ha̍k-seng, siông-siông tī Iâ-so͘ ê sin-piⁿ, put-chí bat Iâ-so͘ ê tāi-chì. I kóng, ‘Chit ê tō chiâⁿ lâng ê sin-khu,’ chiū-sī chí-khí Ki-tok. I só͘ tam-tng ê chek-jīm, chiū-sī ji̍p sè-kan ê sú-bēng, tuì pún-chit siōng lâi kóng, sī Siōng-tè ê hián-hiān chiá, tuì uī-keh siōng lâi kóng, sī Siōng-tè ê to̍k-siⁿ kiáⁿ. Iok-hān ài chiong Ki-tok choè jîn-luī kap Siōng-tè ê tiong-kan só͘ chīn ê thian-chit, tuī 3 hong-bīn ê koan-chhat tiong lâi oân-choân kóng bêng hō͘ lâng thang kek-khí tuì Ki-tok ê koan-liām, oē chin-chhiat. Taⁿ Ki-tok ê thian-chit, chiàu Iok-hān só͘ khoàⁿ sī sím-mi̍h khoán, pâi-lia̍t 3 hāng tī ē-toé.
- Sī Siōng-tè ê Iûⁿ-ko:
Jîn-luī ê choē-ok, boē-oē ún-khn̄g, Siōng-tè ê kong-gī iā m̄-thang hoè-tû. Kó͘-tāi ēng hi-seng ê chè-lé, sī ū piáu Ki-tok kiù-sio̍k ê un, só͘-í Ki-tok tam-tng Siōng-tè ê sú-bēng, lâi chiâⁿ jio̍k-thé kàu chit sè-kan, sī beh tam-tng sè-jîn ê choē-gia̍t, lâi chiâⁿ Siōng-tè Iûⁿ-ko ê chit-bū, chit ê chiū-sī Sîn jîn kan tiong-pó ê chek-jīm, tī Iok-hān ê Ki-tok koan tiong, sī jīn-tēng Ki-tok tī Si̍p-jī-kè só͘ hiàn ê hi-seng chè-sū, sī oân-choân sêng-kong ê thian-chit.
- Sī só͘ èng-ún ê Bí-sài-a:
Bí-sài-a ê kái-sek, tī chá-nî ê chong-kàu siōng, í-keng ū tiāⁿ-tio̍h ê koan-liām, chóng-sī Iok-hān só͘ ū ê kiàn-sek, iâⁿ-kè Kū-iok sèng-keng tiong chá-sī sian-ti kap chèng-lâng só͘ hi-bōng ê Bí-sài-a. Chá Iû-thài ê tù-chok-ka, tuì Bí-sài-a ê hi-bōng bô bêng, soà éng-hióng tong-sî Bí-sài-a ê koan-liām chiá. Só͘-í ū lâng jīn Iâ-so͘ choè sian-ti, ū ê bián-kióng Iâ-so͘ choè-ông, si̍t-chāi chin ê Bí-sài-a, sī Iâ-so͘ Ki-tok.
- Sī Sè-kan lâng ê Kiù-chú:
Sè-kan lâng ài jīn-bat Siōng-tè ê hong-hoat, chū-jiân sī oá-khò Ki-tok choè muî-kài, tī Ki-tok ê lāi-bīn, lán lâng thang kui-chek kàu Siōng-tè ê ì-chì, kap sèng-tek, iā thang liáu-kái kàu Siōng-tè oân-choân ê thiàⁿ-thàng, chit ê thiàⁿ tī Ki-tok só͘ sêng-choân Kiù-sio̍k ê kong-lô, oân-choân piáu-hiān. Iok-hān tī Hok-im-su ū kóng chin bêng. I kóng Siōng-tè thiàⁿ sè-kan lâng, chiong I to̍k-siⁿ ê kiáⁿ lâi siúⁿ-sù, hō͘ lâng sìn I, put-tì bia̍t-bô, hoán-tńg ū éng-oán oa̍h, só͘-í sin-iok sî-tāi, tē-it chá ê sìn-tô͘, tuì Ki-tok ê piáu-sī, m̄-nā chheng i choè toā-hiaⁿ, koh kèng-hōng i choè chú-lâng. In ê sim-ba̍k tiong, ì-liām tiong, chù-sîn khoàⁿ Ki-tok ê kiat-kio̍k, chiū-sī khak-si̍t jīn I choè Kiù-chú, lán tio̍h o̍h chit ê bô͘-iūⁿ.
Kiat-kio̍k lâi kóng, Ki-tok kì-jiân chīn chit ê thian-chit, toā-toā lī-ek tī lán sè-kan lâng, choè lán sè-kan lâng ê toā Kiù-chú, lán tio̍h chhim kám I ê hông-un, iā tio̍h kì-liām I ê kàng-sè lâi chīn thian-chit. Hiān-kim lán tī Kàu-hoē ê tiong-kan, ū siú Sèng-chhan chiàⁿ-sī lán tāi-ke ê hó ki-hoē, thang kì-liām Iâ-so͘ Ki-tok ū chīn I ê thian-chit, lâi choè lán ê Kiù-chú ê toā chhim-un. Iok-hān bat Ki-tok chin se̍k, put-lūn tuì tó chi̍t bīn lâi koan-chhat, i chin chai-iáⁿ, lán nā boē bêng ê só͘-chāi tio̍h chhē i.
漢羅（Ùi原文改寫）
約翰對基督的天職觀
這个約翰是耶穌所疼痛的學生，常常佇耶穌的身邊，不止捌耶穌的代誌。伊講，「這个tō成人的身軀，」就是指起基督。伊所擔當的責任，就是入世間的 使命，對本質上來講，是上帝的顯現者，對位格上來講，是上帝的獨生囝。約翰愛將基督做人類佮上帝的中間所盡的天職，對3方面的觀察中來完全講明予人通激起對基督的觀念，會真切。Taⁿ基督的天職，照約翰所看是甚物款，排列3項佇下底。
- 是上帝的羊羔：
人類的罪惡，袂會隱囥，上帝的公義也毋通廢除。古代用犧牲的祭禮，是有表基督救贖的恩，所以基督擔當上帝的使命，來成肉體到這世間，是欲擔當世人的罪孽，來成上帝羊羔的職務，這个就是神人間中保的責任，佇約翰的基督觀中，是認-tēng基督佇十字架所獻的犧牲祭祀，是完全成功的天職。
- 是所應允的彌賽亞：
彌賽亞的解釋，佇早年的宗教上，已經有定著的觀念，總是約翰所有的見識，贏過舊約聖經中早是先知佮眾人所希望的彌賽亞。早猶太的著作家，對彌賽亞的希望無明，紲影響當時彌賽亞的觀念者。所以有人認耶穌做先知，有的勉強耶穌做王，實在真的彌賽亞，是耶穌基督。
- 是世間人的救主：
世間人愛認捌上帝的方法，自然是倚靠基督做媒介，佇基督的內面，咱人通規則到上帝的意志，佮聖德，也通了解到上帝完全的疼痛，這个疼佇基督所成全救贖的功勞，完全表現。約翰佇福音書有講真明。伊講上帝疼世間人，將伊獨生的囝來賞賜，予人信伊，不致滅無，反轉有永遠活，所以新約時代，第一早的信徒，對基督的表示，m̄-nā稱伊做大兄，閣敬奉伊做主人。In 的心目中，意念中，注神看基督的結局，就是確實認伊做救主，咱著學這个模樣。
結局來講，基督既然盡這个天職，大大利益佇咱世間人，做咱世間人的大救主，咱著深感伊的鴻恩，也著紀念伊的降世來盡天職。現今咱佇教會的中間，有守聖餐正是咱大家的好機會，通記念耶穌基督有盡伊的天職，來做咱的救主的大深恩。約翰捌基督真熟，不論對tó一面來觀察，伊真知影，咱若袂明的所在著揣伊。