淡水中學
Tām-suí Tiong-o̍h
文獻資訊
| 項目 | 資料 |
|---|---|
| 作者 | 柯設偕 Koa Siat-kai |
| 卷期 | 芥菜子 |
| 卷期 | 第 22 號 |
| 日期 | 1927/11 |
| 頁數 | 11-12 |
白話字（原文數位化）
Tām-suí Tiong-o̍h
(Koa Siat-kai)
Tām-suí Tiong-o̍h sī tī 1914 nî 3 ge̍h 9 hō siat-li̍p khai-hāu. Kàu kin-nî í-keng sī 13 nî-kú lah. Thang kóng sī pún-tó tiong tē-it kú ê su-li̍p ê Tiong-o̍h. iā chhut-gia̍p-seng í-keng ū 9 hoê, kiōng 67 miâ. Hiān-chāi kàu-oân 14 uī, ha̍k-seng oá 200 miâ. Chiām-chiām ū ná teh chìn-pō͘. Thang kóng toē-ki í-keng chāi lah. Tuì taⁿ khí ún-tàng oē siū Siōng-tè ê toā pang-chān, hoat-tián liông-sēng, lī-ek choē-choē lâng, koh thang êng-kng Thian-kok tī Tâi-oân.
Ta̍k-nî ū bō͘-chi̍p sin-ji̍p seng. Mâ-nî 4 ge̍h sin ha̍k-liân, iû-goân ū beh koh bō͘-chi̍p. Só͘-í toā-toā ǹg-bāng tha̍k pò ê hiaⁿ-chí, tàu kóng-kò, tàu soan-thoân chit-keng o̍h-tn̂g, hō͘ chē-chē lâng oē chai, oē liáu-kái chit-keng ê cheng-sîn, kap lí-sióng. iā ǹg-bāng choē-choē lâng oē lâi ji̍p chit-keng o̍h-tn̂g.
Siông-siông bat ū lâng, kàu chèng-lâng lóng ji̍p o̍h chheng-chhó liáu, chiah beh lâi kau-sia̍p, khoàⁿ ū sím-mi̍h te̍k-pia̍t ê lō͘. Chit-khoán si̍t-chāi ū-sî chin thang tông-chêng, m̄-kú boē-bián-tit choē-choē put-piān, iā khah huì-khì. Ū-sî ko͘-put-chiong tio̍h ke tán chi̍t-nî, chin put-hēng.
Só͘-í ǹg-bāng tāi-ke liōng-chá tàu chio-ho͘, tàu kó͘-bú, iā tāi-seng kià phoe hō͘ Hāu-tiúⁿ, tuì pún-hāu chhéng-kiû kui-chek-su, khah-chá pī-pān siat-hoat, hō͘ i khah hó-sè, m̄-sái kè kî, iā siū kū-choa̍t.
Taⁿ toā-toā ǹg-bāng tha̍k-pò ê hiaⁿ-chí, hoaⁿ-hí uī-tio̍h Tâm-suí Tiong-o̍h tàu chio-ho͘, bô-lūn hoē-lāi, hoē-goā, tàu kó͘-bú, hō͘ choē-choē lâng lâi chi-goân lán kàu-hoē ê o̍h-tn̂g: chiū-sī lī-ek kàu-hoē kap Siā-hoē.
漢羅（Ùi原文改寫）
淡水中學
(柯設偕)
淡水中學是佇1914年3月9號設立開校。到今年已經是13年久lah。通講是本島中第一久的私立的中學。也出業生已經有9回，共67名。現在教員14 位，學生倚200名。漸漸有ná teh進步。通講地基已經在lah。對taⁿ起穩當會受上帝的大幫贊，發展隆盛，利益濟濟人，閣通榮光天國佇台灣。
逐年有募集新入生。Mâ年4月新學年，猶原有欲閣募集。所以大大向望讀報的兄姊，鬥廣告，鬥宣傳這間學堂，予濟濟人會知，會了解這間的精神，佮理想。也向望濟濟人會來入這間學堂。
常常捌有人，到眾人攏入學清楚了，才欲來交涉，看有甚物特別的路。這款實在有時真通同情，m̄-kú袂免得濟濟不便，也較費氣。有時姑不將著加等一年，真不幸。
所以向望大家量早鬥招呼，鬥鼓舞，也代先寄批予校長，對本校請求規則書，較早備辦設法，予伊較好勢，毋sái過期，也受拒絕。
Taⁿ大大向望讀報的兄姊，歡喜為著淡水中學鬥招呼，無論會內，會外，鬥鼓舞，予濟濟人來支援咱教會的學堂：就是利益教會佮社會。