迷信快傳染
Bē-sìn khoài thoân-jiám
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 芥菜子 |
| 卷期 | 第 21 號 |
| 日期 | 1927/10 |
| 頁數 | 7-8 |
白話字（原文數位化）
Bē-sìn khoài thoân-jiám
Tī Sū-lîm hū-kūn ū chi̍t-ê soè ê soaⁿ-á, hō(誤植hō͘)-choè Chi-soaⁿ-giâm téng-bīn ū khí chi̍t keng biō sī ho̍k-sāi Khai-chiang sèng-ông, ge̍h-goā-ji̍t chêng tī soaⁿ-kha ê chio̍h-thâu-piⁿ ū chhut chi̍t káng chuí-choâⁿ, lâng kā i hō-choè sian-chuí.
Chiū sì-koè iâu-giân kóng put-lūn sím-mi̍h pīⁿ nā lim hit ê chuí, chiū oē hó, tuì hit-tia̍p liáu-āu, chiū ū lâng khì hia ji̍p-chuí. Ji̍t-ji̍t ná choē lâng, tuì kok-hong-bīn lâi, tāi-ke khì hia ji̍p-chuí, soà-khì biō-nih sio-kim, hiān-sî muí-ji̍t ū kuí-nā chheng-lâng khì, goá iā khì kā i khoàⁿ-bāi, kó-jiân oe oe tīn-tīn óng-lâi put-choa̍t, ū-ê tuì hé-chhia, ū-ê tuì chū-tōng(誤植tông)-chhia, ū-ê tuì jîn-le̍k-chhia, chin(誤植chīn) sim-sek, chin lāu-jia̍t, beh khì ji̍p chuí, tio̍h lûn-pan, tán chin-kú, tio̍h chiap chi̍t-choā tn̂g-tn̂g chhin-chhiūⁿ lāu-jia̍t sî pâi tī thêng-chhia-tiūⁿ chiap chi̍t-choā tn̂g-tn̂g khì ka-toaⁿ ê khoán, ta̍k-lâng só͘ tit-tio̍h ê chuí sī 2, 3, niúⁿ nā-tiāⁿ, bô thang hō͘ lâng choē, ta̍k-lâng tit-tio̍h hit ê chuí khoàⁿ tio̍h ka-ná pó-poè, tī lō͘ piⁿ ū lâng tah tiám-á teh boē ko-á kim, lóng-chóng ū 40 goā keng. Hit ê chuí chiàu oē-seng teh gián-kiù, lim boē ha̍h, in-uī lāi-tiong ū siau-sng kap A-mo͘-nî-a ê chit tī-teh, iáu-kú hiah ê lâng m̄ kiaⁿ, soà kóng sī I-seng oàn-tò͘ lâm-sám kóng. Bê-sìn kàu chhim soà m̄-kiaⁿ guî-hiám, chin khó-sioh.
Hiān-sî iáu-kú ta̍k-ji̍t ū lâng khì, m̄-chai beh kàu sím-mi̍h sî! Ná khì ê lâng soà ná-choē. Chiàu thiaⁿ hit ê teh kā lâng ji̍p-chuí ê lâng teh kóng, siōng-choē bat chi̍t lâng teh kóng, siōng-choē bat chi̍t ji̍t chi̍t-bān chhit chheng goā lâng khì, si̍t-chāi thang chai bê-sìn ê thoân-jiám chin-chiàⁿ khoài. Iâ-so͘ chin ê oa̍h-miā chuí, pe̍h-pe̍h beh pun hō͘ lâng, lâng bô siáⁿ beh tit, ài tit chit-khoán ê ké sian-chuí, si̍t-chāi chin khó-sioh.
chhiáⁿ lia̍t-uī thoè chiah ê bê-sìn-chiá kî-tó, hō͘ in oē tit chhíⁿ-gō͘ oa̍t tò-tńg lâi ji̍p oa̍h-miā chuí, hō͘ lêng-hûn lim-liáu, ta̍k(誤植tak)-téng-hō ê pīⁿ, tit-tio̍h hó.
漢羅（Ùi原文改寫）
迷信快傳染
佇士林附近有一個細的山仔，號做芝山巖頂面有起一間廟是服事開漳聖王，月外日前佇山腳的石頭邊有出一káng水泉，人共伊號做仙水。
就四界謠言講不論甚物病若啉彼个水，就會好，對彼霎了後，就有人去遐入水。日日ná濟人，對各方面來，大家去遐入水，紲去廟裡燒金，現時每日有幾若千人去，我也去共伊看覓，果然oe oe陣陣往來不絕，有的對火車，有的對自動車，有的對人力車，真心適，真鬧熱，欲去入水，著輪班，等真久，著接一choā長長親像鬧熱時排佇停車場接一choā長長去鉸單的款，逐人所得著的水是2，3，兩nā-tiāⁿ，無通予人濟，逐人得著彼个水看著ka-ná寶貝，佇路邊有人搭店仔teh賣糕仔金，攏總有40外間。彼个水照衛生teh研究，啉袂合，因為內中有硝酸佮阿摩尼亞的質佇teh，iáu-kú遐的人毋驚，紲講是醫生怨妒lâm-sám講。迷信到深紲毋驚危險，真可惜。
現時iáu-kú逐日有人去，毋知欲到甚物時！Ná去的人紲ná濟。照聽彼个teh共人入水的人teh講，上濟捌一日一萬七千外人去，實在通知迷信的傳染真正快。耶穌真的活命水，白白欲分予人，人無啥欲得，愛得這款的假仙水，實在真可惜。
請列位替chiah的迷信者祈禱，予in會得醒悟越倒轉來入活命水，予靈魂啉了，逐等號的病，得著好。