製鹽工業

Chè-iâm kang-gia̍p

文獻資訊

項目	資料
作者	張基全 Tiuⁿ Ki-choân
卷期	芥菜子
卷期	第 21 號
日期	1927/10
頁數	11-12

白話字（原文數位化）

Chè-iâm kang-gia̍p [製鹽工業]

Tiuⁿ Ki-choân

Jîn-luī tio̍h chia̍h-iâm, tuì kó͘-chá kàu hiān-kim lóng bô koh-iūⁿ, m̄-nā lâng, chiū it-poaⁿ ê seng-bu̍t beh î-chhî in ê sèⁿ-miā tek-khak tio̍h iâm ê sū-si̍t iā sî bêng-bêng, chhin-chhiūⁿ ū i-ha̍k-ka chiong choân-jiân bô iâm-hun ê chia̍h-mi̍h hō͘ tōng-bu̍t chia̍h sī pí pàng hō͘ i gō koh khah khoài sí, chóng-sī goá bat thiaⁿ-kìⁿ lâng kóng, hū-jîn-lâng seⁿ-kiáⁿ ge̍h-lāi m̄-thang chia̍h kiâm, che sī toā chhò(誤植chhò͘)-gō͘.

Lán lâng só͘ chia̍h ê iâm, ti̍t(誤植tit)-chiap thang choè huih kap bah ê sêng-hun, lâng ê seng-khu só͘ ū ê iâm-liōng iok-lio̍k ū 12 niú, koh-chài iâm chit-pō͘-hūn pìⁿ-choè iâm-sng, tī uī (胃) lāi choè uī-e̍k, chān siau-hoà, án-ni chit-nî chi̍t-lâng tio̍h khiàm-ēng loā-choē iâm? chiàu ta̍k-kok ê pêng-kun bô sím-mi̍h tiāⁿ-tio̍h.  Tang-iûⁿ-lâng muí(誤植muì)-nî chi̍t-lâng chì-chió tio̍h 15 kun.  Eng-kok, Tek-kok, Bí-kok lâng 15, 6 kun.

iâm m̄-nā tuì it-poaⁿ ê seng-bu̍t sī hiah iàu-kín, chiū kang-gia̍p siōng, hoà-ha̍k-siōng iā-sī lia̍h iâm choè chin tiōng-iàu ê bu̍t-chit.

Lâng beh tuì tó-lo̍h lâi tit-tio̍h iâm?  Chiàu iâm sán-chhut ê chōng-hóng thang tāi-lio̍k hun-choè 2 hong-biān, chi̍t-khoán sī gān-iâm (Rock Salt).  Koh chit-khoán sī tuì kiâm-chuí lâi tit-tio̍h.  Gân-iâm sī tī lio̍k-toē, ū-sî kui-soaⁿ lóng-sī iâm, ká-ná chio̍h-giâm, só͘-í chiah ū chit-ê miâ, Ji̍t-pún khiok iáu-bē ū hoat-kiàn tio̍h chit-khoán gân-iâm ê khòng, nā-sī tī goā-kok choē-choē só͘-chāi ū, chhin-chhiūⁿ

Tek-kok ê Stassfurt.

Hiong-gâ-lī ê Wielika.

Se-pan-gâ ê Cardona.

Eng-kok ê Cheshire

Bí-kok ê Michigan.

Hoat-kok ê Nancy toē-hng lóng sī chhut-miâ ê gân-iâm sán-toē.

(Boē-oân)

漢羅（Ùi原文改寫）

製鹽工業

張基全

人類著食鹽，對古早到現今攏無各樣，m̄-nā人，就一般的生物欲維持in的性命的確著鹽的事實也時明明，親像有醫學家將全然無鹽分的食物予動物食是比放予伊餓閣較快死，總是我捌聽見人講，婦人人生囝月內毋通食鹹，這是大錯誤。

咱人所食的鹽，直接通做血佮肉的成分，人的身軀所有的鹽量約略有12 兩，閣再鹽這部分變做鹽酸，佇胃 (胃)內做胃液，贊消化，按呢這年一人著欠用偌濟鹽？照逐國的平均無甚物定著。東瀛人每年一人至少著15斤。英國，德國，美國人15，6 斤。

鹽m̄-nā對一般的生物是hiah要緊，就工業上，化學上也是掠鹽做真重要的物質。

人欲對tó落來得著鹽？照鹽產出的狀況通大略分做2方面，一款是岩鹽(Rock Salt)。閣這款是對鹹水來得著。岩鹽是佇陸地，有時規山攏是鹽，ká-ná石鹽，所以才有這个名，日本卻猶未有發見著這款岩鹽的礦，若是佇外國濟濟所在有，親像

德國的Stassfurt。

匈牙利的Wielika。

西班牙的Cardona。

英國的Cheshire

美國的Michigan。

法國的Nancy地方攏是出名的岩鹽產地。

(袂完)