寄生蟲

Kià-seng-thâng

文獻資訊

項目	資料
作者	吳清鎰 Gô͘ Chheng-ek
卷期	芥菜子
卷期	第 21 號
日期	1927/10
頁數	7

白話字（原文數位化）

Kià-seng-thâng [寄生虫]

Gô͘ Chheng-ek e̍k

ia̍h (蝶) sī chhì-mn̂g-á-thâng (毛虫) piàn ê, sī it-poaⁿ ê lâng só͘-chai-iáⁿ ê, chóng-sī chiàu phok-bu̍t-ha̍k-chiá (博物學者) ēng hián-bî-kiàⁿ, soè-jī lâi gián-kiù, chiū chai bô tú-tú ta̍k-bé chhì-mn̂g-á-thâng oē piàn ia̍h-á, chi̍t bé chhì-mn̂g-á-thâng ū-ê sî kàu chiū chhin-chhiūⁿ niû-á (蠶) kiⁿ khak-á, khùn tī khak-á-lāi.  āu-lâi chiah piàn ia̍h, tuì khak-á-lāi pe chhut-lâi, chóng-sī ū-ê chiū m̄-sī án-ni, sî kàu chiū sí khì, sī kan-ta chhun chi̍t-ê chhì-mn̂g-á-thâng khak nā-tiāⁿ.  Cháiⁿ-iūⁿ án-ni? chiū-sī in-uī chit ê chhì-mn̂g-á-thâng, ū hō͘ chi̍t-chéng ê hô͘(誤植hō͘)-sîn, kā i tèng, soà pàng hô͘(誤植hō͘)-sîn nn̄g tī chhì-mn̂g-á-thâng ê thé-lāi (体內) tī hia pū-hoà piàn-choè chi̍t chéng ê kià-seng-thâng tī chhì-mn̂g-á-thâng ê thé-lāi (体內), teh oa̍h.  Chiah ê kià-seng-thâng chiū-sī teh chia̍h hit-khoán tī chhì-mn̂g-á-thâng ê thé-lāi tit-beh piàn-choè ia̍h ê hun-chú, (分子) chóng-sī lóng bô siong-hāi tio̍h chhì-mn̂g-á-thâng ê goā-hêng (外形) só͘-í ū kià-seng-thâng ê chhì-mn̂g-á-thâng kap bô kià-seng-thâng ê chhì-mǹg-á-thâng, nā-sī tuì goā-hêng (外形) kā i khoàⁿ, lóng bô koh-iūⁿ, chóng-sī sî nā kàu bô kià-seng-thâng-ê chhì-mn̂g-á-thâng oē kiⁿ khak, oē piàn ia̍h; nā-sī ū kià-seng ê, i ê thé-lāi, só͘ tit-beh piàn ia̍h ê hun-chú (分子) í-keng hō͘ kià-seng-thâng chia̍h liáu-liáu, tì-kàu boē-oē piàn-chiâⁿ ia̍h, chiū án-ni bia̍t-bông nā-tiāⁿ.  Tú-tú chhin-chhiūⁿ chit ê khoán-sit, Jîn-luī (人類) iā ū kià-seng-thâng, chiū-sī choē-ok (罪惡) Ū choē ê, kap bô choē ê, tuí goā-hêng (外形) lâi khoàⁿ pîⁿ-pîⁿ sī chi̍t ê lâng khiok bô sím-mi̍h koh-iūⁿ, chóng-sī ū choē ê lâng i ê iàu-kín ê lêng-hûn nā hō͘ choē, chiū-sī kià-seng-thâng kā i chia̍h, tì-kàu bah-thé (肉体) sí-liáu ê sî soà boē-tit-thang ji̍t tī ū êng-kng ê lâi-sè (來世) ê seng-oa̍h (生活) chiū éng-oán bia̍t-bô, oē kiù lán thoat-lī chit ê éng-oán-sí ê chiū-sī lán ê Chú, Iâ-so͘ Ki-tok nā-tiāⁿ.

漢羅（Ùi原文改寫）

寄生蟲

吳清鎰 譯

蝶(蝶)是刺毛仔蟲變的，是一般的人所知影的，總是照博物學者用顯微鏡，細膩來研究，就知無tú-tú逐尾刺毛仔蟲會變蝶仔，一尾刺毛仔蟲有的時到就親像娘仔 (蠶) kiⁿ殼仔，睏佇殼仔內。後來才變蝶，對殼仔內飛出來，總是有的就毋是按呢，時到就死去，是kan-ta chhun一个刺毛仔蟲殼nā-tiāⁿ。怎樣按呢？就是因為這个刺毛仔蟲，有予一種的胡蠅，共伊叮，紲放胡蠅兩佇刺毛仔蟲的體內(体內)佇遐孵化變做一種的寄生蟲佇刺毛仔蟲的體內(体內)，teh活。Chiah 的寄生蟲就是teh食彼款佇刺毛仔蟲的體內得欲變做蝶的分子，(分子)總是攏無傷害著刺毛仔蟲的外形 (外形)所以有寄生蟲的刺毛仔蟲佮無寄生蟲的刺毛仔蟲，若是對外形(外形) 共伊看，攏無閣樣，總是時若到無寄生蟲的 刺毛仔蟲會kiⁿ殼，會變蝶；若是有寄生的，伊的體內，所得欲變蝶的分子 (分子)已經予寄生蟲食了了，致到袂會變成蝶，就按呢滅亡nā-tiāⁿ。Tú-tú親像這个款式，人類(人類)也有寄生蟲，就是罪惡(罪惡)有罪的，佮無罪的，對外形 (外形)來看平平是一个人卻無甚物各樣，總是有罪的人伊的要緊的靈魂若予罪，就是寄生蟲共伊食，致到肉體(肉体)死了的時紲袂得通日佇有榮光的來世(來世) 的生活(生活)就永遠滅無，會救咱脫離這个永遠死的就是咱的主，耶穌基督nā-tiāⁿ。