信心得救佮賞罰行為
Sìn-sim tit-kiù kap Sióng-hoa̍t hêng-uî
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 芥菜子 |
| 卷期 | 第 20 號 |
| 日期 | 1927/9 |
| 頁數 | 2-3 |
白話字（原文數位化）
Sìn-sim tit-kiù kap Sióng-hoa̍t hêng-uî
Hiaⁿ-tī ah! goá kin-á-ji̍t tuì lín só͘ kóng ê toê-ba̍k, sī chin iàu-kín: lán tāi-ke lâi sìn Ki-tok Iâ-so͘, sī ài lêng-hûn tit-tio̍h kiù. Iâ-so͘ kóng, sìn ê lâng bián kàu bia̍t-bô hoán-tńg tit-tio̍h éng-oán oa̍h. Iok-hān 3: 16. Sìn ê lâng í-keng chhut sí ji̍p oa̍h. Iok-hān 5: 24. án-ni sìn chiū tit-tio̍h kiù, sī Chú Iâ-so͘ Ki-tok ê èng-ún, iā sī Siōng-tè ê chí-ì, m̄-sī lâng ê oē, éng-oán boē-oē kái-piàn. Lán nā sìn I, éng-kiú khò tit chū. Ū lâng mn̄g kóng, khì sìn Iâ-so͘ sī chin iông-īⁿ, chóng-sī sìn Iâ-so͘ í-āu, hêng-uî it-kú, it-tōng: lóng ài chhin-chhiūⁿ Iâ-so͘ ê khoán, che sī uî-lân, khiok ū iáⁿ. Hêng-uî sī sìn sim ê ké-chí. Tit-tio̍h pò-siúⁿ ê tāi-kè(tài kè) kap tit kiù ê tāi-tō, m̄-thang saⁿ-chham, tit kiù ê tāi-tō kap pò-siúⁿ, kun-pún put-tông, Sèng-keng tiong ū kóng chin chheng-chhó. Khoàⁿ(Hhoàⁿ) Lō͘-ka 23: 39-43. Kiông-tô͘ ê tit-kiù. I Ko-lîm-to 5: 1-5. Siū koáⁿ-chhut ê Kàu-hoē hoān-choē ê sìn-tô͘ tit-tio̍h kiù. án-ni tit-kiù put-chāi ka-kī ê hêng-uî, lóng sī khò Siōng-tè ê un-tián. Í-hut-só͘ 2: 8, 9. Lô-má 11: 6, kun-pún siōng í-keng kái-koat liáu, lán m̄-thang iû-goân tī choē-ok tiong kiò un-tián. Lán í-keng sī tī choē-ok siōng sí liáu ê lâng, kiám thang iû-goân tī choē-ok tiong tit oa̍h mah?! Lô-má 6: 1, 2. Ngá-kok-su 2: 20. Ū kóng, sìn nā bô kiâⁿ, i ê sìn sī kui tī khang-khang; che sī lūn ū sìn-sim ê lâng, it-tēng ū hêng-uî.
A-pek lia̍p-hán in-uī sìn tit-tio̍h chheng-gī. Ngá-kok-su 2: 21, 22. Che sī sêng-choân ê sìn sim, sī sìn sim ê khak-si̍t chèng-kù. Ké iáⁿ choē hó ê sìn-sim lán thang tuì i ê hêng-uî-siōng jīn chhut. Iok-hān it-su, 1: 8. Che sī bô hêng-uî ê sìn-sim, kiaⁿ liáu sī ké ê sìn sim. Pó-lô Ngá-kok ê hok-im sī kóng sìn-sim tit-kiù, lán thang bián giâu-gî. To̍k-to̍k sìn nā bô hêng-uî, chiong lâi tī Ki-tok ê tâi-chêng, boē bián-tit siū pò-èng. I. Ko-lîm-to 3: 14, 15. Hó hêng-uî ê sìn-tô͘ tng Chú Iâ-so͘ chài-lîm ê sî, í-keng sí ê lâng, tāi-seng koh-oa̍h, oa̍h tī-teh ê lâng beh chiūⁿ hûn tī khong-tiong ngiâ-chih Chú, kap Chú éng-oán khiā-khí. Khé-sī-lio̍k 20: 6. Iâ-so͘ kóng lín chiah ê hó kap chīn-tiong ê lô͘-po̍k thang chiūⁿ khì hióng-siū lí ê chú-lâng ê khoài-lo̍k, phái hêng-uî kap pîn-toāⁿ ê lô͘-po̍k, beh hiat ka̍k tī goā-bīn o͘-àm ê só͘-chāi, tī hia beh ai-chhám, thî-khàu, kā-gê, chhiat-chhí. Má-thài 25: 14, 30.
Hiaⁿ-tī ah! lán ê hêng-uî sī sio̍k tī hó ê á-sī sio̍k tī phái ê, hó hêng-uî ê lâng sī Siōng-tè só͘ hoaⁿ-hí. Lô-má 12: 2. Phái hêng-uî ê lâng oē hō͘ Siōng-tè siū-khì. Hui-li̍p-pí 3: 14.
Khó-sioh, hiān-chāi ê sìn-tô͘ toā to-sò͘ kóng i tō-lí chin bêng-pe̍k. Nā khoàⁿ i ê hêng-uî sī kap Siōng-tè ê tō-lí tuì-hoán, sīm-chì tī kàu-hoē tiong bô koh-iūⁿ chit bé ê khó-lîn thâng, chit kiāⁿ ê iàm-khì mi̍h, tī sī-hoē tiong hō͘ lâng gí-gī, hō͘ lâng siat-to̍k. Jîn-keh tuī-lo̍h, chha-put-to boē lī-khui sè-kan í-chêng, chiū siū liáu 2 khoán ê hêng-hoa̍t. Tit-tio̍h un-tián tit kiù ê sìn-tô͘ ah! lí nā ū m̄ hó ê hêng-uî, thàn hó ki-hoē tio̍h hoán-hoé koé-pìⁿ. Iâ-so͘ kóng lín chiah ê, sím-mi̍h lâng oē khoà-jū iân-chhiân hō͘ sìⁿ(誤植sì)-miā chit khek kú khah tn̂g. Má-thài 6: 27, in-uī Chú beh lâi ê sî, lán m̄-chai. Khé-sī-lio̍k 3: 3, só͘ kóng sī chin “Só͘ siū só͘ thiaⁿ ê tō-lí, lí tio̍h kì-liām, lâi hoán-hoé kè-sit nā lí bô tî(誤植ti)-hông, goá tek-khak beh kāng lí, chhin-chhiūⁿ chha̍t liâm-piⁿ lâi, lí boē phah-sǹg sím-mi̍h sî.”
漢羅（Ùi原文改寫）
信心得救佮賞罰行為
兄弟ah！我今仔日對恁所講的題目，是真要緊：咱大家來信基督耶穌，是愛靈魂得著救。耶穌講，信的人免到滅無反轉得著永遠活。約翰3：16。信的人已經出死入活。約翰5：24。按呢信就得著救，是主耶穌基督的應允，也是上帝的旨意，毋是人的話，永遠袂會改變。咱若信伊，永久靠得chū。有人問講，去信耶穌是真容易，總是信耶穌以後，行為一舉，一動：攏愛親像耶穌的款，這是為難，卻有影。行為是信心的果子。得著報賞的代價佮得救的大道，毋通相參，得救的大道佮報賞，根本不同，聖經中有講真清楚。看路加23：39-43。Kiông-tô͘的得救。哥林多前書5：1-5。受趕出的教會犯罪的信徒得著救。按呢得救不在家己的行為，攏是靠上帝的恩典。以弗所2：8，9。羅馬11：6，根本上已經解決了，咱毋通猶原佇罪惡中叫恩典。咱已經是佇罪惡上死了的人，kiám通猶原佇罪惡中得活mah？！羅馬6：1，2。雅各書 2：20。有講，信若無行，伊的信是歸佇空空；這是論有信心的人，一定有行為。
亞伯拉罕因為信得著稱義。雅各書2：21，22。這是成全的信心，是信心的確實證據。假影做好的信心咱通對伊的行為上認出。約翰一書，1：8。這是無行為的信心，驚了是假的信心。保羅雅各的福音是講信心得救，咱通免僥疑。獨獨信若無行為，將來佇基督的台前，袂免得受報應。I.哥林多3：14，15。好行為的信徒當主耶穌再臨的時，已經死的人，代先閣活，活佇teh的人欲上雲佇空中迎接主，佮主永遠徛起。啟示錄20：6。耶穌講恁才的好佮盡忠的奴僕通上去享受你的主人的快樂，歹行為佮貧憚的奴僕，欲hiat ka̍k佇外面烏暗的所在，佇遐欲哀慘，啼哭，咬牙，切齒。馬太25：14，30。
兄弟ah！咱的行為是屬佇好的抑是屬佇歹的，好行為的人是上帝所歡喜。羅馬12：2。歹行為的人會予上帝受氣。腓立比 3：14。
可惜，現在的信徒大多數講伊道理真明白。若看伊的行為是佮上帝的道理對反，甚至佇教會中無各樣這尾的可憐蟲，這件的厭棄物，佇社會中予人擬議，予人褻瀆。人格墮落，差不多袂離開世間以前，就受了2款的刑罰。得著恩典得救的信徒ah！你若有毋好的行為，趁好機會著反悔改變。耶穌講恁chiah的，甚物人會掛慮iân-chhiân予性命這刻久較長。馬太6：27，因為主欲來的時，咱毋知。啟示錄3：3，所講是真「所受所聽的道理，你著紀念，來反悔過失若你無提防，我的確欲共你，親像賊liâm-piⁿ來，你袂拍算甚物時。」