Sèng-keng gián-kiù-hoēPermalink

文獻資訊Permalink

白話字（原文數位化）Permalink

Sèng-keng gián-kiù-hoē

Sèng-keng ū pau Siōng-tè ê Sèng-chit tī-teh.  Lâng beh si̍t-chāi bat I tio̍h tháu khui kàu tit-tio̍h hit ê si̍t-chāi ê.  iá-kiû (baseball) sī chin tēng, goā-bīn chhòng soè-pán ê chhiū-lin lâi pau, chin oh-tit sǹg lìn, goá phah-sǹg kui lia̍p sī án-ni lâi chiâⁿ ê, goá chiū ti̍t-ti̍t kā i liû kàu lāi-bīn chiū tit-tio̍h chit lia̍p cha̍t-pak ê chhiū-lin-kiû.  Lāi-bīn sī chhiū-lin goā-bīn ia̍h sī chhiū-lin; chóng-sī bô saⁿ-tâng.  Pêng-siông ê bat Siōng-tè kap ji̍p tī sèng-keng ê chhim-ò lâi bat ê Siōng-tè sī bô saⁿ-tâng.

Chhim-bat Siōng-tè chiah oē chai Siōng-tè tuì lán ū sím-mi̍h khoán ê iau-kiû, ia̍h chiah oē sūn bēng-lēng.  Sèng-keng ê tì-sek chiū-sī kàu-hoē ê châi-sán kap kàu-hoē ê toē-ki, khoài iô-choah, khoài hoān-choē ê kàu-hoē chiū-sī toē-ki bô hē tī si̍t-chāi ê toē.  Lán ta̍k-lâng bô lia̍h Sèng-keng ê tì-sek choè bô iàu-kín, chiū ēng sim lâi siūⁿ lâi gián-kiù ia̍h tek-khak bô khoàⁿ-khin.  Che sī hiān-sî kàu-hoē só͘ khiàm ê chi̍t-hāng.

Beh tha̍k, á-sī oa̍t-liām Sèng-keng chat m̄-sī oh ê sū, beh tam tio̍h hit-ê si̍t-chāi ê bī sī m̄-sī khoài.  Tio̍h ū lâng pò lán gián-kiù Sèng-keng ê hong-hoat kap siūⁿ ê hong-hoat.  Chit ê sū tuì chá goá chiū khoàⁿ choè iàu-kín, ia̍h chhē hit ê hong-hoat.  M̄-kú lóng boē tit-thang boán-chiok.  Chóng-sī āu-lâi ū tit-tio̍h.

Soan-kàu-su kè lâi chit-pêng, ha̍k-hāu í-goā khah choē sī ti̍t-chiap chò kang tī kàu-hoē kap hoē-goā.  Che sī iàu-kín ê kang; m̄-kú teh choè kang ê lâng ū bô kóng chhut ê iau-kiû, ia̍h bô lâng kiong-kip in:-Chiū-sī gián-kiù Sèng-keng ê hong-hoat.  Che chiū-sī kàn-chiap ê thoân-tō, sī khah kú-tn̂g khah ū la̍t ê kang.

Kì-tit 2, 3 nî chêng ū chi̍t uī sin ê Soan-kàu-su lâi, hit sî sim-lāi siūⁿ I ia̍h sī beh thoân tō-lí, sī hoē-iú kap hoē-goā ê lâng ê hó siau-sit, m̄-sī choè-kang lâng ê.  āu-lâi ná chhin-kīn i chiū chai sī choè-kang lâng ê hok-khì, chiū-sī tuì thiaⁿ-kìⁿ i chi̍t kù oē kóng, “Goá khah ài sī pang-chān tâng tio̍h-boâ ê” hit-sî thiaⁿ-kìⁿ chit khoán kiōng-bêng ê siaⁿ ū kap lâng bô saⁿ-tâng ê hoaⁿ-hí tī-teh.

āu-lâi chiām-chiām ná khí kang chio khah siàu-liân ê lâi gián-kiù Sèng-keng, ū sî tī i ê chhù, ū sî khì Tāi-tūn soaⁿ-téng, ia̍h hiān-sî tī Siang-liân ū Sèng-keng gián-kiù-hoē, muí pài 2, khah(誤植hhah) siông ū chiaⁿ cha̍p ê chū-chi̍p, ū Thoân-tō-su, i-seng, kap i-koán ê chit-oân.  I ū tam-tng chin choē khoán ê kang; iáu-kú hoaⁿ-hí poah-kang lâi pang-chān.  Ta̍k ê chin chhù-bī, ū boán-chiok ê hoaⁿ-hí.  Tī Tâi-pak hū-kūn ê Thoân-tō-chiá pí pa̍t-uī ê khah ū hok-khì.  Chóng-sī m̄-nā tī hit uī i iā tek-khak ài pang-chān khah hn̄g ê chhin-chhiūⁿ Sin-tek, á-sī Gî-lân khah tiong-sim Thoân-tō-su khah khoài chū-chi̍p ê só͘-chāi nā ū chit khoán ê him-bō͘, tek-khak hoaⁿ-hí chhiâu sî-kan chi̍t lé-pài chū-chi̍p chi̍t pái.

I sī chin khiam-pi, chin khek-kí, ū Ki-tok ê sim tī-teh, lí nā kap i choè-tīn chiū oē khoàⁿ bêng-bêng I sī ū tek-hēng ê lâng.

ǹg-bāng tī kuí-nā só͘-chāi oē heng-khí chit khoán ê hoē, āu-lâi siⁿ-thoàⁿ, tī kok kàu-hoē ū chit khoán ê gián-kiù-hoē, ta̍k-lâng beh khah oa̍h-tāng khah kian-kò͘.  Che si̍t-chāi sī kàu-hoē kái-chō kap kiàn-siat chhiong-si̍t ê kàu-hoē ê ki-pún hong-hoat.  Lán nā bô khoàⁿ-khin, tī hiān-kim oē khoàⁿ-kìⁿ chiong-lâi ê hāu-kó.

漢羅（Ùi原文改寫）Permalink

聖經研究會

聖經有包上帝的性質佇teh。人欲實在捌伊著tháu開到得著彼个實在的。野球(baseball)是真硬，外面chhòng細pán的樹奶來包，真oh得算lìn，我拍算規粒是按呢來成的，我就直直共伊留到內面就得著這粒實腹的樹奶球。內面是樹奶外面亦是樹奶；總是無相同。平常的捌上帝佮入佇聖經的深奧來捌的上帝是無相同。

深捌上帝才會知上帝對咱有甚物款的要求，亦才會順命令。聖經的智識就是教會的財產佮教會的地基，快搖choah，快犯罪的教會就是地基無hē佇實在的地。咱逐人無掠聖經的智識做無要緊，就用心來想來研究亦的確無看輕。這是現時教會所欠的一項。

欲讀，抑是越念聖經節毋是oh的事，欲tam著彼个實在的 味是毋是快。著有人報咱研究聖經的方法佮想的方法。這个事對早我就看做要緊，亦揣彼个方法。M̄-kú攏袂得通滿足。總是後來有得著。

宣教師過來這爿，學校以外較濟是直接做工佇教會佮會外。這是要緊的工；m̄-kú teh做工的人有無講出的要求，亦無人供給in：-就是研究聖經的方法。這就是間接的傳道，是較久長較有力的工。

記得2，3年前有一位新的宣教師來，彼時心內想伊亦是欲傳道理，是會友佮會外的人的好消息，毋是做工人的。後來ná親近伊就知是做工人的福氣，就是對聽見伊一句話講，「我較愛是幫贊同著磨的」彼時聽見這款共鳴的聲有佮人無相同的歡喜佇teh。

後來漸漸ná起工招較少年的來研究聖經，有時佇伊的厝，有時去大屯山頂，亦現時佇雙連有聖經研究會，每拜2，較常有chiaⁿ十个聚集，有傳道師，醫生，佮醫館的職員。伊有擔當真濟款的工；iáu-kú歡喜撥工來幫贊。逐个真趣味，有滿足的歡喜。佇台北附近的傳道者比別位的較有福氣。總是m̄-nā佇彼位伊也的確愛幫贊較遠的親像新竹，抑是宜蘭較中心傳道師較快聚集的所在若有這款的欣慕，的確歡喜chhiâu時間一禮拜聚集一擺。

伊是真謙卑，真克己，有基督的心佇teh，你若佮伊做陣就會看明明伊是有德行的人。

向望佇幾若所在會興起這款的會，後來生湠，佇各教會有這款的研究會，逐人欲較活動較堅固。這實在是教會改造佮建設充實的教會的基本方法。咱若無看輕，佇現今能看見將來的效果。