教囝的法度
Kà kiáⁿ ê hoat-tō͘
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 芥菜子 |
| 卷期 | 第 19 號 |
| 日期 | 1927/8 |
| 頁數 | 12 |
白話字（原文數位化）
Kà kiáⁿ ê hoat-tō͘
Tē-saⁿ chiuⁿ.
Siúⁿ-hoa̍t
Chi̍t-ke chhin-chhiūⁿ chit-kok. Lāu-pē choè ông, Lāu-bú choè ông-hō͘, Tio̍h siúⁿ-hoa̍t ū chiong-thêng chhin-chhiūⁿ tī-kok án-ni. Siat-sú ū chit-ê ông kā lâng kóng, koáⁿ-jîn khoàⁿ peh-sìⁿ nā tio̍h-siong, put-jím khoàⁿ i teh siū hêng-hoa̍t, lâng tek-khak kiò i choè gōng ê ông, I ê kok-lāi iā tek-khak ta̍uh-ta̍uh jiáu-loān, choè pē-bú iā chhin-chhiūⁿ án-ni, nā kan-ta thiàⁿ i ê kiáⁿ. Lóng bô chek-tok i, lâng iā tek-khak kiò i choè gōng ê pē-bú, Chim-giân kóng, Chhê-á nā bô kàu kiáⁿ ê seng-khu, bô thang kóng sī thiàⁿ, ū lâng uī-tio̍h ka-kī ê khoài-lo̍k chiū hó, bô ài ēng hó kà-sī i ê kiáⁿ-jî, kiaⁿ ka-kī kan-khó͘, ài khoàⁿ-oa̍h kè-ji̍t. Tuì án-ni kiáⁿ-jî m̄ thiàⁿ i ê pē-bú, boē kì-tit i ê pē-bú ê un, soà pìⁿ-choè ngó͘-ge̍k, nā chek-hoa̍t kiáⁿ-jî siuⁿ giâm, ū hāi-tio̍h gín-á, nā khoán-thāi kiáⁿ-jî siuⁿ khoan, chiū oē siū chai-ē.
Siúⁿ-hoa̍t tio̍h tú-hó, o-ló háng-hoah ê oē, choè pē-bú ê lâng, m̄-thang siông-siông kóng. In-uī gín-á kiâⁿ i só͘ eng-kai kiâⁿ-ê, chiū bô teh ǹg-bāng pē-bú ê o-ló, chhin-chhiūⁿ chia̍h-pn̄g soé-bīn chiah-ê tāi-chì. Che lóng-sī gín-á ta̍k-ji̍t só͘ tio̍h choè ê nā siông-siông o-ló i, bô kú chiū khoàⁿ chit-ê o-ló choè pêng-siông ê, nā siông-siông háng-hoah iā chhin-chhiūⁿ án-ni. Boē hiáu-tit ê pē-bú khoàⁿ o-ló háng-hoah lóng bô lī-ek, chiū ēng pa̍t-hāng ê hoat-tō͘ lâi bián-lē i, ū ê kā gín-á kóng, Goá ê kim-kiáⁿ ah, Lí nā khì choè, goá chiū beh thn̂g-á hō͘ lí, ū-ê kóng, Lí chit--ê pháiⁿ kiáⁿ, Lí nā m̄ khì choè, goá chiū beh phah lí. Siat-sú gín-á tham-tio̍h lī-ek chiah beh choè, ē-pái i tek-khak beh kóng, Lí tāi-seng thn̂g-á hō͘ goá, goá chiah lâi khì choè, nā-sī gín-á khoàⁿ pē-bú háng-hoah liáu, lóng bô koh chek-hoa̍t i. Chiū i ngó͘-ge̍k ê sim pí í-chêng koh khah toā. Só͘-í hoān-nā gín-á nā beh o-ló i, á-sī beh hiâm i, lóng tio̍h tú-hó m̄-thang kè-thâu.
Siúⁿ-hoa̍t chhut tī pē-bú ê ì-kiàn; chóng-sī tio̍h chiàu gín-á ê só͘-kiâⁿ lâi phoàⁿ-toàn, m̄-thang chiàu pē-bú ê hoaⁿ-hí siū-khì. iā m̄-thang phian-su thiàⁿ kiáⁿ-jî. Tsá ū chit-ê tù-chheh ê lâng bat kóng, Gâu koh bêng-lí ê pē-bú, ū chi̍t-hāng kà-sī gín-á tē-it hó ê hoat-tō͘, chiū-sī gín-á kiâⁿ hó-sū, Toàn m̄-thang ēng chîⁿ lâi siúⁿ i, m̄-nā án-ni. iā m̄-thang ēng thn̂g-á hō͘ i: in-uī kiaⁿ-liáu i toā-hàn ê sî, chiâⁿ-choè chi̍t-ê pîn-toāⁿ tham-chia̍h ê lâng. To̍k-to̍k ēng thit-thô mi̍h siúⁿ i, tē-it ū lī-ek, chi̍t-hāng hō͘ i ê sim hoaⁿ-hí, chi̍t-hāng hō͘ i ê sèng-chêng tit-tio̍h kî-khoán, oē tha̍k-chheh(誤植cheh), chiū ēng ha̍h i só͘ tha̍k ê chheh lâi hō͘ i, chóng-sī uī-tô͘ ê chheh tē-it hó, koh tio̍h siông-siông chhoā gín-á khì phok-bu̍t-koán khoàⁿ-khoàⁿ chheh(誤植cheh), hō͘ i ê kiàn-sek ná toā.
(Boē-oân)
漢羅（Ùi原文改寫）
教囝的法度
第三章
賞罰
一家親像這國。老父做王，老母做王后，著賞罰有章程親像佇國按呢。設使有這个王共人講，寡人看百姓若著傷，不忍看伊teh受刑罰，人的確叫伊做戇的王，伊的國內也的確ta̍uh-ta̍uh擾亂，做父母也親像按呢，若kan-ta疼伊的囝。攏無責督伊，人也的確叫伊做戇的父母，箴言講，箠仔若無夠囝的身軀，無通講是疼，有人為著家己的快樂就好，無愛用好教示伊的囝兒，驚家己艱苦，愛看活過日。對按呢囝兒毋疼伊的父母，袂記得伊的父母的恩，紲變做忤逆，若責罰囝兒siuⁿ嚴，有害著囡仔，若款待囝兒siuⁿ寬，就會受災厄。
賞罰著拄好，呵咾哄喝的話，做父母的人，毋通常常講。因為囡仔行伊所應該行的，就無teh向望父母的呵咾，親像食飯洗面chiah 的代誌。這攏是囡仔逐日所著做的若常常呵咾伊，無久就看這个呵咾做平常的，若常常哄喝也親像按呢。袂曉得的父母看呵咾哄喝攏無利益，就用別項的法度來勉勵伊，有的 共囡仔講，我的金囝ah，你若去做，我就欲糖仔予你，有的講，你這个歹囝，你若毋去做，我就欲拍你。設使囡仔貪著利益才欲做，下擺伊的確欲講，你代先糖仔予我，我才來去做，若是囡仔看父母哄喝了，攏無閣責罰伊。就伊忤逆的心比以前閣較大。所以凡若囡仔若欲呵咾伊，抑是欲嫌伊，攏著拄好毋通過頭。
賞罰出佇父母的意見；總是著照囡仔的所行來判斷，毋通照父母的歡喜受氣。也毋通偏私疼囝兒。早有這个著冊的人捌講，Gâu閣明理的父母，有一項教示囡仔第一好的法度，就是囡仔行好事，斷毋通用錢來賞伊，m̄-nā按呢。也毋通用糖仔予伊：因為驚了伊大漢的時，成做一个貧憚貪食的人。獨獨用thit-thô物賞伊，第一有利益，一項予伊的心歡喜，一項予伊的性情得著奇款，會讀冊，就用合伊所讀的冊來予伊，總是畫圖的冊第一好，閣著常常chhoā囡仔去博物館看看冊，予伊的見識ná大。
(袂完)