成聖的要緊
Chiâⁿ-sèng ê iàu-kín
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 芥菜子 |
| 卷期 | 第 19 號 |
| 日期 | 1927/8 |
| 頁數 | 2-3 |
白話字（原文數位化）
Chiâⁿ-sèng ê iàu-kín
Lô-má 12 chiuⁿ 1 chat.
Pó-lô khó͘-khǹg Lô-má ê hiaⁿ-tī ài in tio̍h chiâⁿ-sèng iā-sī khó͘-khǹg lán tio̍h chiâⁿ-sèng. Lūn chit ê ài lán chiâⁿ-sèng ê tō-lí, thang kóng sī Ki-tok-kàu ê kà-sī, tē-it sūn-choân, Jû-kàu sui-bóng tiàm tī Sek-kàu, tō-kàu ê téng-bīn, iáu-kú chit khoán ê tō-lí bē tit-tio̍h siông-sè, sui-bóng sèng-jîn, iā m̄ káⁿ chhìn-chhái kóng. Pó-lô tī chia káⁿ bêng-bêng kóng, khó-kiàn I ū tit-tio̍h chit ê toē-pō͘ chiū-sī tuì Sèng Sîn lâi sêng chiū-ê.
Lūn chiâⁿ-sèng sím-mi̍h ì-sù.
Chiâⁿ-sèng, chiū-sī sèng, Siān, lóng chiâu-pī, bô koh hoān-choē bô ji̍p bê-he̍k, Chit khoán ê kang-hu m̄ sī lâng ê kuì-la̍t só͘ oē chiâⁿ ê, to̍k-to̍k Sèng Sîn oē chiâⁿ ê. Sèng Sîn oē chō-chiū lán, hō͘ lán kàu tī chiâⁿ-sèng ê toē-pō͘. án-ni lán lâng m̄-thang oá-khò ka-kī ê khuì-la̍t, lâi ǹg-bāng chiâⁿ-sèng, tio̍h oá-khò Sèng Sîn ê hû-chō͘.
Lūn chiâⁿ-sèng sím-mi̍h lâng tio̍h ū.
Chiū-sī Ki-tok-tô͘ só͘ tio̍h ū ê, cháiⁿ-iūⁿ án-ni, in-uī Sèng-keng bêng-bêng kóng. Kéng-tiàu lín ê chiū-sī Sèng(誤植Seng), lín iā tio̍h sèng, lâng kì-jiân sìn Iâ-so͘ lâi tit-tio̍h chheng-gī, m̄-thang thêng pō͘, tio̍h koh chìn-hêng kàu chiâⁿ-sèng, chiah oē kham-tit chheng-choè sèng-tô͘ chheng-gī, chiū-sī Siōng-tè pe̍h-pe̍h si-un tī sìn-chiá, Chiâⁿ-sèng, chiū-sī sìn-chiá kui êng-kng tī thiⁿ-pē.
Sèng-keng ta̍uh-ta̍uh khó͘-khǹg sìn-tô͘ tio̍h bêng-pe̍k Chú ê chí-ì, ài lín chiâⁿ-sèng, lán lâng tuì soè-hàn kàu toā hàn, sin-khu kap tì-huī ji̍t-ji̍t ke-thiⁿ tióng-tāi, siat-sú kàu tióng-sêng bô hó thang kóng, iā boē-oē chū-li̍p ka-kī, kiàn-li̍p pa̍t lâng lâi pò-tap pē-bú ê un, sī sit-lo̍h choè kiáⁿ ê pún-hūn, chhin-chhiūⁿ hàu-keng só͘ kóng, “li̍p sin hêng tō, iông hêng ū hō sè hàng chi chiong iā” taⁿ lán choè Siōng-tè ê kiáⁿ-luī, iā-sī án-ni, tē-it iàu-kín tio̍h 2 hāng. 1. Tit-tio̍h chheng-gī. 2. Tit-tio̍h chiâⁿ-sèng. Koh-chài tī chiâⁿ-sèng ê tiong-kan him-bō͘ tit-tio̍h Sèng Sîn ê chhiong-moá, téng-bīn thang kui êng-kng Siōng-tè, ē-bīn thang choè sè-kan ê kng lâi chiò lâng.
án-ni chiū bô kiàn-siàu choè kiáⁿ ê pún-hūn.
Lūn chiâⁿ-sèng ū sím-mi̍h hoat-tō͘ thang tit-tio̍h, ū 2 ê hó hong-hoat.
-
oá-khò Chú Iâ-so͘ lâi iâⁿ choē-ok, lūn Chú sio̍k-choē ê kang, tē-it oân-choân, chit ê chiū-sī Sìn-tô͘ só͘-chai só͘ sìn ê. Só͘-í ta̍k-lâng tio̍h chhim-sìn, tio̍h kiû iâⁿ-kè choē-ok ê koân.
-
Tû khì chó͘-gāi, lâi hiàn sin sim tī Chú, chó͘-gāi sī sím-mi̍h, chiū-sī lán só͘ khoài hoān-tio̍h ê choē, kap su-io̍k, chóng-sī ài beh tû khì, tio̍h tāi-seng chiong hoé-kái 2 jī si̍t-hêng, ēng ka-kī kū sî ê só͘-kiâⁿ kap Chú tâng tèng tī si̍p-jī-kè. Só͘-í choè sìn-tô͘ ê èng-tong chū seng lâi hiàn sin sim tī Chú, chū-jiân oē chìn chiâⁿ-sèng ê toē-uī.
Nā tit-tio̍h chiâⁿ-sèng, ū sím-mi̍h lī-ek, ū 3 hāng thang tit-tio̍h.
-
Thang ha̍k-si̍p lâi chhim bat Ki-tok. Pí-tek kóng, tio̍h kiû choē-choē tit-tio̍h un-sù, chhim chai lán ê Chú Iâ-so͘ Ki-tok.
-
Thang tit-tio̍h lán ê Chú só͘ siúⁿ(誤植siùⁿ)-sù ê pêng-an. Chú só͘ siúⁿ-sù ê pêng-an ū 2 hāng.
-
Chú koh kóng, Hoān-nā lô-khó͘ pē tāng-tàⁿ ê, tio̍h chiū-kūn goá, goá beh siúⁿ-sù lí pêng-an.
-
Chú koh kóng, goá ê sim un-jiû khiam-sùn, lín pē goá ê taⁿ lâi o̍h goá, chiū lín ê sim tek-khak tit-tio̍h pêng-an.
-
Thang hióng-siū un-tián ê pò-siúⁿ. Pó-lô kā Ko-lîm-to ê lâng kóng, chhut-la̍t kèng cháu, choè thâu ê chún(誤植chun)-chat ǹg-bāng tit-tio̍h koài phái ê bián-liû, bô chhin-chhiūⁿ lán só͘ kiû, chiū-sī boē pāi-hoāi ê bián-liû.
Taⁿ lán choè Sìn-tô͘ ta̍k lâng tio̍h him-bō͘ chiâⁿ-sèng, lâi ǹg-bāng tit-tio̍h chiah ê hok-khì. Tio̍h tit-tio̍h chin-si̍t ê chiâⁿ-sèng chiah oē tit-tio̍h, chin-si̍t ê chiâⁿ-sèng sī lāi-sim ê chiâⁿ-sèng, m̄ sī goā-phê ê chiâⁿ-sèng. Kūn-lâi ū chi̍t chióng ê sìn-tô͘ khui chhuì tio̍h, chiū-sī Sèng-kiat, chiū-sī chū-chheng kóng in ta̍k ê ū chiâⁿ-sèng, nā khoàⁿ in ê kú-tiōng, kap thiaⁿ in ê só͘ kóng lī-khui chiâⁿ-sèng ê lō͘ put-chí hn̄g.
In-uī in put-sî khoa-kháu ka-kī ê hó, phoe-phêng pa̍t lâng ê phái, chē teh thiaⁿ lâng o-ló i pún-sin. Kiau chhé pat lâng ê sū-gia̍p, lâm-sám kóng lâng ê sī hui, kap pa̍t ê sìn-tô͘ boē choè tit pêng-iú, chit khoán kóng sī Sèng-kiat chin oh-tit sìn(sin), put-kò thang kóng sī chi̍t ê khàn pán ê Sèng-kiat nā-tiāⁿ. Lán m̄-thang o̍h chit khoán, tio̍h hi-bōng tit-tio̍h chin-si̍t ê Sèng-kiat chiâⁿ-sèng chiah ū lō͘-ēng.
漢羅（Ùi原文改寫）
成聖的要緊
羅馬12章1節。
保羅苦勸羅馬的兄弟愛in著成聖也是苦勸咱著成聖。論這个愛咱成聖的道理，通講是基督教的教示，第一順全，儒教雖罔tiàm佇Sek教，道教的頂面，iáu-kú這款的道理袂得著詳細，雖罔聖人，也毋敢凊彩講。保羅佇遮敢明明講，可見伊有得著這个地步就是對聖神來成就的。
論成聖甚物意思。
成聖，就是聖，善，攏齊備，無閣犯罪無入迷惑，這款的工夫毋是人的氣力所會成的，獨獨聖神會成的。聖神會造就咱，予咱到佇成聖的地步。按呢咱人m̄通倚靠家己的氣力，來向望成聖，著倚靠聖神的扶助。
論成聖甚物人著有。
就是基督徒所著有的，怎樣按呢，因為聖經明明講。揀召恁的就是聖，恁也著聖，人既然信耶穌來得著稱義，毋通停步，著閣進行到成聖，才會堪得稱做聖徒稱義，就是上帝白白施恩佇信者，成聖，就是信者歸榮光佇天父。
聖經ta̍uh-ta̍uh苦勸信徒著明白主的旨意，愛恁成聖，咱人對細漢到大漢，身軀佮智慧日日加添長大，設使到長成無好通講，也未會自立家己，建立別人來報答父母的恩，是失落做囝的本份，親像孝經所講，「立身行道，揚行有號細項之終也」taⁿ咱做上帝的囝類，也是按呢，第一要緊著2項。1、得著稱義。2、得著成聖。閣再佇成聖的中間欣慕得著聖神的充滿，頂面通歸榮光上帝，下面通做世間的光來照人。
按呢就無見笑做囝的本份。
論成聖有甚物法度通得著，有2个好方法。
1、倚靠主耶穌來贏罪惡，論主贖罪的工，第一完全，這个就是信徒所知所信的。所以逐人著深信，著求贏過罪惡的權。
2、除去阻礙，來獻身心佇主，阻礙是甚物，就是咱所快犯著的罪，佮私慾，總是愛欲除去，著代先將悔改2字實行，用家己舊時的所行佮主同釘佇十字架。所以做信徒的應當自先來獻身心佇主，自然會進成聖的地位。
若得著成聖，有甚物利益，有3項通得著。
1、通學習來深捌基督。彼得講，著求濟濟得著恩賜，深知咱的主耶穌基督。
2、通得著咱的主所賞賜的平安。主所賞賜的平安有2項。
1、主閣講，凡若勞苦背重擔的，著就近我，我欲賞賜你平安。
2、主閣講，我的心溫柔謙遜，恁背我的擔來學我，就恁的心的確得著平安。
3、通享受恩典的報賞。保羅共哥林多的人講，出力敬走，做頭的撙節向望得著koài phái的冕旒，無親像咱所求，就是袂敗壞的冕旒。
Taⁿ咱做信徒逐人著欣慕成聖，來向望得著chiah的福氣。著得著真實的成聖才會得著，真實的成聖是內心的成聖，毋是外皮的成聖。近來有一種的信徒開嘴著，就是聖潔，就是自稱講in逐个有成聖，若看in的kú-tiōng，佮聽in的所講離開成聖的路不止遠。
因為in不時誇口家己的好，批評別人的歹，坐teh聽人呵咾伊本身。驕chhé 別人的事業，lâm-sám講人的是非，佮別的信徒未做得朋友，這款講是聖潔真oh得信，不過通講是一个看板的聖潔nā-tiāⁿ。咱毋通學這款，著希望得著真實的聖潔成聖才有路用。