好膽，好膽認基督

Hó-táⁿ, hó-táⁿ jīn Ki-tok

文獻資訊

項目	資料
作者	明有德 Bêng Iú-tek
卷期	芥菜子
卷期	第 19 號
日期	1927/8
頁數	14

白話字（原文數位化）

“Hó-táⁿ, hó-táⁿ jīn Ki-tok”

Tī 1857 nî ū chit ê siàu-liân lâng miâ kiò Dudley Tyne.  Chit ê lâng sī tī Huì-hú ê Sèng-kong-hoē choè bo̍k-su.  Hit-sî ê lâng ū teh gī-lūn lô͘-lē ê sū.  I chin hoán-tuì kiò hia ê lâng m̄-thang pháiⁿ-khoán-thāi lô͘-lē.  I ê kàu-hoē thiaⁿ liáu ū lâng put-chí siū-khì, kā i koáⁿ-chhut kàu-hoē.  I tuì hit-tia̍p chiū khì kap hiah ê lô͘-lē saⁿ-kap choè kang.  I chiū siūⁿ kan-ta ēng chhuì kóng lí-lūn sī bô lī-ek, tio̍h si̍t-hêng sī iàu-kín.  Só͘-í I ū chhut-la̍t khì kap in choè kang.

I chi̍t-ji̍t in-uī beh hiahN be̍h khì, koah be̍h-kíⁿ I ê chhiú ū hō͘ hit ê khì-khū ka tn̄g chi̍t-ki.  I lâu chin choē huih, teh beh sí, tiām-tiām lóng bô khoà-jū.  I ê choè kang phoāⁿ mn̄g i kóng, “Lí ū sím-mi̍h oē ài kā lí ê chhin lâng kóng bô?”  I ìn kóng, “Goá ê chhin-lâng sī sè-kan só͘ ū ê siàu liân-lâng, goá ài khó͘-khǹg, hoan-hù in chi̍t-kù, chiū-sī:

“Hó-táⁿ(誤植tāⁿ), hó-táⁿ jīn Ki-tok”.

āu-lâi ū chi̍t ê lâng miâ kiò George Duffeld thiaⁿ-kìⁿ I só͘ uī-giân chi̍t-kù oē siū kám-kek, tuì án-ni lâi choè chi̍t siú ê si.

漢羅（Ùi原文改寫）

「好膽，好膽認基督」

佇1857年有這个少年人名叫Dudley Tyne。這个人是佇Huì-hú 的聖公會做牧師。彼時的人有teh議論奴隸的事。伊真反對叫遐的人毋通歹款待奴隸。伊的教會聽了有人不止受氣，共伊趕出教會。伊對彼霎就去佮遐的奴隸相佮做工。伊就想kan-ta用喙講理論是無利益，著實行是要緊。所以伊有出力去佮in做工。

伊一日因為欲hiahN麥去，割麥枝，伊的手有予彼个器具ka斷一隻。伊流真濟血，teh欲死，恬恬攏無掛慮。伊的做工伴問伊講，「你有甚麼話愛共你的親人講無？」伊應講，「我的親人是世間所有的少年人，我愛苦勸，吩咐in一句，就是：

「好膽，好膽認基督」。

後來有一個人名叫George Duffeld聽見伊所遺言一句話受感激，對按呢來做一首的詩。