重頭生的要緊
Têng-thâu-siⁿ ê iàu-kín
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 芥菜子 |
| 卷期 | 第 18 號 |
| 日期 | 1927/7 |
| 頁數 | 2-4 |
白話字（原文數位化）
Têng-thâu-siⁿ ê iàu-kín
Iok-hān 3 chiuⁿ 3 chat.
Iâ-so͘ tī sè-kan ê sî. Ū chi̍t ê Iû-thài ê koaⁿ-lī miâ kiò Nî-ko-tì-bú, mî-sî lâi chiū-kūn i. Chú Iâ-so͘ ēng têng-thâu-siⁿ iàu-kín ê tō-lí lâi kà-sī i, tī Sèng-keng ê tiong-kan, kà-sī lâng ê tō-lí ū chin choē; chóng-sī oē ji̍p lâng ê hī-khang, tōng lâng ê sim-koaⁿ, bô m̄-sī chit khoán. án-ni chit khoán ê tō-lí, chiàⁿ-sī kiù-sè ê liông-giân, iā sī jîn-seng pit-iàu ê toā būn-toê. Chú Iâ-so͘ kóng-chhut chit khoán ê tō-lí, put-tàn koan-hē Nî-ko-tì-bú, iā koan-hē tī lán tāi-ke. Chái-iūⁿ hō-choè têng-thâu-siⁿ.
Têng-thâu-siⁿ m̄ sī lâng ê têng chhut-sì, chiū-sī jîn-lêng ê sin-seng, in-uī lâng ê choē-ok chhim tāng, sui-bóng oa̍h, chhin-chhiūⁿ sí, ta̍k-ê tio̍h soé sim hoé choē, kái-ok chhian siān, chhut-la̍t tû-khì kū-sî só͘ jiám-tio̍h ê ù-oè, lâi chìn-hêng chū-sin ê lō͘, chhin-chhiūⁿ sí ê koh-oa̍h, án-ni hō-choē têng-thâu-siⁿ.
án-ni chit ê têng-thâu-siⁿ ê tō-lí chin toā iàu-kín, sī choè lán lâng só͘ ǹg-bāng lâi-sè hióng-hok ê toē-ki, iā sī tit-kiù ê thâu chi̍t hāng iàu-kín, lâng nā boē bêng chit ê têng-thâu-siⁿ ê tō-lí, koat-toàn boē-oē bêng-pe̍k Sèng-keng tiong it-chhè ê biāu-lí.
Koh-chài chit ê têng-thâu-siⁿ ê tō-lí, iā thang tû-khì kó͘-kim it-chhè ê siâ-kàu, kap kok-chéng ê bê-sìn.
Kiù-chú tong-sî cháiⁿ-iūⁿ chiong chit ê têng-thâu-siⁿ ê tō-lí lâi tuì Nî-ko-tì-bú kóng, bô tuì pa̍t-lâng kóng, tek-khak ū ì-sù tī-teh, in-uī Kiù-chú ê kà-sī lâng, sī khoàⁿ lâng ê khiàm-kheh. I bô tuì Sat-má-lī-a chhiūⁿ-chuí ê hū-jîn-lâng kóng, iā bô tuì soè-lī ê Má-thài kóng iā bô tuì soè-koan-tiúⁿ Sat-kai kóng. Nā tuì chiah ê lâng kóng, in chiū khah khoài bêng-pe̍k, in-uī chiah ê, pêng-sò͘ kiâⁿ chē-chē hāng ê pháiⁿ, chiū ka-kī oē chū-chek, hoé-kái lâi têng-thâu-siⁿ.
Chóng-sī Nî-ko-tì-bú si̍t-chāi sī tong-sî ê gī-jîn, kok-tiong lóng chun-kèng i, mih-sái tio̍h hoé-kái lâi téng-thâu-siⁿ.
án-ni lâng tio̍h bêng-pe̍k, sè-kài chiūⁿ bô chi̍t ê bô kè-sit ê lâng, put-lūn ū tō-tek, ū ha̍k-būn, ū phín-hēng, ū châi-lêng, lóng tio̍h chai tio̍h hoán-hoé sìn-khò Iâ-so͘ lâi kiû têng-thâu-siⁿ.
Tī lán kàu-hoē lāi ê sìn-chái, ū chi̍t chióng khoàⁿ liáu chhin-chhiūⁿ têng-thâu-siⁿ, kî-si̍t iáu bē têng-thâu-siⁿ. Siông-siogn5 bat thiaⁿ-kìⁿ lâng kóng, goá ū chia̍p-chia̍p lâi pài-tn̂g lé-pài, chiū-sī têng-thâu-siⁿ; iáu-bē, chit khoán ê lâng, sǹg sī chia̍p-chia̍p lâi lé-pài thiaⁿ tō-lí nā-tiāⁿ, boē-tit thang kóng sī têng-thâu-siⁿ.
Ū sî bat thiaⁿ-kìⁿ lâng kóng, goá í-keng soé-lé liáu, chiū-sī têng-thâu-siⁿ; iáu-bē, soé-lé chiū-sī chìn kàu ê ji̍p-mn̂g, kap têng-thâu-siⁿ bô kan-sia̍p. iā bat thiaⁿ-kìⁿ lâng kóng, goá í-keng ū chia̍h boán-chhan, chiū-sī têng-thâu-siⁿ; iáu-bē, chia̍h boán-chhan sī kì-liām Iâ-so͘ thoè lán siū sí ê un, m̄-sī thêng-thâu-siⁿ ê sū. iā bat thiaⁿ-kìⁿ lâng kóng, goá ji̍t-mî ū kî-tó bô soah, chiū-sī têng-thâu-siⁿ; iáu-bē, kî-tó chiū-sī teh kiû Siōng-tè kap i siong-thong, kap têng-thâu-siⁿ bô saⁿ-tâng. Têng-thâu-siⁿ; tàu-tí sī sím-mi̍h khoán, chiū-sī koé-oāⁿ kū-sî ê khoán, lâi chìn-hêng chū-sin ê lō͘. Só͘-í lâng pài Siōng-tè, nā bô pàng-sak kū-sî ê siâ-su̍t īⁿ-toan, koat-toàn m̄-sī têng-thâu-siⁿ.
Kiám-chhái ū lâng ài kóng, goá bô choè pháiⁿ-sū, mih-sái tio̍h têng-thâu-siⁿ; kóng chit khoán ū toā m̄ tio̍h. Nî-ko-tì-bú kiám ū kiâⁿ pháiⁿ-sū. I sī hó lâng, koh choè koaⁿ-lī, iā hō͘ kok-tiong só͘ khim kèng. Chú Iâ-so͘ iáu-kú kiò i tio̍h têng-thâu-siⁿ; hô-hòng lán lâng só͘ kiâⁿ put-kip Nî-ko-tì-bú, kiám m̄ tio̍h kín-kín lâi siūⁿ têng-thâu-siⁿ mah.
Taⁿ chit ê têng-thâu-siⁿ; kì-jiân sī hiah iàu-kín ê būn-toê, lán lâng tek-khak tio̍h tuì-tiōng, in-uī Chú Iâ-so͘ kóng, nā bô têng-thâu-siⁿ boē-oē ji̍p thian-kok, tī sèng-keng tiong ū 3 ê só͘-chāi só͘ kóng, kap chit ê kháu-khì saⁿ-tâng.
1.
Lō͘-ka 13 chiuⁿ 3 chat.
Goá kóng, m̄ sī án-ni, lín chiah ê, nā bô hoán-hoé koé-pìⁿ, iā lóng tek-khak bia̍t-bô.
2.
Má-thài 18 chiuⁿ 3 chat.
Goá si̍t-si̍t kā lín kóng, bô tò-tńg chhin-chhiūⁿ gín-á, chiū boē tit ji̍p thian-kok.
3.
Má-thài 5 chiuⁿ 20 chat.
Goá kā lín kóng, siat-sú lín ê gī, bô khah-iâⁿ Tha̍k-chheh-lâng, Hoat-lī-sài-lâng ê gī, koat-toàn boē tit ji̍p Thian-kok.
Í-siōng chit 3 uī só͘ kóng, kháu-khì saⁿ-tâng pîⁿ-pîⁿ sī kóng nā bô án-ni, chiū boē-oē án-ni, chit khoán ê tō-lí, lán tio̍h khoàⁿ-choè iàu-kín. Goān lán tāi-ke tio̍h ka-kī séng-chhat, khoàⁿ lán kó-jiân ū tit-tio̍h chin têng-thâu-siⁿ á-bô, m̄ thang chi̍t nî kè chi̍t nî, bóng kè, lâi ka-kī sit-gō͘. In-uī Iâ-so͘ kóng. Nā bô têng-thâu-siⁿ, boē-oē ji̍p Siōng-tè ê kok.
漢羅（Ùi原文改寫）
重頭生的要緊
約翰3章3節。
耶穌佇世間的時。有一个猶太的官吏名叫Nî-ko-tì-bú，暝時來就近伊。主耶穌用重頭生要緊的道理來教示伊，佇聖經的中間，教示人的道理有真濟；總是會入人的耳空，動人的心肝，無毋是這款。按呢這款的道理，正是救世的良言，也是人生必要的大問題。主耶穌講出這款的道理，不但關係Nî-ko-tì-bú，也關係佇咱大家。怎樣號做重頭生。
重頭生毋是人的重出世，就是jîn-lêng 的新生，因為人的罪惡深重，雖罔活，親像死，逐个著洗心悔罪，改惡遷善，出力除去舊時所染著的污穢，來進行自新的路，親像死的閣活，按呢號做重頭生。
按呢這个重頭生的道理真大要緊，是做咱人所向望來世享福的地基，也是得救的頭一項要緊，人若袂明這个重頭生的道理，決斷袂會明白聖經中一切的 妙理。
閣再這个重頭生的道理，也通除去古今一切的邪教，佮各種的迷信。
救主當時怎樣將這个重頭生的道理來對Nî-ko-tì-bú講，無對別人講，的確有意思佇teh，因為救主的教示人，是看人的欠缺。伊無對撒馬利亞chhiūⁿ水的婦人人講，也無對soè-lī 的馬太講也無對soè-koan-tiúⁿ撒該講。若對遮个人講，in就較快明白，因為遮个，平素行濟濟項的歹，就家己會自責，悔改來重頭生。
總是Nî-ko-tì-bú實在是當時的義人，國中攏尊敬伊，mih-sái著悔改來重頭生。
按呢人著明白，世界上無一个無過失的人，不論有道德、有學問、有品行，有才能，攏著知著反悔信靠耶穌來求重頭生。
佇咱教會內的信者，有一種看了親像重頭生，其實猶袂重頭生。常常捌聽見人講，我有chia̍p-chia̍p來拜堂禮拜，就是重頭生；猶未，這款的人，算是chia̍p-chia̍p來禮拜聽道理nā-tiāⁿ，袂得通講是重頭生。
有時捌聽見人講，我已經洗禮了，就是重頭生；猶未，洗禮就是進到的入門，佮重頭生無干涉。也捌聽見人講，我已經有食晚餐，就是重頭生；猶未，食晚餐是記念耶穌替咱受死的恩，毋是重頭生的事。也捌聽見人講，我日暝有祈禱無煞，就是重頭生；猶未，祈禱就是teh求上帝佮伊相通，佮重頭生無相同。重頭生；到底是啥物款，就是改換舊時的款，來進行自新的路。所以人拜上帝，若無放sak舊時的邪術異端，決斷毋是重頭生。
Kiám-chhái有人愛講，我無做歹事，mih-sái著重頭生；講這款有大毋著。Nî-ko-tì-bú kiám有行歹事。伊是好人，閣做官吏，也予國中所欽敬。主耶穌iáu-kú叫伊著重頭生；何況咱人所行不及 Nî-ko-tì-bú，敢毋著緊緊來想重頭生mah。
今這个重頭生；既然是遐要緊的問題，咱人的確著對重，因為主耶穌講，若無重頭生袂會入天國，佇聖經中有3个所在所講，佮這个口氣相同。
1、路加13章3節。
我講，毋是按呢，恁遮个，若無反悔改變，也攏的確滅無。
2、馬太18章3節。
我實實共恁講，無倒轉親像囡仔，就袂得入天國。
3、馬太5章20節。
我共恁講，設使恁的義，無khah贏讀冊人，法利賽人的義，決斷袂得入天國。
以上這3 位所講，口氣相同平平是講若無按呢，就袂會按呢，這款的道理，咱著看做要緊。願咱大家著家己省察，看咱果然有得著真重頭生抑無，毋通一年過一年，罔過，來家己失誤。因為耶穌講。若無重頭生，袂會入上帝的國。