我攻擊牧者羊群就四散
Goá kong-kek bo̍k-chiá iûⁿ-kûn chiū sì-soàⁿ
文獻資訊
| 項目 | 資料 |
|---|---|
| 作者 | 陳添旺 Tân Thiam-ōng |
| 卷期 | 芥菜子 |
| 卷期 | 第 18 號 |
| 日期 | 1927/7 |
| 頁數 | 4-6 |
白話字（原文數位化）
Goá kong-kek bo̍k-chiá iûⁿ-kûn chiū sì-soàⁿ
Má-thài 26: 31; Khó 14: 27, Sat-ka-lī-a 13: 7.
Chit kù oē sím-mi̍h lâng kóng ê? Iâ-so͘. Sím-mi̍h sî kóng ê? Beh lîm-lān ê sî kóng, lâi kéng-kài ha̍k-seng. Siáⁿ-sū án-ni kóng? Sī ài ín Sian-ti Sat-ka-lī-a tit-tio̍h Siōng-tè be̍k-sī ê û-giân; tāi-seng chí-bêng Bí-sài-a beh lîm-kàu, āu-lâi kó-jiân ū. Soà siū lâng kong-kek lâi chiâⁿ Sîn ê chí-ì. I ê ha̍k-seng beh sì-soàⁿ tô-cháu.
M̄-nā chí ha̍k-seng sì-soàⁿ, iā chí Iû-thài boa̍t-kéng ê sî, peh-sìⁿ beh tú-tio̍h chai-iong, beh bia̍t-bô, kàu saⁿ-hūn ê nn̄g-hūn, lâu teh ê chi̍t-hūn sī hiah ê sêng-si̍t ê. In-uī chit ê Sian-ti sī, tng Iû-thài beh boa̍t-tiâu ê sî-tāi. Hit-sî hong-sio̍k chin hú-pāi, kiông ê khi-hū loán-jio̍k ê, toā chia̍h soè, khi-pîn tiōng-hù; ū koân-uī ê tham-sim, siū-lâng ê pò͘-lō͘ (iú-chiân chiá seng, bû-chiân chiá sí).
Bô chiàu kong-lí teh kiâⁿ-choè, khi-hū sàn-hiong lâng, tì-kàu iú-oan bû-sin, pe̍h-pe̍h siū-khut, chhin-chhiūⁿ Sian-ti Í-sài-a ê sî-tāi.
Choān tiōng puî-su lī-ek ka-kī, bô kò͘ tāi-kio̍k, bô-sioh choân-kûn.
Taⁿ sī-toā í-keng put-chèng, tham-sim, siū-iū, bô chiàu kong-lí, só͘-í sī-soè ko͘-put-chiong ū ê chiū tio̍h chēng-iū pa-kiat; lâng kóng. Siōng-uī teh choè, sī-soè chiū tio̍h o̍h lah, nā bô án-ni choè chiū boē-tit seng-oa̍h.
Khó-lîn-tāi ah! Tong-kio̍k chiá bē. Si-jîn ū kóng. 不識爐山真面目, 只因身在爐山中.
(Put sek Lō͘-san chin biān-bo̍k, chí in sin chāi Lô͘-san tiong).
Lō͘-san sī Tiong-kok ê bêng-só͘, nā tiàm tī hit lāi-tiong chiū m̄-chai hit ê soaⁿ ê suí-bái; nā lī nn̄g-pah lí hn̄g lâi khoàⁿ chiū chai suí ê chin-chiàⁿ suí, bái ê chin-chiàⁿ bái, suî-sî hun-bêng. Lâng kóng, khiā soaⁿ khaòⁿ khah cheng, si̍t-chāi sī bô chhò.
Hiah-ni̍h bô thian-lí, o͘-àm moá-moá, iū ké sian-ti teh soan-thoân, ta̍k-hāng hūn-cha̍p soà boē hun-piat hó-pháiⁿ chin-ké. Só͘-í chin ê Sian-ti Sat-ka-lī-a hōng Siōng-tè ê bēng-lēng kà-sī peh-sìⁿ; tāi-seng chí Ki-tok beh lîm-kàu, chín-kiù bān-bîn ê lêng-hûn, sī toā lêng-hûn ê Kiù-chú.
āu-lâi hō͘ pháin-lâng só͘-hāi, iā kó-jiân èng-giām, ná Sū-thê-hoán beh siū hāi ê káng-tâi. Sù-tô͘ 7.
Koh gō͘-pah goā-nî chiū si̍t-hiān Ki-tok lîm-kàu piàn-thoân chin-lí; hián-bêng Siōng-tè ê chin-siōng, khó͘-khǹg peh-sìⁿ tio̍h kín kái-ok chhian-siān, kan-chèng hit-sî kuí-nā ê tóng-luī, put-hoat kap lāi-sim ê pháiⁿ; soà hō͘ pháiⁿ-tóng ê koân-sè khah-iâⁿ. Bô͘-hāi ê sî teh-beh kūn, só͘-í Iâ-so͘ beh kūn lîm-guî ê sî chài ín sian-ti ê ū-giân kā ha̍k-seng soat-bêng, bián-tit hō͘ in sit-chì, sit-bāng.
āu-lâi ha̍k-seng kó-jiân sì-soàⁿ tô-cháu, Iâ-so͘ sī chin ê Bo̍k-chiá, thiàⁿ-sioh choân-kûn ê lêng-hûn, sui-jiân thoè bān-bîn ê choē sí iā bô oàn-chhoeh, hoán-tńg thoè pháiⁿ-lâng kî-tó.
Koh-chài oa̍h ê sî bat kóng, Kò͘-chhiàⁿ ê m̄-sī chin ê bo̍k-chiá, bô sioh choân-kûn, sī kan-ta uī-tio̍h thàn-chîⁿ tō͘-chia̍h nā-tiāⁿ; nā khoàⁿ chhâi-lông kàu chiū tô-cháu, chhut-chāi iûⁿ-kûn sì-soàⁿ si̍t-lo̍h kàu tī léng-tām bô phoàⁿ; án-ni boē-ti̍t heng-sēng iûⁿ-kûn ê chèng-chhek.
ài hō͘ iûⁿ-kûn heng-sēng, tio̍h ū saⁿ-hāng, che sī thih-pán put-e̍k ê.
- Bo̍k-chiá ài chû-sim, un-sûn, kong-pêng, chèng-ti̍t, khiam-pi, hô-pêng, khoan-sù, liông-siān, chún-chat, bô tô͘-bô͘ choan lī-ek ka-kī, iā tio̍h choan-bū lī-ek pa̍t-lâng, in-uī lī-ek lâng chiū-sī lī-ek ka-kī, hāi lâng chiū-sī hāi ka-kī).
(Siat-sú sī-toā káⁿ tò-hoán choè, chū-jiân sī-soè put-tek-í chiū oē-hiáu o̍h i só͘-kiâⁿ).
- ím si̍t-liāu ài hong-hù, iā tio̍h ha̍p-sî, iā tio̍h ha̍p-ēng, chiah oē hō͘ iûⁿ-kûn bô iau, bô chhuì-ta: siat-sú ēng bô ha̍h-sî bô ha̍p-ēng ê chia̍h-liāu lâi chhī iûⁿ-á chiū oē kàu bia̍t-bô tio̍h-che!
(Sèng-jîn kóng, chhe peh-sìⁿ chiàu-sî, thiàⁿ peh-sìⁿ, jîn-sîn chhin-chhiūⁿ sim-pak ê lâng).
- Iûⁿ-tiâu ài chheng-sóng, chhù-sū, ta-lī, bô hō͘ chhâi-lông iá-siù lâi siong-hāi, chiah oē an-sim bô kiaⁿ-hiâⁿ, m̄-thang hō͘ iûⁿ-kûn iau giàn koâⁿ, tam-tiâu, chiū oē tio̍h lo͘.
Nā ū si̍t-hiān í-siōng saⁿ-hāng ê hó só͘-choè, koáⁿ--i tó m̄ khì, mih-sái teh koaiⁿ-mn̂g that-lō͘; nā m̄ siu-chéng ta̍k-hāng hō͘ i hó-sè, soà tû-khì ta̍k-hāng ê siong-hāi, sui-jiân uî-chhiûⁿ kuí-nā tn̄g-koân, ēng thih-mn̂g, to ū lō͘ thang chhut-khì.
Phì-jū Tāi-pi̍t kā in lāu-pē kò͘ iûⁿ ê sî-chūn, ê chīn pún-hūn, bô sioh ka-kī.
Ngá-kok kā in tiūⁿ-lâng Lia̍p-pan chhī iûⁿ ta̍k-hāng chhù-sū, pún-sin kam-goān hi-seng kan-khó͘.
Siōng-tè khoàⁿ i ū chin-si̍t, uī-tio̍h pa̍t-lâng lâi hi-seng, khek-kí, soà ke bû-hān-liōng ê pē-sò͘ chiok-hok i. Nā tò-hoán khì choè chiū siū chiù-chó͘; bo̍k-chiá ka-kī kong-kek bo̍k-chiá, iûⁿ-kûn tio̍h chhiⁿ-kiaⁿ, chū-jiân hun-loān sún-sit.
(Sio̍k-gú kóng, Tiâu-lāi ta̍k gû-bú, chiū oē làu-the soàⁿ-tiâu).
Iâ-so͘ kóng, Kok nā kong-kek kok chiū boē chiâⁿ kok. Bêng-chú khì kìⁿ Liông-huī-ông, Ông kóng, Lí tuì hiah-hn̄g lâi ū sím-mi̍h thang lī-ek goá ê kok mah? Tāi-hu koaⁿ kóng, Ū sím-mi̍h thang lī-ek goá ê ke mah? Peh-sìⁿ kóng, Ū sím-mi̍h thang lī-ek goá pún-sin bô? Bêng-chú suî-sî phoàⁿ-bêng, siōng-hā saⁿ-chiⁿ siūⁿ lī-ek, bô kò͘ tāi-kio̍k, kok-ka guî-hiám lah. Si̍t-chāi sèng-jîn ê ko-kiàn. Chit ê lí ū kàu-gia̍h bêng thang choè kàm-kài.
Siat-sú bo̍k-chiá kong-kek bo̍k-chiá, chiū soe-bî ê ji̍t kàu lah, iûⁿ-kûn khoàⁿ-liáu chiū khó-lîn, sim-sng, m̄-goān tâng-kûn chū-chi̍p lâi lim chia̍h.
Sian-ti tit-tio̍h be̍k-sī lâi kóng-chhut chit ê toê-ba̍k, tāi-seng chí-bêng boa̍t-tāi ê ì-sù.
Iâ-so͘ ín-khí chí-bêng i pún-sin siū-hāi ê guî-hiám, iā kó-jiân ū èng-giām, sí koh-oa̍h chiūⁿ-thiⁿ, koh siúⁿ-sù Sèng Sîn chhiong-moá ha̍k-seng. Taⁿ beh tán-thāi sím-mi̍h sî Chú beh koh lim-kàu, hián-bêng I ê sîn-jiah koân-lêng hō͘ lâng sìn-ho̍k. Koh Sèng Sîn chhin-chhiūⁿ gō͘-sûn-choeh lâi heng-khí Tâi-oân ê kàu-hoē, koh ū thiàⁿ-sioh sì-pah goā-bān ê léng-hûn mah? Goān Chú hián-hiān. Á-bēng.
漢羅（Ùi原文改寫）
我攻擊牧者羊群就四散
馬太26：31；可 14：27，撒迦利亞13：7。
這句話啥物人講的？耶穌。啥物時講的？欲臨難的時講，來警戒學生。啥事按呢講？是愛引先知撒迦利亞得著上帝默示的預言；代先指明彌賽亞欲臨到，後來果然有。紲受人攻擊來成神的旨意。伊的學生欲四散逃走。
毋但指學生四散，也指猶太boa̍t-kéng的時，百姓欲拄著災殃，欲滅無，到三份的兩份，留 teh 的一份是遐的誠實的。因為這个先知是，當猶太欲boa̍t-tiâu 的時代。彼時風俗真腐敗，強的欺負軟弱的，大食細，欺貧重富；有高位的貪心，受人的布賂(有錢者，無錢者死)。
無照公理teh行做，欺負sàn-hiong人，致到有冤無申，白白受屈，親像先知以賽亞的時代。
Choân-tiōng肥私利益家己，無顧大局，無惜全群。
今序大已經不正，貪心，受累，無照公理，所以序細姑不將有的就著chēng-iū pa-kiat；人講。上位 teh做，序細就著學lah，若無按呢做就袂得生活。
可憐代 ah！當局者迷。詩人有講。不識爐（廬）山真面目，只因身在爐山中。(Put sik Lō͘-san chin biān-bo̍k，chí in sinchāi Lô͘-san tiong)。
廬山是中國的名所，若踮佇彼內中就毋知彼的山的媠bái；若離兩百里遠來看就知媠的真正媠，bái 的真正bái，隨時分明。人講，徛山看較cheng，實在是無錯。
遐爾無天理，烏暗滿滿，又假先知teh宣傳，逐項混雜紲袂分別好歹真假。所以真的先知撒迦利亞奉上帝的命令教示百姓；代先指基督欲臨到，拯救萬民的靈魂，是大靈魂的救主。
後來予歹人所害，也果然應驗，ná司提反欲受害的講台。使徒7。
閣五百外年就實現基督臨到遍傳真理；顯明上帝的真像，苦勸百姓著緊改惡遷善，干證彼時幾若个 tóng-luī，不法佮內心的歹；紲予歹黨的權勢較贏。謀害的時teh欲近，所以耶穌欲近臨危的時再引先知的預言共學生說明，免得予in失志、失望。
後來學生果然四散逃走，耶穌是真的牧者，疼惜全群的靈魂，雖然替萬民的罪死也無怨慼，反轉替歹人祈禱。
閣再活的時捌講，雇chhiàⁿ 的毋是真的牧者，無惜全群，是kan-ta為著趁錢度食nā-tiāⁿ；若看豺狼到就逃走，chhut-chāi羊群四散失-落到佇冷淡無伴；按呢袂得興盛羊群的政策。
愛予羊群興盛，著有三項，這是thih-pán put-i̍k的。
1、牧者愛慈心、溫純、公平、正直、謙卑、和平、寬恕、良善、撙節，無圖謀專利益家己，也著專務利益別人，因為利益人就是利益家己，害人就是害家己)。
(設使序大敢倒反做，自然序細不得已就會曉學伊所行)。
2、飲食料愛豐富，也著合時，也著合用，才會予羊群無枵，無喙焦：設使用無合時無合用的食料來飼羊仔就會到滅無著che！
(聖人講，差百姓照時，疼百姓，人臣親像心腹的人)。
3、羊寮愛清爽，次序，ta-lī，無予豺狼野獸來傷害，才會安心無驚惶，毋通予羊群枵giàn 寒，tam-tiâu，就會著lo͘。
若有實現以上三項的好所做，趕--伊倒毋去，mih-sái the關門窒路；若毋修整逐項予伊好勢，紲除去逐項的傷害，雖然圍牆幾若丈懸，用鐵門，都有路通出去。
譬喻大衛共 in老爸顧羊的時陣，的盡本份，無惜家己。
雅各共 in丈人Lia̍p-pan 飼羊逐項次序，本身甘願犧牲艱苦。
上帝看伊有真實，為著別人來犧牲，克已，紲加無限量的pē-sò͘祝福伊。若倒反去做就受咒詛；牧者家己攻擊牧者，羊群著生驚，自然紛亂損失。
(俗語講，牢內逐牛母，就會落胎散牢)。
耶穌講，國若攻擊國就袂成國。孟子去見梁惠王，王講，你對遐遠來有啥物通利益我的國mah？大夫官講，有啥物通利益我的家mah？百姓講，有啥物通利益我本身無？孟子隨時phoàⁿ明，上下相爭想利益，無顧大局，國家危險lah。實在聖人的高見。這个你有夠額明通做鑑戒。
設使牧者攻擊牧者，就衰微的日到lah，羊群看了就可憐，心酸，毋願同群聚集來lim食。
先知得著默示來講出這个題目，代先指明末代的意思。
耶穌引起指明伊本身受害的危險，也果然有應驗，死閣活上天，閣賞賜聖神充滿學生。今欲等待啥物時主欲閣臨到，顯明伊的神跡權能予人信服。閣聖神親像五旬節來興起台灣的教會，閣有疼惜四百外萬的靈魂mah？願主顯現。阿們。