造化的奧妙
Chō-hoà ê Ò-biāu
文獻資訊
| 項目 | 資料 |
|---|---|
| 作者 | 雪峰逸嵐 Soat-hong Iat-lâm |
| 卷期 | 芥菜子 |
| 卷期 | 第 15 號 |
| 日期 | 1927/4 |
| 頁數 | 6-7 |
白話字（原文數位化）
Chō-hoà ê Ò-biāu
Pak-hong li-li teh chhoe, goe̍h-kng chēng-chēng teh chhiò ê chi̍t ê àm-mî, kia̍h-thâu khoàⁿ thiⁿ, chèng-chhiⁿ tiám-tiám sì-uî teh chiò kng-bêng ê goe̍h hián-chhut ài-kò͘ ê chêng moá-thiⁿ chheng-liāng lâi khàm tī o͘-àm tiām-chēng ê sè-kài. Kā i siūⁿ, ji̍t goe̍h ê kng chhiⁿ-sîn ê chē, ta̍k ê an-pâi tī i ê uī, tiàm tī poàn-khong-tiong kng-soàⁿ sì-uî teh siā chīn in ê gī-bū, kiâⁿ it-tēng ê lō͘, hián-chhut bô hān-liōng ê sin-pì ná-khoàⁿ ná-siūⁿ, ná-siūⁿ ná ò-biāu.
ÀN-lo̍h khoàⁿ tē, chhiⁿ-chhuì ê hoe-chháu, bō͘-sēng ê chhiū-ba̍k hián-chhut chhiò-iông teh piáu-bêng in ê boán-chiok, hn̄g-hn̄g khoàⁿ soaⁿ chhiⁿ-chhuì bí-lē. Chhim-chhim khoàⁿ hái, chuí-pho phiau-liāng, chit pak toā ú-tiū ê tô͘, hián-chhut bô hān-liōng ê Sîn-pì, ná khoàⁿ nā siūⁿ; ná siūⁿ ná ò-biāu.
Koh khoàⁿ chhiū-ba̍k chhiⁿ-chhuì ê tiong-kan ū teh chhiùⁿ-koa ê chiáu, hián-bêng in ê hoaⁿ-hí, saⁿ-kiò thiàu-bú teh khoài-lo̍k, in ê thian-jiân bí-kéng, koh khoàⁿ suí-hoe phang-hoe ê tiong-kan ū chin suí ê Bé-ia̍h teh kap in choè-phoāⁿ, phang-hoe hoaⁿ-hí, boé-ia̍h thiàu-bú, ē chhut-siaⁿ ê, kap bē chhut siaⁿ--ê, pîⁿ-pîⁿ, teh tek-ì boán-chiok. Chit-khoán ê sim-sek, kám-chhiok--tio̍h bô hān-liōng ê Sîn-pì, ná khoàⁿ ná-siūⁿ, ná siūⁿ ná ò-biāu.
Toā-ah! Thian-tē-kan sim-lô bān-siōng (森羅萬象) thain-jiân bí-kéng, si̍t-chāi sī sîn-pì ò-biāu. Chóng-sī iáu ū chi̍t chéng ê tōng-bu̍t, tī sè-kài-siōng ē chō-chiâⁿ kiaⁿ thiⁿ tāng tē ê toā sū-gia̍p, ē hiáu lī-iōng bān-mi̍h, ē hiáu gián-kiù ta̍k hāng ê Kho-ha̍k Tiat-ha̍k…ê chi̍t-chéng ê tōng-bu̍t. Che sī sím-mi̍h chiū-sī tī sè-kài-siōng put-sî teh ngia̍uh-ngia̍uh tāng-tāng ê o͘-tō͘ thâng--á (= Lâng人) Lí khoàⁿ! khah toā--ê chō-chiâⁿ kok-ka siā-hoē ka-têng ê hēng-hok. Khah sió ê kiàn-tì ke-gia̍p, lī-ek kò-jîn, lī-ek āu-tāi, (Bô tek-khak, kiám-chhái sī hāi) kiám m̄-sī chin lêng-khiáu, chin ò-biāu? Si̍t-chāi sī hián-chhut bô hān-liōng ê Sîn-pì, ná khoàⁿ ná siūⁿ, ná siūⁿ ná ò-biāu.
Toā-ah! Sîn-pì!! Ò-biāu!!! Thiⁿ-téng ê kng tē-bīn ê suí, ú-tiū ê Sîn-pì chhiū-ba̍k hoe-chháu ê chhiⁿ-chhuì, khîm-siù thâng-thoā ê khoài-lo̍k chǹg-thâu chǹg náu keng-êng gián-kiù ê jîn-luī lóng sī hián-chhut Sîn-pì ê chèng-kù, chóng-sī tī chit tiong-kan iáu-kú ē hō͘ lán kám-chhiok-tio̍h chi̍t-hāng, chiū-sī chiàu téng-bīn só͘ kóng ê put-khó su-gī (bē hiáu-siūⁿ).
Kiám m̄-sī ū chi̍t ê chō-bu̍t Chú teh chú-ì tiau-chiat mah? Sím-mi̍h lâng káⁿ kóng bô ah? Si̍t-chāi sī ū lah? Hà! chō-hoà ê ò-biāu lâng bē chhek-to̍k--tit!! chō-hoà ê khuì-la̍t, lâng bē liāu-tit!!!. “Chhim-tîm ah! Siōng-tè ê tì-huī kap kiàn-sek ê pù-ū-ah! I ê phoàⁿ-toàn bē chhek-to̍k--tit. I ê lō͘-tô͘ tui-chhoē bē-tio̍h, chī-chuī chai Chú ê sim-chì? Chī-chuī kap I chham-gī (Lô-má 11: 33-34). Bô lah, kan-ta sī chin-sîn teh chú-cháiⁿ chō-hoà ê ò-biāu lah. Goān êng-kng kui tī I kàu tāi-tāi. A-men.
漢羅（Ùi原文改寫）
造化的奧妙
北風li-li teh 吹，月光靜靜teh笑的一个暗暝，kia̍h頭看天，眾星點點四圍teh照光明的月顯出愛顧的情滿天清亮來蓋佇烏暗恬靜的世界。共伊想，日月的光星辰的濟，逐个安排佇伊的位，踮佇半空中光線四圍teh射盡in 的義務，行一定的路，顯出無限量的神秘， ná看ná想，ná想ná奧妙。
àⁿ落看地，青翠的花草，茂盛的樹木顯出笑容teh表明in 的滿足，遠遠看山青翠美麗。深深看海，水波漂亮，這幅大宇宙的圖，顯出無限量的神秘，ná看ná想；ná想ná奧妙。
閣看樹木青翠的中間有teh唱歌的鳥，顯明in 的歡喜，相叫跳舞teh快樂，in 的天然美景，閣看媠芳花的中間有真媠的尾蝶teh佮in做伴，芳花歡喜，尾蝶跳舞，會出聲的，佮袂出聲--的，平平，teh得意滿足。這款的心適，感觸--著無限量的神秘，ná看ná想，ná想ná奧妙。
大ah！天地間森羅萬象天然美景，實在是神秘奧妙。總是猶有一種的動物，佇世界上會造成驚天動地的大事業，會曉利用萬物，會曉研究逐項的科學哲學……的一種的動物。這是啥物？就是佇世界上不時teh ngia̍uh-ngia̍uh動動的 烏肚蟲仔(=人)你看！較大--的造成國家社會家庭的幸福。較小的建置家業，利益個人，利益後代，(無的確，kiám-chhái是害)敢毋是真靈巧，真奧妙？實在是顯出無限量的神秘，ná看ná想，ná想ná奧妙。
大ah！神秘！！奧妙！！！天頂的光地面的媠，宇宙的神秘樹木花草的青翠，禽獸蟲thoā 的快樂chǹg頭chǹg 腦經營研究的人類攏是顯出神秘的證據，總是佇這中間iáu-kú 會予咱感觸著一項，就是照頂面所講的不可思議(袂會曉想)。
敢毋是有一个造物主teh主意調節嗎？啥物人敢講無ah？實在是有lah？Hà！造化的奧妙人袂測度--得！！造化的氣力，人袂料得！！！。「深沉ah！上帝的智慧佮見識的富有ah！伊的判斷袂測度--得。伊的路途追揣袂著，chī-chuī知主的心志？Chī-chuī佮伊參議(羅馬11：33-34)。無lah，kan-ta是真神 teh主宰造化的奧妙lah。願榮光歸佇伊到代代。阿們。