Chin ê Eng-hiôngPermalink

文獻資訊Permalink

白話字（原文數位化）Permalink

Chin ê Eng-hiông

Tī chit bô loā kú chêng, tī Hoat-lân-se-chiū sī Hoat-kok, ū hō͘ choân-kok ê lâng lâi tâu-phiò, chiū-sī hō͘ choân-kok ê lâng kéng Tuì kó͘-chá kàu hiān-kim Hoat-kok ê Eng-hiông.  Khoàⁿ sím-mi̍h lâng sī Hoat-kok tē-it eng-hiông.  Che sī thong-kok ê lâng tâu-phiò lâi kéng ê só͘-í chin chèng-khak.

Bē kéng ê tāi-seng, ta̍k-kok ê lâng lóng sī siūⁿ kóng Ná-pho-lûn (Napoleon) oē tit-tio̍h tē-it miâ.

M̄-kú kàu thong-kok lóng kéng chheng-chhó ê sî, Hit ê kiat-kó sī àn-ni:-

Tē-it, Pha-su-teh (Pasteur).

(Pha-su-teh sī hoat-kiàn soè-khún Ba-ku-the-lí-á ê lâng, sī chhut-miâ ê Hián-bî-kiàⁿ ha̍k-chiá.

Tē-jī, Iú-gó (Hu-go)

(Iú-gó iú-bêng ê Bûn-ha̍k-ka kap si-jîn, ū tù choē-choē pún chhut-miâ ê siáu-soat)

Tē-saⁿ, Gán-bē-ta (Gambetta)

(Gán-bē-ta sī Hoat-kok chhut-miâ ê chèng-tī-ka, koh-chài sī kin-á-ji̍t Hoat-kok kiōng-hô-kok ê kiàn-siat chiá ê chi̍t ê)

Tē-sì, Ná-pho-lûn (Napoleon)

(Ná-pho-lûn sī chhut-miâ ê chiàn-cheng-ka)

Koh-chài bô goā-kú chêng tī Tek-kok iâ ū chit khoán ê tâu-phiò, hit ê kiat-kó.

Tē-it sī, Hán-phu-to-máu (Hanptonan)

(Hán-phu-to-máu sī Hiān-tāi Tek-kok chhut-miâ ê Siáu-soat-ka, Hì-khek-ka)

Í-siōng só͘ siá ê lē, ū chin thang choè lán ê chham-khó.

Siông-siông ū lâng siūⁿ, sī Bú-le̍k, ui-hong, êng-kng, tē-ni̍h, choè tē-it, M̄-kú m̄-sī án-ni, oē lī-ek lâng, lī-ek sè-kan kam-goān hōng-sū (Servece) hit khoán chiah sī thang kóng chin ê Eng-hiông!!!

Hiān-sî Sè-kài tē-it hó-gia̍h ê lâng chiū-sī Bí-kok, Hián-lí, Pò͘-tek (Henry Ford) I ê châi-sán ū 2,000,000,000 (chiū-sī 20 ek Hut($) chiū-sī lán ê chîⁿ 40 ek kho͘ (¥).  I ū kóng chi̍t-kù oē, kàu-gia̍h oē choè lán ê kàu-hùn, chiū-sī i ū àn-ni kóng-“Lâng nā put-sî lī-ek ka-kī, chiū i ê sū-gia̍p bô thang kóng sī sêng-kong)

Lâng nā put-sî hōng-sū (Service) (chiū-sī lī-ek) pa̍t-lâng, siā-hoē, chiū hit-hō lâng thang kóng sī si̍t-chāi ê sêng-kong!!!!

Iâ-so͘ kóng:-

“Siōng-tè ê kok kap I ê gī tio̍h kiû, chiah ê mi̍h chū-jiân ke-thiⁿ hō͘ lín.”

漢羅（Ùi原文改寫）Permalink

真的英雄

佇這無偌久前，佇法蘭西-就是法國，有予全國的人來投票，就是予全國的人揀對古早到現今法國的英雄。看啥物人是法國第一英雄。這是通國的人投票來揀的所以真正確。

未揀的代先，逐國的人攏是想講拿破崙 (Napoleon) 會得著第一名。

毋kú到通國攏揀清楚的時，彼个結果是按呢：-

第一，Pha-su-teh (Pasteur)。

(Pha-su-teh是發見細菌 Ba-ku-the-lí-á的人，是出名的顯微鏡學者。

第二，Iú-gó (Hu-go)

(Iú-gó 有名的文學家佮詩人，有著濟濟本出名的小說)

第三，Gán-bē-ta (Gambetta)

(Gán-be-ta是法國出名的政治家，閣再是今仔日法國共和國的建設者的一个)

第四，拿破崙 (Napoleon)

(拿破崙是出名的戰爭家)

閣再無外久前佇德國也有這款的投票，彼个結果。

第一是，Hán-phu-to-máu (Hanptonan)

(Hán-phu-to-máu是現代德國出名的小說家、戲劇家)

以上所寫的例，有真通做咱的參考。

常常有人想，是武力、威風、榮光、tē-ni̍h，做第一，毋kú毋是按呢，會利益人，利益世間甘願奉仕(Servece)彼款才是通講真的英雄！！！

現時世界第一好額的人就是美國，Hián-lí,Pò͘-tek (Henry Ford)伊的財產有2,000,000,000 (就是20 億 Hut($)就是咱的錢40 億箍(¥)。伊有講一句話，夠額會做咱的教訓，就是伊有按呢講-「人若不時利益家己，就伊的事業無通講是成功」

人若不時奉仕(Service) (就是利益)別人、社會，就彼號人通講是實在的成功！！！！

耶穌講：-

「上帝的國佮伊的義著求，遮个物自然加添予恁。」