一滴一滴的水

Chi̍t tih chi̍t ti̍h ê chuí

文獻資訊

項目	資料
作者	陳清忠 Tân Chheng-tiong
卷期	芥菜子
卷期	第 15 號
日期	1927/4
頁數	11-12

白話字（原文數位化）

“Chi̍t tih chi̍t ti̍h ê chuí”

(26)

Lêng-hûn kap Kám-chêng ê tāng-liōng

A. Lêng-hûn ê tāng:

Bí-kok ū chi̍t ê Phok-sū miâ-kiò Má Lō͘-ka.  I tī kuí-nā nî chêng ū chin chim-chiok gián-kiù lūn lâng ê lêng-hûn ê tāng, iā hoat-piáu kóng i ū ēng chin cheng-bi̍t ê hoat-tō͘ kiám-tēng lêng-hûn ê tāng iok-lio̍k ū 6 chîⁿ(?) goā.

I chiong chi̍t ê chin siong-tiōng teh-beh sí ê hì-pīⁿ hoān-chiá, chham i ê bîn-chhn̂g hē tī chin cheng-bi̍t ê thian-pêng ê téng-bīn, iā khiā teh chù-ba̍k chim-chiok kā i kiám-cha i ê thé-liōng.  Hit ê hoān-chiá, uī-tio̍h i ê ho͘-khip2-tiong ê sip-khì kap hoat-koāⁿ ê in-toaⁿ, muí sî-kan ū kiám i ê tāng iok-lio̍k 8 chîⁿ.

Kè 3 tiám koh 40 hun hit ê hoān-chiá ê lêng-hûn cháu-chhut i ê seng-khu, sí-khì, tú-tú kè-khuì ê sî chūn thian-pêng hut-jiân chi̍t-sî koh kiám 6 chîⁿ goā.  Chit ê 6 chîⁿ goā, má-Lō͘-ka toàn-tēng chiū- sī lêng-hûn ê tāng-liōng.

Tāi-liân Phok-sū sī Bí-kok lâng, i ū hō͘ chi̍t ê ta-po͘ lâng chē tī í-ni̍h, iā ēng chit ê hong-hoat hō͘ hit ê lâng hèng-hùn soà tuì í-ni̍h khí lâi khiā, iā gîm-bī hit ê kiat-kó.  Hit ê lâng ê thé-liōng pún-lâi sī 155 pōng, Chóng-sī tī hit-tia̍p hèng-hùn soà khí lâi khiā ê sī, i ê thé-liōng hut-jiân ke kàu 275 pōng.

Tāi-liân Phok-sū keng-kè choē-choē khoán ê si̍t-giām, āu-lâi ū khak tēng “Kám-chêng éng-hióng thé-liōng ê hoat-chek.”

Nā tī hō͘-lâng ba̍uh sio̍k só͘ khí ê ha̍k-hāu ê lâu-téng, lâi kà sim-sek ê sū, chiū chin guî-hiám.

(Boē-oân)

漢羅（Ùi原文改寫）

「一滴一滴的水」

(26)

靈魂佮感情的重量

A、靈魂的重：

美國有一个博士名叫Má Lō͘-ka。伊佇幾若年前有真斟酌研究論人的靈魂的重，也發表講伊有用真精密的法度檢定靈魂的重約略有6 錢外。

伊將一个真傷重teh欲死的肺病患者，參伊的眠床 hē佇真精密的天秤的頂面，也徛teh注目斟酌共伊檢查伊的體量。彼个患者，為著伊的呼吸中的濕氣佮h發汗的因端，每時間有減伊的重約略8錢。

過 3點閣40分彼个患者的靈魂走出伊的身軀，死去，tú-tú 過氣的時陣天秤忽然一時閣減 6錢外。這个6錢外，Má Lō͘-ka斷定就是靈魂的重量。

Tāi-liân博士是美國人，伊有予一个查埔人坐佇椅裡，也用這个方法予彼个人興奮紲對椅裡起來徛，也吟味彼个結果。彼个人的體量本來是155 磅，總是佇彼tia̍p 興奮紲起來徛的時，伊的體量忽然加到275 磅。

Tāi-liân博士經過濟濟款的實驗，後來有確定「感情影響體量的法則。」

若佇予人ba̍uh 俗所起的學校的樓頂，來教心適的事，就真危險。

(未完)