故陳信彰君小傳

Kò͘ Tân Sìn-chiong Kun Sió-toān

文獻資訊

項目	資料
作者	無lo̍h名
卷期	台南府城教會報
卷期	第504卷
日期	1927/3
頁數	8

白話字（原文數位化）

Kò͘ Tân Sìn-chiong Kun Sió-toān

1927.03 504 koàn p.8-9

(Chhî Chhun-seng)

Kò͘ Tân Sìn-chiong--sī, chiū-sī Sek-kháu kàu-hoē Tân Ho̍k-lé, Tân Iok-hān jī-uī Tiúⁿ-ló ê hiaⁿ-tī. I ê chhin-lâng choē-choē choè Thoân-kàu-su, i pún-sin iā bat saⁿ nî kú choè Thoân-tō. Koàⁿ Pak-pō͘ Tai-oân Ki-tok Tiúⁿ-ló kàu-hoē ê le̍k-sú tē 102 bīn ū i ê siōng, chiū chai i soè-hàn tha̍k Gī-o̍h, āu-lâi tha̍k Kok-gú Ha̍k-hāu ê tē-saⁿ hù-sio̍k, iā saⁿ nî kú ji̍p I-ha̍k, sì nî kú ji̍p Tām-suí Sèng-tō Su-īⁿ. āu-lâi siū phài khì Pat-lí-sa choè Thoân-tō, in-uī ka-sū-siōng chiū hioh-kang, kap i ê hiaⁿ-tī tāi-ke chhut-la̍t keng-êng thoàⁿ-khòng sêng-kong, lâi lī-ek toē-hng kap ke-lāi í-ki̍p kàu-hoē.

Lūn i ê sèng sī tiong-ti̍t kap phoh-si̍t. Khoàⁿ i ê keng-le̍k chiū chai i ū kau-poê choē-choē pêng-iú. Tī bô phah-sǹg ê sî, Chiau-hô 2 nî 1 ge̍h 1 ji̍t ē-po͘ 4 tiám, ló chhut-huih; kè 12 tiám kú hō͘ Siōng-tè tiàu-khì; hióng-siū 45 hè.

Kàu 15 ji̍t ē-po͘ 2 tiám kú-hêng chòng-sek, hoē-chòng-chiá iok 1500 chó-iū. Thang chai in ê kau-chè khóng-khoah. I ū siⁿ 10 ê kiáⁿ-jî, ū-ê soè-hàn. Bat i ê lâng bē bián-tit siong-sim, m̄-kam i ê choè lâng. Chóng-sī I taⁿ tī thiⁿ-ni̍h hióng-hok, sī ǹg-bāng tāi-ke oē siū an-uì.

漢羅（Ùi原文改寫）

故陳信彰君小傳

1927.03 504卷 p.8-9

(徐春生)

故陳信彰--氏，就是錫口 教會陳復禮、陳約翰二位長老ê兄弟。伊ê親人濟濟做傳教師， 伊本身也bat 3年久做傳道。看北部台灣基督長老教會ê歷史第102面有伊ê 像，就知伊細漢讀義學，後--來讀國語校ê第三附屬，也3年久入醫學，4年久入淡水聖道書院。後來受派去八里社 做傳道，因為家事上就歇工，kap伊ê兄弟逐家出力經營炭礦成功，來利益地方kap家內以及教會。

論伊ê性是忠直kap樸實。看伊ê經歷就知伊有交陪濟濟朋友。Tī無扑算ê時，昭和兩年1月1日e晡4點，腦出血；過12點久hō͘上帝召--去，享壽 45歲。

到15日e 晡2點舉行葬式，會葬者約1500左右。Thang知in ê交際曠闊。伊有生 10個子兒，有ê細漢。Bat伊人 bē免tit傷心，m̄甘伊ê做人。總--是伊今tī天--ni̍h享福，是向望逐家會受安慰。