人生ê雙叉路
Jîn-seng ê Siang-chhe-lō͘
文獻資訊
| 項目 | 資料 |
|---|---|
| 作者 | 蔡安定 Chhoà An-tēng |
| 卷期 | 台南府城教會報 |
| 卷期 | 第504卷 |
| 日期 | 1927/3 |
| 頁數 | 9 |
白話字（原文數位化）
Jîn-seng ê Siang-chhe-lō͘
1927.03 504 koàn p.9
(Chhoà An-tēng)
Ū chi̍t ê siàu-liân lâng; i tú-tn̄g teh siūⁿ phok-sū lūn-bûn, hó-gia̍h, kap i ê ài-jîn ê sî, sí-lâng ê kut-thâu chioh toā-kó͘ ê hêng-chōng hō͘ i khoàⁿ-kìⁿ. Hit- sî i chiū mn̄g I, kóng, “Lí sī sím-mi̍h” ? Toā kó͘ chiū ìn, kóng, “Goá ê chit-bū chiū-sī teh koán-lí lâng ê oa̍h-miā, goá chit ê toā-kó͘ nā kòng chi̍t-ē, sè-kan ê lâng chiū sí chi̍t-ê. Koh chi̍t-tiám cheng, chiū beh kòng chi̍t-ē.” I án-ni ìn-tap. Siàu-liân lâng chiū soà-chiap koh mn̄g, “M̄-chai sī beh uī-tio̍h sím- mi̍h lâng ?” ìn, kóng, “Chiū-sī beh uī- tio̍h lí.” Ah ! hit-sî siàu-liân lâng kiaⁿ chi̍t-ē, thó͘ toā-khuì, kóng, “Chhun chi̍t tiám cheng ê oa̍h-miā !
Hit-sî tú-tú ū chi̍t ê pêng-iú lâi beh thàm i, kā i kóng, “Hó pêng-iú, lí si̍t- chāi chin hó jī-ūn, lí ê phok-sū lūn-bûn í-keng thong-koè. Koh bô kú phok-sū- hō beh kàu lí ê chhiú. Tio̍h hoaⁿ-hí ! tio̍h hoaⁿ-hí !” Hit-sî chit ê siàu-liân lâng lóng bô thiaⁿ-tio̍h pêng-iú só͘ kóng ê oē, in-uī i ê sim-lāi choan-choan teh siūⁿ “sî-kan” ê sū; in-uī i tī chit ê beh sí ê sî-hāu, miâ-siaⁿ ū sím-mi̍h lō͘-ēng ?
āu-lâi koh tē-jī ê pêng-iú lâi kā i kóng, “Pêng-iú ah ! lí chin hēng-hok lah ! lín a-peh ê uî-sán siong-sio̍k í- keng koat-tēng; chi̍t-pah-bān kho͘ teh-beh kàu lí ê lak-tē-á.” Hit-sî siàu-liân- lâng iā sī bô teh thiaⁿ i ê pêng-iú só͘ kóng ê oē, in-uī i só͘ chhun ê sî-kan sī 25 hun nā-tiāⁿ; tī chit-sî ū thang tit- tio̍h 100 bān kho͘, ū sím-mi̍h lō͘-ēng ? Si̍t-chāi sī bô lō͘-ēng. Só͘-í siàu-liân lâng ê sim toā hoân-ló, ū iu-chhiû ê bīn-māu.
Tē-saⁿ, chiū-sī ū chi̍t ê suí ê bīn-sek ê hū-jîn lâi, chiū tuì siàu-liân lâng kóng, “Tio̍h saⁿ-kap hoaⁿ-hí, in-uī lán nn̄g lâng ê kiat-hun í-keng hó-sè lah ! Bîn- á-ji̍t nā siat-sú beh kú kiat-hun-sek, iā oē ēng-tit.” Hū-jîn-lâng ū chin toā hoaⁿ-hí ê bīn-iông; chóng-sī siàu-liân lâng tú-tú hoán-tuì hū-jîn-lâng só͘ tuì i kóng ê, iā lóng bô ji̍p i ê hī-khang.
Í-siōng só͘ kóng ê ,sī hì-chhut, sī lâng só͘ choè--ê, m̄-kú iā sī ē thang kóng sī jîn-seng só͘ siông-siông tú-tio̍h ê sū- si̍t. Phok-sū lūn-bûn iā sī hó, pù-ū sī lâng só͘ ì-ài--ê, him-bō͘ ài-jîn iā m̄-sī pháiⁿ; chóng-sī kàu lâng iáu chhun ū chi̍t-tiám cheng kú ê oa̍h-miā, hit-sî hit ê siàu-liân lâng boē thang tuì hit saⁿ hāng lâi tit-tio̍h an-uì. Chiū-sī bêng-ū ê phok-sū-hō, pah-bān ê hù-kuì, bí-jîn ê ài-chêng; m̄-sī i to̍k-it ê hi- bōng.
Chhéng-mn̄g hiaⁿ-tī chí-bē, lín só͘ khǹg to̍k-it ê hi-bōng sī sím-mi̍h ? Iâ- so͘ ū kóng, “Lâng tit-tio̍h thong sè-kan, lâi sit-lo̍h i ê sìⁿ-miā, ū sím-mi̍h lī-ek ? Lâng beh ēng sím-mi̍h lâi tuì-oāⁿ i ê sìⁿ-miā ? Lâng to̍k-it ê hi-bōng, chiū-sī éng-oán ê oa̍h-miā lah. Iâ-so͘ koh kóng, “ài kiù sìⁿ-miā ê, hoán-tńg sit- lo̍h i; uī-tio̍h Goá lâi sit-lo̍h sìⁿ-miā ê, beh tit-tio̍h i. “
Chhiáⁿ lán tāi-ke hiaⁿ-tī chí-bē, tio̍h hiàn ka-kī hō͘ Chú tiàu, chò Chú ê kang, uī-tio̍h Siōng-tè chò bô pó-sioh sìⁿ-miā ê. Chhiáⁿ lán tio̍h kéng ū kong-hui kiù-lêng-chiá ê seng-gâi; nā bô, lán kiám-chhái oē chhin-chhiūⁿ hit ê siàu-liân lâng beh khiā tī sit-bāng ê Siang-chhe-lō͘. Tio̍h hiàn-sin uī Chú chò kang, lâi chín-kiù Tâi-tó ê tông-pau, sī sim só͘ goān.
漢羅（Ùi原文改寫）
人生ê雙叉路
1927.03 504卷 p.9
(Chhoà An-tēng)
有1个少年人；伊抵tn̄g teh 想博士論文、好額，佮伊ê 愛人ê 時，死人ê 骨頭借大鼓ê 形狀hō͘ 伊看見。Hit 時伊就問--伊，講：「你是甚物？」大鼓就應，講：「我ê 職務就是teh 管理人ê 活命，我這个大鼓若摃1下，世間ê 人就死1个。Koh 1點鐘，就beh 摃1下。」伊án-ni 應答。少年人就續接koh 問：「m̄ 知是beh 為著甚物人？」應，講：「就是beh 為著你。」Ah！hit 時少年人驚1下，吐大氣，講：「偆1點鐘ê 活命！」
Hit 時抵抵有1个朋友來beh 探伊，kā 伊講：「好朋友，你實在真好利運，你ê 博士論文已經通過。Koh 無久博士號beh 到你ê 手。著歡喜！著歡喜！」Hit 時這个少年人攏無聽著朋友所講ê 話，因為伊ê 心內專專teh 想「時間」ê 事；因為伊tī 這个beh 死ê 時候，名聲有甚物路用？
後--來koh 第2个朋友來kā 伊講：「朋友ah！你真幸福lah！Lín阿伯ê遺產相續已經決定；100萬箍teh beh 到你ê 落袋仔。」Hit 時少年人也是無teh 聽伊ê 朋友所講ê 話，因為伊所偆 ê 時間是25分nā-tiāⁿ；tī 這時有thang 得著100萬箍，有甚物路用？實在是無路用。所以少年人ê 心大煩惱，有憂愁ê 面貌。
第3 ，就是有1个suí ê 面色ê 婦人來，就tuì 少年人講：「著相佮歡喜，因為咱兩人ê 結婚已經好勢--lah！明仔日nā 設使beh 舉結婚式，也會用得。」婦人人有真大歡喜ê 面容；總--是少年人抵抵反對婦人人所tuì 伊講--ê,也攏無入伊ê 耳空。
以上所講--ê ，是戲齣，是人所做--ê,m̄-kú 也是會thang 講是人生所常常抵著ê 事實。博士論文也是好、富有是人所意愛--ê、欣慕愛人也m̄ 是歹；總--是到人iáu 偆有1點鐘久ê 活命，hit 時hit 个少年人boē thang tuì hit 3項來得著安慰。就是名譽ê博士號、百萬ê 富貴、美人ê 愛情；m̄ 是伊獨一ê 希望。
請問兄弟姊妹，lín 所囥獨一ê 希望是甚物？耶穌有講：「人得著通世間，來失落伊ê 生命，有甚物利益？人beh 用甚物來對換伊ê 生命？人獨一ê希望，就是永遠ê活命lah。耶穌koh 講：「ài 救生命ê ，反轉失落伊；為著我來失落生命ê,beh 得著伊。」
請咱逐家兄弟姊妹，著獻家己hō͘ 主召，做主ê 工，為著上帝做無保惜生命ê 。請咱著揀有光輝救靈者ê 生涯；若無，咱kiám-chhái會親像hit个少年人beh 企tī 失望ê 雙叉路。著獻身為主做工，來拯救台島ê 同胞，是心所願。