Ki-tok ê bô-liâu [ko͘-toaⁿ]Permalink

文獻資訊Permalink

白話字（原文數位化）Permalink

Ki-tok ê bô-liâu [ko͘-toaⁿ]

Ko͘-toaⁿ ū nn̄g-khoán: Chi̍t-khoán sī uī-tio̍h ka-kī ê pháiⁿ, tì-kàu hō͘ pêng-iú bô ài lâi, khì-sak--i ê ko͘-toaⁿ; koh chi̍t-khoán sī uī-tio̍h siūⁿ ko-siōng, siūⁿ hó, pêng-siông ê lâng oh-tit liáu-kái ê in-toaⁿ, tì-kàu lâi bô pêng-iú ê ko͘-toaⁿ. Ki-tok ê ko͘-toaⁿ chiū-sī sio̍k tī lō͘-bé chit-khoán.

Thiⁿ-mi̍h ê Chú, hiān-sî tī Pē ê chhù, hō͘ chheng-chheng bān-bān ê Thiⁿ-sài Sèng-tô͘ uî-teh, bô chhin-chhiūⁿ I tī toē-ni̍h ê sî ê ko͘-toaⁿ. oē liáu-kái I ê sim-koaⁿ, oē chai bat I ê cheng-sîn, kap I saⁿ-kap kóng-oē, kap I saⁿ-kap hoaⁿ-hí, hit-khoán ê sîn-lêng phah-sǹg boē chió. Chóng-sī oa̍t-thâu khoàⁿ lo̍h lâi sè-kan ê sî, kì-tit I choè lâng ê lô͘-po̍k, hō͘ lâng phah, hō͘ lâng phuì-noā ê sî, kiám m̄-sī iû-goân chin ko͘-toaⁿ,  chin bô-liâu mah!

I ê ba̍k-chiu nā khoàⁿ kàu tô͘-lī ê Pa-lí, put-sìn ê Pak-kiaⁿ ê sî, I ê sim-koaⁿ kiám oē tit-tio̍h uì-an mah! Jîn-kháu kuí-nā pah-bān ê toā to͘-chhī; ū pài-tn̂g, ū soat-kàu, chóng-sī hit tiong-kan tuah-tí ū kuí-ê chin-si̍t bat I, kap I saⁿ-kap thî-khàu, kap I saⁿ-kap hoaⁿ-hí ê lâng ah! Bô chhò! I si̍t-chāi iû-goân iáu sī ko͘-toaⁿ, sī bô-liâu lah!!

Siá I ê toān-kì, uī I ê siōng lâi tit-tio̍h miâ-siaⁿ ê lâng; chhéng-hù hoē-tn̂g, á-sī pīⁿ-īⁿ ê kiàn-tiok lâi tit-tio̍h kū-lī ê lâng; gián-kiù--I,phoe-phêng--I lâi tit-tio̍h phok-sū-hō ê lâng; hiông-piān gâu kóng tō-lí lâi tit-tio̍h bêng-lī ê lâng sī chin-chē! Chóng-sī nā m̄-sī ū hit-khoán chin-si̍t liáu-kái--I, kap I kiōng-bêng, saⁿ-kap siū khó͘-lo̍k ê lâng, sui-bóng i ê sò͘ sī choē, iáu-kú Ki-tok sī ko͘-toaⁿ, boē tit-thang tit-tio̍h uì-an lah!!

Ta̍k ê lé-pài-ji̍t, pài-tn̂g ê cheng, hiáng-liāng kàu hn̄g-hn̄g ê só͘-chāi; chhut toā siaⁿ lâi tha̍k Sèng-keng, chiàu koàn-lē lâi soat-kàu; hoē-chiòng khah-choē teh tuh-bîn, sim-koaⁿ boē chēng-chēng; ū ê khah khiáu-sîn ê bo̍k-su chiū kóng sim-sek hó-chhiò ê jîn-chêng-tām lâi khiú hoē-iú ê chù-ì; Ji̍t-iāu ha̍k-hāu ê kàu-su, chin hoaⁿ-hí, chin ài thiaⁿ gín-ná kiò in Sian-siⁿ! sian-siⁿ! chá-chá chiū chhut mn̂g kín ài beh kap gín-ná saⁿ-tú. Chhin-bo̍k-hoē, chiok Sèng-tàn toā toā lāu-jia̍t, nā kóng kàu kî-tó-hoē, put-sî chió lâng, khah-siông sī lāu-toā lâng, kap bo̍k-su ê ka-cho̍k, chhin-chhiūⁿ chi̍t-tiâu teng-sim ê teng-sim-hé; án-ni Chú iáu bô kám tio̍h bô liâu mah! Kiám ū teh hoaⁿ-hí boán-chiok mah!!

Ah, Chú-ah! oa̍h ê Chú ah! Goá jīn goá pún-sin iā sī tiong-kan ê chi̍t ê lah! Put-ti put-kak ê sî goá ū teh lī-iōng--Lí, tuì Lí ê miâ goá ū to͘-bô͘ ka-kī ê bêng-lī lah! O͘, Chú-ah,-sià-bián goá, kiû Lí liông-chêng-goá! Chit-khoán put-sìn, put-tek ê lô͘-po̍k kóng-sī Lí ê sù-chiá lâi soat-kàu, kî-si̍t sī àiēng-kng pún-sin! Si̍t-chāi Lí tek-khak chin bô-liâu, chin ko͘-toaⁿ! Chit-chūn goá ê sim-toé nā iáu ū hit-khoán pī-chiān ê só͘ siūⁿ tī-teh, kiû Lí piⁿ-phah--goá, phah goá tó-toē, hō͘ goá  ê sim-koaⁿ pìⁿ-choè chheng-khì, bô chi̍t-tiám-á ê lâ-sâm tī-teh. Bô-lūn cheng-sîn, bô-lūn teh-khùn, hō͘ goá put-sî oē kì-tit Lí, uī-tio̍h beh àn-cháiⁿ-iūⁿ lâi kiù sè-kan, hō͘ goá oē kap Lí saⁿ-kap thî-khàu, saⁿ-kap siū kan-khó͘! Tī Khek-se-má-nî thî-khàu ê Chú ah, tī Kok-kok-thaⁿ lâu-huih ê Chú ah, goá iû-goân ài kap Li saⁿ-kap thî-khàn, saⁿ-kap lâu-huih lah! Kan-ta pàng Lí chi̍t-ê lâi siū-kó͘, goá beh thài oē pêng-an! Lí ê khó-poe tio̍h hō͘ goá lim káu liáu!! Sī sim só͘-goān!!.

漢羅（Ùi原文改寫）Permalink

基督的無聊「孤單」

孤單有兩款：一款是為著家己的歹，致到予朋友無愛來，sak--伊的孤單；閣一款是為著想高尚，想好，平常的人oh得了解的因端，致到來無朋友的孤單。基督的孤單就是屬佇路尾這款。

天物的主，現時佇爸的厝，予千千萬萬的天使聖徒圍teh，無親像伊佇地裡的時的孤單。會了解伊的心肝，會知捌伊的精神，佮伊相佮講話，佮伊相佮歡喜，彼款的神靈拍算袂少。總是oa̍t頭看落來世間的時，記得伊做人的奴僕，予人拍，予人phuì涎的時，敢毋是猶原真孤單，真無聊mah！

伊的目睭若看到圖利的巴黎、不信的北京的時，伊的心肝敢會得著慰安mah！人口幾若百萬的大都市；有拜堂、有說教，總是彼中間到底有幾个真實捌伊，佮伊相佮啼哭，佮伊相佮歡喜的人ah！無錯！伊實在猶原猶是孤單，是無了lah！！

寫伊的傳記，為伊的像來得著名聲的人；請負會堂，抑是病院的建築來得著巨利的人；研究--伊，批評--伊來得著博士號的人；雄辯 gâu講道理來得著名利的人是真濟！總是若毋是有彼款真實了解--伊，佮伊共鳴，相佮受苦樂的人。雖罔伊的數是濟，iáu-kú基督是孤單，袂得通得著慰安 lah！！

逐个禮拜日，拜堂的鐘，響亮到遠遠的所在；出大聲來讀聖經，照慣例來說教；會眾較濟 teh tuh眠，心肝袂靜靜；有的較khiáu-sîn的牧師就講心適好笑的人情談來揪會友的注意；日曜學校的教師，真歡喜，真愛聽囡仔叫in先生！先生！早早就出門緊愛欲佮囡仔相拄。親牧會、祝聖誕大大鬧熱，若講到祈禱會，不時少人，較常是老大人，佮牧師的家族，親像一條燈心的燈心火；按呢主猶無敢著無聊 mah！敢有teh歡喜滿足mah！！

Ah，主ah！活的主ah！我認我本身也是中間的一个 lah！不知不覺的時我有teh 利用--你，對你的名我有圖謀家己的名利lah！O͘，主ah，赦免我，求你liông-chêng--我！這款不信、不德的奴僕講是你的使者來說教，其實是愛榮光本身！實在你的確真無連聊、真孤單！這陣我的心底若猶有彼款卑賤的所想佇teh，求你鞭拍--我，拍我倒地，予我的心肝變做清氣，無一點仔的 lâ-sâm佇teh。無論精神、無論teh睏，予我不時會記得你，為著欲按怎樣來救世間，予我會佮你相佮啼哭，相佮受艱苦！佇客西馬尼啼哭的主ah，佇各各他流血的主ah，我猶原愛佮你相佮啼哭、相佮流血lah！Kan-ta放你一个來受苦，我欲thài會平安！你的苦杯著予我lim 到了！！是心所願！！。