意料外
Ì-liāu-goā
文獻資訊
| 項目 | 資料 |
|---|---|
| 作者 | 張金波 Tiuⁿ Kim-pho |
| 卷期 | 芥菜子 |
| 卷期 | 第 12 號 |
| 日期 | 1927/1 |
| 頁數 | 12-13 |
白話字（原文數位化）
Ì-liāu-goā
(Koe-lâng kàu-hoē ê siau-sit)
Sè-kan sū choē-choē hāng hō͘-lâng oē liāu-tit, chóng-sī ū ê hō͘-lâng boē liāu-tit. Sèng-chheh ū kì, －háu ê sai gâu chia̍h lâng Pa-pí-lûn ông ū siat sai-hia̍t, kìⁿ-nā hoān-choē sí-hêng ê lâng, chiū hiat lo̍h sai-hia̍t hō͘ sai chia̍h, ta̍k ê bô sìⁿ-miā, ta̍k-lâng to liāu oē chhut. Chí-ū Tān-í-lí sai bô kā--i, tuì sai ê chhuì thoat-lī; Che sī lâng ê ì-liāu-goā.
Chit kuí-nî lâi Koe-lâng, kàu-hoē ê sū-chêng ū kuí-nā hāng chhut tī ì-liāu goā, pâi tī ē-toé: －
-
1923 nî tú-tio̍h pháiⁿ kéng-gū, tāi-ke phah-sǹg kàu-hoē hū-tam thoân-tō ê keng-huì boē khí; bô gî 1924 nî chiaⁿ-ge̍h N̂g Suī-khêng tiúⁿ-ló tuì Ē-mn̂g lâi chia hù lé-pài, soà kó͘-bú hoē-iú tio̍h chhiáⁿ bo̍k-su, kó-jiân 3 ge̍h to̍k-li̍p chhiáⁿ bo̍k-su; chiah kín sī ì-liāu-goā!
-
Hoē-iú chhiáⁿ bo̍k-su sī kiông-tìⁿ, in-uī bô châi-sán, koh jîn-sò͘ chió. Chan Chheng-châi chi̍p-sū khah-ū khuì-la̍t, choè chhia-tiúⁿ chin-kú, tú-tio̍h kiám-oân, bô kú soà phoà-pīⁿ, 1925 iân-kim chhut tē-it choē, nî-thâu soà pia̍t-sè; i ê hāu-siⁿ soè-hàn, cha-bó͘-kiáⁿ tī Tang-kiaⁿ khí-kho ha̍k-hāu tha̍k-chheh, keng-huì siong-tiōng, bô lâng oē thàn chîⁿ; choē-choē lâng liāu-sióng i ê iân-kim oē chi̍h-chām, bô-gî i ê bó͘-kiáⁿ iân-kim soà tāi-seng kau chheng-chhó: che sī ì-liāu goā,
-
Kū-nî ê 12 ge̍h 26 àm Tân Siông tiúⁿ-ló lâi lé-pài, 9 tiám goā chiah tò-khì. Kàu poàⁿ-mî kè 2 tiám, i ê chhù-piⁿ sit-hé, soà liân-luī sio-tio̍h i ê chhù. I só͘ ū tiàm lāi ê hè-mi̍h kap ke-si cha̍p-bu̍t í-ki̍p 2 khám tiàm, choè chi̍t-ē pìⁿ hé-hu; chi̍t ê sun-sim-pū 11 hè iā sio-sí, tiúⁿ-ló kap tiúⁿ-ló niû iā hiám sio sí, 10 hun kú châi-sán it-só͘-khong. Chiah kín ê chai-ē sī ì-liāu-goā, chin thang siong-sim. Tân Siông tiúⁿ-ló kū-nî ê nî-iân chhut ￥72.00, ta̍k-lâng liāu-sióng i tī kin-nî ê nî-iân tek-khak oē toā kiám-chió, kàu-hoē oē toā sit-la̍t; bô-gî tī kin-nî chiaⁿ-ge̍h chhoe-jī lâi lé-pài ū toê nî-iân, ke chìn-pō͘ 8 kho͘ (kiōng ￥80.00), soà hiān-kau poàⁿ-nî hūn; che sī lâng ê ì-liāu goā.
Sèng-hoē ê chìn-thè heng-soe sī lán só͘ liāu boē tio̍h; ū sî khoàⁿ hoē-iú hó-gia̍h, só͘-choè heng-khí, tī siā-hoē ū sè-le̍k, ū tì-sek, chiū siūⁿ sī kàu-hoē heng-khí ê tiāu-thâu. Kî-si̍t bô tek-khak; iàu-kín sī sìn-gióng kap goân-hêng.
Chhiáⁿ khoàⁿ pò ê hiaⁿ-chí thoè Koe-lâng ê kàu-hoē kî-tó, sī sim só͘-goān.
漢羅（Ùi原文改寫）
意料外
(基隆教會的消息)
世間事濟濟項予人會料得，總是有的予人袂料得。聖冊有記，－吼的獅gâu食人巴比倫王有設獅穴，見若犯罪死刑的人，就hiat落獅穴予獅食，逐个無性命，逐人都料會出。只有但以理獅無kā--伊，對獅的喙脫離；這是人的意料外。
這幾年來基隆，教會的事情有幾若項出佇意料外，排佇下底：－
1、1923年拄著歹境遇，大家拍算教會負擔傳道的經費袂起；無疑 1924年正月黃瑞擎長老對廈門來遮赴禮拜，紲鼓舞會友著請牧師，果然3月獨立請牧師；遮緊是意料外！
2、會友請牧師是強tìⁿ，因為無財產，閣人數少。曾清才執事較有氣力，做車長真久，拄著減員，無久紲破病，1925 iân-kim出第一濟，年頭紲別世；伊的後生細漢，查某囝佇東京齒科學校讀冊，經費傷重，無人會趁錢；濟濟人料想伊的 iân-kim會 chi̍h-chām，無疑伊的某囝iân-kim紲代先交清楚：這是意料外。
3、舊年的 12月26暗陳祥長老來禮拜，9點外才倒去。到半暝過 2點，伊的厝邊失火，紲連累燒著伊的厝。伊所有店內的貨物佮傢俬雜物以及 2 khám店，做一下變火灰；一个孫新婦11 歲也燒死，長老佮長老娘也險燒死，10 分久財產一所空。遮緊的災厄是意料外，真通傷心。陳祥長老舊年的年iân出￥72.00，逐人料想伊佇今年的年iân的確會大減少，教會會大失力；無疑佇今年正月初二來禮拜有toê年iân，加進步8箍 (共￥80.00)，紲現交半年份；這是人的意料外。
聖會的進退興衰是咱所料袂著；有時看會友好額，所做興起，佇社會有勢力，有智識，就想是教會興起的兆頭。其實無的確；要緊是信仰佮原形。
請看報的兄姊替基隆的教會祈禱，是心所願。