聖誕樹ê來歷
Sèng-tàn-chhiū ê Lâi-le̍k
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第501卷 |
| 日期 | 1926/12 |
| 頁數 | 13 |
白話字（原文數位化）
Sèng-tàn-chhiū ê Lâi-le̍k
1926.12 501 koàn p.13-14
(Tuì Bân-lâm Sèng-hoē-pò tiah-lio̍k)
Tng Iâ-so͘ chhut-sì tī Pek-lī-hêng ê sî, sìn Siōng-tè ê lâng lóng m̄-chai Sèng- tàn-chhiū sī sím-mi̍h sū. Hit sî-chūn chhut-sì ê gín-ná ba̍k-chiu ê hok-khì, iā bô chhin-chhiūⁿ hiān-kim ê gín-ná só͘ hióng-siū ê toā. Chhâ-khó Iâ-so͘ ê pē- bó tng-ji̍t ê chêng-kéng chin-chiàⁿ sòng- hiong. I chhut-sì ê só͘-chāi m̄-sī hông- kiong, chiū-sī bé-tiâu. Iâ-so͘ só͘ khùn ê chhn̂g, m̄-sī chhu phòng-phoē ê iô- chhn̂g; chiū-sī chhiong-moá tiū-chháu ê bé-chô. Iâ-so͘ ê ke sui-jiân sī chiah kan-khó͘, chiah pi-bî, I khiok si Siōng- tè to̍k-siⁿ ê kiáⁿ, pàng-sak thiⁿ-téng ê pó-chō, kàng-lo̍h sè-kan choè lâng, tiàm tī choē-ok koàn-boán choē-jîn ê tiong- kan, ēng Siōng-tè ê toā thiàⁿ-thàng lâi kà-sī sè-kan lâng.
Tng Iâ-so͘ chhut-sì hit-ji̍t, thiⁿ-téng bat ū chin-chē thiⁿ-sài cho͘-chit gîm-si pan, gîm chin-chē hó-thiaⁿ ê si, hō͘ Pek- lī-hêng siâⁿ ê lâng thiaⁿ; kî-tiong tē-ie hó-thiaⁿ ê chi̍t-siú chiū-sī, “Tī téng-bīn êng-kng kui Siōng-tè, tē-bīn hô-pêng, lâng tit-tio̍h in-tián.” Hit-sî tiàm tī khòng-iá kò͘-iûⁿ ê lâng, thiaⁿ-kìⁿ thiⁿ- sài hoaⁿ-hí ê koa, to iā bô se̍h chi̍t châng Sèng-tàn-chhiū chē--teh khèng-chiok Sèng-tàn; in chí-ū sī pàng-hē in só͘ kò͘ ê iûⁿ-kûn, koáⁿ-kín lo̍h-khì Pek-lī-hêng chhoē chit-uī sin chhut-sī ê Ông. In chhoē-tio̍h Iâ-so͘ ê sî-chūn, chiū phak- teh pài I. Tī hit-sî to iā bô lâng siūⁿ kàu Sèng-tàn-chhiū chit ê sū.
Chiàu liû-thoân Sèng-tàn chhiū sī tuì sím-mi̍h sî chiah ū neh? Chhâ-khó Iâ-so͘ Ki-tok kàng-seng āu 732 nî, tī Ji̍t- jíⁿ-bān (Tek-kok) ū chi̍t ê sèng-jîn miâ Ui-but-lia̍t(Saint Wilfred). I chhoā chi̍t tīn chè-si beh khì chhoē hiah ê pài Luî- kong ê lâng, beh kà in tio̍h ké-oāⁿ lâi sìn Iâ-so͘.
Chiàu sú-kì só͘ kóng, tng in chín-khí cheng-sîn tī hit ê àm chhiū-nâ ê kāu seh ê lāi-bīn, ióng-kám chìn-chêng kàu tī iá-bân lâng (Tiâu-tùn cho̍k) chū- hoē ê só͘-chāi, chiū sī chi̍t-châng toā siông-chhiū (Luî-kong ê kì-hō) ē-kha ê sî, tú-tú sī Kiù-chú-tàn ê-hng. Hit-sî ū chi̍t ê pe̍h thâu-mn̂g ê lāu-lâng, tú teh pī-pān chiong cho̍k-tiúⁿ ê kiáⁿ choè seng- lé hiàn-hō͘ Luî-kong.
Ui-hut-lia̍t khoàⁿ- kìⁿ liáu, koáⁿ-kín cháu chìn-chêng khì nâ i ê to, kiù chit ê kó͘-chui ê gín-ná ê sìⁿ-miā. Hiah ê iá-bân lâng in-uī in só͘ thiàⁿ ê gín-ná tit-tio̍h kiù, lóng chin hoaⁿ-hí, koh bô loā-kú chiū lóng ké-oāⁿ lâi kui-oá Iâ-so͘. Ui Sèng-jîn chit-sî kia̍h hit ê lāu-lâng ê pó͘-thâu, phut hit châng siông-chhiū; siông-chhiū teh beh tó--lo̍h-lâi ê sî, soà hō͘ luî kòng kàu chhuì- chhuì. Hut-jiân tī goân-kū uī khoàⁿ-kìⁿ chi̍t-châng chíⁿ-chíⁿ ê tō͘-siong-chhiū puh--chhut-lâi, chin chhiⁿ-chhuì koh kim-nà-sàⁿ. In chiū chiong chit-châng tō͘-siong-chhiū kng kàu cho̍k-tiúⁿ ê thiáⁿ tiong-ng chhāi-teh. Tāi-ke lóng hoaⁿ- hoaⁿ hí-hí teh se̍h chit-châng chhiu. Tiâu-tùn cho̍k ê lâng thiaⁿ-kìⁿ Iâ-so͘ ê kò͘-sū kap toā ê thiàⁿ-thàng, tī tiap-á-kú ê tiong-kan, lóng tī chit-châng tō͘-siong- chhiū-kha piàn chò Ki-tok-tô͘. Che chiū-sī Sèng-tàn-chhiū ê lâi-le̍k.
Lán chhiat-chhiat m̄-thang boē kì-tit, Sèng-tàn cheh sī Iâ-so͘ ê siⁿ-ji̍t. Tng lán se̍h Sèng-tàn-chhiū uî teh chē ê sî, tio̍h chiong lán ê sim chò lé-mi̍h hiàn hō͘ Iâ-so͘. Iâ-so͘ kin-á-ji̍t tuì lán kóng, “Chiong lí ê sim hō͘ goá!” Nā lín khéng án-ni chò, Iâ-so͘ m̄-nā beh pò-tap lín pêng-an hoaⁿ-hí ê sim, hō͘ lín tī Sèng-tàn cheh hióng-siū bē liáu, soà beh hō͘ lín chi̍t-sì-lâng hióng-siū bē liáu. Chit-sî sī lín hiàn-sin hō͘ Iâ-so͘ tē-it ha̍p ê sî; chit-sî thiⁿ-sài teh koh gîm tī Pek-lī-hêng só͘ gîm ê si: “Tī téng-bīn êng-kng kui Siōng-tè; ē-bīn hô-pêng, lâng tit-tio̍h in-tián.” Lín ū kam-goān uī ka-tī ê iân-kò͘ kap uī Iâ-so͘ ê iân-kò͘ án-ni chò mah?
漢羅（Ùi原文改寫）
聖誕樹ê來歷
1926.12 501卷 p.13-14
(對閩南聖會報摘錄)
當耶穌出示tī伯利恆ê時，信上帝ê人攏m̄知聖誕是甚物事。Hit時陣出世ê囡仔目珠ê福氣，也無親像現今ê囡仔所享受ê大。查考耶穌ê父母當日ê情境真正散hiong。伊出世ê所在m̄是皇宮，就是馬tiâu。耶穌所睏ê床，m̄是chhu膨被ê搖床；就是充滿稻草ê馬槽。耶穌ê家雖然是chiah艱苦，chiah卑微，伊卻是上帝獨生ê放sak天頂ê寶座，降落世間做人，tiàm tī罪惡貫滿罪人ê中間，用上帝ê大疼痛來教示世間人。
當耶穌出世hit日，天頂bat有真濟天使組織吟詩班，吟真濟好聽ê詩，hō͘伯利恆城ê人聽，其中第一好聽ê一首就是：「Tī頂面榮光歸上帝，地面和平，人得著恩典。」Hit時tiàm tī曠野顧羊ê人，聽見天使歡喜ê歌，都也無se̍h一叢聖誕樹坐--teh慶祝聖誕；in只有是放下伊所顧ê王。In chhoe著耶穌ê時陣，就仆teh拜伊。Tī hit時都也無人想到聖誕樹這個事。
照流傳聖誕樹是tuì甚物時才有neh？查考耶穌基督降生後732年，tī日耳曼（德國）有一個聖人名Ui-but-lia̍t。伊chhoā一陣祭司beh去chhoē hiah 個拜雷公ê人，beh教in著改換來信耶穌。
照史記所講，當in振起精神tī hit個暗樹林ê厚雪ê內面，勇敢進前到tī野蠻人（條頓族）聚會ê所在，就是，叢大松樹（ê雷公記號）下腳ê時，抵抵是救主誕e昏。Hit時有一個白頭毛ê老人，抵teh備辦將族長ê子做牲禮獻hō͘雷公。
Ui-hut-lia̍t看見了，趕緊走進前去nâ伊ê刀，救hit個古錐ê囡仔ê生命。Hiah ê野蠻人因為in所疼ê囡仔得著救，攏真歡喜，koh無偌久就攏改換來歸依耶穌。Ui聖人這時舉hit個老人ê斧頭，phut hit叢松樹；松樹teh beh倒--落來ê時，煞hō͘雷kong到碎碎。忽然tī原舊位看見一叢chín-chín ê杜松樹puh--出來，真青翠，koh金nà-sàn。In就將這叢杜松樹扛到族長ê廳中央chhāi-teh。大家攏歡歡喜喜teh se̍h這叢樹。條頓族ê人聽見耶穌ê故事佮大ê疼痛，tī tiap仔久ê中間，攏tī這叢杜松樹腳變做基督徒。Che這是聖誕樹ê來歷。
咱切切m̄-thang boē記得，聖誕節是耶穌ê生日。當咱se̍h聖誕樹圍teh坐ê時，著將咱ê心做禮物獻hō͘耶穌。耶穌今仔日。Tuì咱講：「將你ê心hō͘我！」若lín肯án-ni做，耶穌m̄若報答lín平安歡喜ê心，hō͘ lín tī聖誕節享受bē了，續beh hō͘ lín一世人享受bē了。這時是lín獻身hō͘耶穌第一合ê時，這時天使koh teh 吟tī伯利恆所吟ê詩：「Tī天頂榮光歸上帝；下面和平，人得著恩典。」Lín有甘願為家己ê緣故佮為耶穌ê緣故án-ni做mah？