一滴一滴的水
Chi̍t tih chi̍t tih ê chuí
文獻資訊
| 項目 | 資料 |
|---|---|
| 作者 | 康清塗/郭水龍 Khng Chheng-thô͘/Keh Chuí-lêng |
| 卷期 | 芥菜子 |
| 卷期 | 第 11 號 |
| 日期 | 1926/12 |
| 頁數 | 11-12 |
白話字（原文數位化）
“Chi̍t tih chi̍t tih ê chuí”
(21)
Lāu Thó͘-tī bô sìn-iōng
Tī Se̍k-chí-koe, ū chi̍t ê hó-gia̍h lâng sìⁿ Tân, tī kū-nî, i ū chin choē chhek, beh thiò ê sî, ū mn̄g i só͘ ho̍k-sāi ê Thó͘-tī mn̄g khoàⁿ chhek thang thiò á m̄-thang, (hit sî ê kè chi̍t-chhia sī ￥ 112.00) bô ín-poe; kóng m̄-thang, oē khí-kè ín 3 poe. Tân bó͘ chiū bô thiò, kàu koh nn̄g-saⁿ ge̍h-ji̍t, chhek lo̍h-kè; i chiū koh mn̄g khoàⁿ thang thiò mah, nā thang chhiáⁿ ín-poe, Thó͘-tī iū bô ìn; kóng nā oē khí-kè, liân ìn 6 poe; i chiū an-sim kàu kin-nî 6 ge̍h, chhek koh toā loa̍h-kè, chhun bô chi̍t-poàⁿ chîⁿ. Tân bó͘ chin toā siū-khì, chiū ēng hun-chhe kòng Thó͘-tī, soà choè nn̄g-koe̍h, siū-khì kóng, “goá hō͘ lí hāi chi̍t-ē liáu nn̄g-chheng goā-kho͘”. I ê khan-chhiú khoàⁿ chi̍t ē tio̍h chi̍t kiaⁿ, suî-sî chhoā Thó͘-tī khì ji̍p-īⁿ.
Khng Chheng-thô͘.
22.
Má-chó͘ tuh ka-chē.
Nn̄g-nî chêng, tī Gî-lân, ū chi̍t ê lâng miâ Tân Chhiū, i sī châi-sán-ka, teh khui io̍h-tiàm, chin jia̍t-sim pài-pu̍t. I chí-ū siⁿ chi̍t ê hāu-siⁿ 12 hè, chin thiàⁿ-sioh. chin hoaⁿ-hí; bô phah-sǹg ū chi̍t ji̍t i ê kiáⁿ hoat-jia̍t chin kan-khó͘, chiū kín mn̄g sîn-bêng. Má-chó͘ kóng, tē-chú bò iàu-kín, sǹg goá ê sū. Chóng-sī pīⁿ ná siong-tiōng, chiū khì mn̄g i-seng, nā-sī i-seng kóng kè-chèng! Kó-jiân sí-khì, i pē-bú chin siong-pi. Nā-sī hit ê sí ê gín-ná, choân-sin o͘-ba̍k-ba̍k, i ê lāu-pē khoàⁿ liáu chin kî-koài. Ū chi̍t ê lāu-lâng kā i kóng, lí ê kiáⁿ sī hō͘ lâng hē-tio̍h hû chiah oē án-ni, si̍t-chāi chin khó-lîn, m̄-chai thang kiù. I chiū thong chhù-lāi sì-koè chhē, kó-jiân tī Má-chó͘ bīn-chêng ê hiuⁿ-lô͘-té, chhē tio̍h chi̍t-tiuⁿ hû-á. I chiū toā siū-khì chiong Má-chó͘ kap kî-û ê pu̍t, lóng sàu lo̍h thô͘-kha, ēng kha chàm kóng, “goá ta̍k-ge̍h ta̍k nî khai chin-choē chîⁿ teh pài--lín, sī ǹg-bāng lí oē pó-hō͘ goá ê toā-soè, nā sī goá ê gín-ná khì goā-bīn hoān-tio̍h kuí, lí iáu tio̍h pó-hō͘ i, nā-sī pháiⁿ-lâng the̍h hû khǹg tī lí ba̍k-chiu chêng ê hiuⁿ-lô͘, lí bô chí-sī goá tī m̄-chai-iáⁿ, lí sī teh tuh ka-chē mah? Goá ho̍k-sāi lí ū sím-mi̍h lī-ek”. Ná-kóng ná háu, chiū ēng to chám chhuì-chhuì.
Kó-jiân nā ū iáⁿ án-ni, si̍t-chāi Má-chó͘ sī teh tuh-ka-chē.
Khng Chheng-thô͘
(23)
Hiān-pò
Kūn-lâi Chi-ná chiàn-loān ê sî, ū chi̍t ê bé-peng, hōng kong-sū, ài kàu bó͘ só͘-chāi, lō͘-tiong tú-tio̍h chi̍t ê lāu-lâng chhoā chi̍t ê cha-bó͘ gín-ná, bīn-māu put-chí suí, chit ê bé-peng siâ-sim hoat-tōng, bēng-lēng i thêng kha, kā lāu-lâng kóng “Lí sī thàm-cheng ū choē”, āu-lâi chiū sió-khoá chhiò kóng, “goá khó-lîn lí sī lāu-lâng, put-jím chiong lí sàng kàu koaⁿ pān-choē; chóng-sī chit ê cha-bó͘ gín-ná, tio̍h tè goá kàu phian-phiah ê só͘-chāi, ū oē beh kā i kóng, lí tiàm chia thèng-hāu, m̄-thang tè goá khì, kā i kóng tio̍h thiaⁿ goá ê oē, nā bô beh ēng chhèng phah-sí--lí”. Cha-bó͘ gín-ná ko͘-put-chiong thàn i, bé-peng chiū ēng bé-soh pa̍k tī ka-kī ê poàⁿ-io, tú teh thǹg saⁿ, ia̍h kah cha-bó͘ gín-ná thǹg saⁿ, koh kiò i chiong só͘ giâ ê hō͘-soàⁿ thián-khui, bô phah-sǹg hō͘-soàⁿ chi̍t ē thián, bé tio̍h chi̍t kiaⁿ, khí-kha chiū pháu, thâu-khak giâ-koâin, ti̍t khì, kàu nn̄g lí goā lō͘ chiah thêng. Chiong chit ê bé-peng ti̍t-thoa ti̍t-khì, chhoè kàu liù-phê liù-khò͘, huih lâu huih tih, khuì to beh choa̍t khì, jîn-su(sū) put-séng. Hit ê lāu-lâng chin hoaⁿ-hí, chhoā hit ê cha-bó͘ gín-ná kín-khì, thoat-lī chai-ē.
“Lâng hāi lâng thiⁿ m̄-khéng, Thiⁿ hāi lâng tī ba̍k-chêng”. Chit-kù ê só͘ kóng, pò-èng chin kín, thian-lí hiān-pò.
Keh Chuí-lêng.
漢羅（Ùi原文改寫）
「一滴一滴的水」
(21)
老土地無信用
佇汐止街，有一个好額人姓陳，佇舊年，伊有真濟粟，欲thiò 的時，有問伊所服事的土地問看粟通thiò 抑毋通，(彼時的價一車是￥ 112.00)無允杯；講毋通，會起價允 3杯。陳某就無thiò，到閣兩三月日，粟落價；伊就閣問看通thiò mah，若通請允杯，土地又無應；講若會起價，連應 6杯；伊就安心到今年6月，粟閣大落價，chhun無一半錢。陳某真大受氣，就用煙吹kòng土地，紲做兩koe̍h，受氣講，「我予你害一下了兩千外箍」。伊的牽手看一下著一驚，隨時chhoā 土地去入院。
康清塗。
(22)
媽祖tuh ka-chē。
兩年前，佇宜蘭，有一个人名陳樹，伊是財產家，teh開藥店，真熱心拜佛。伊只有生一个後生12歲，真疼惜。真歡喜；無拍算有一日伊的囝發熱真艱苦，就緊問神明。媽祖講，弟子無要緊，算我的事。總是病ná傷重，就去問醫生，但是醫生講過症！果然死去，伊爸母真傷悲。但是彼个死的囡仔，全身烏墨墨，伊的老爸看了真奇怪。有一个老人共伊講，你的囝是予人hē著符才會按呢，實在真可憐，毋知通救。伊就通厝內四界揣，果然佇媽祖面前的香爐底，揣著一張符仔。伊就大受氣將媽祖佮其餘的佛，攏掃落土跤，用跤chàm講，「我逐月逐年開真濟錢teh拜--恁，是向望你會保護我的大細，若是我的囡仔去外面患著鬼，你猶著保護伊，但是歹人提符囥佇你目睭前的香爐，你無指示我佇毋知影，你是teh tuh ka-chē mah？我服事你有啥物利益」。Ná講ná吼，就用刀斬碎碎。
果然若有影按呢，實在媽祖是teh tuh-ka-chē。
康清塗
(23)
現報
近來支那戰亂的時，有一个馬兵，奉公事，愛到某所在，路中拄著一个老人chhoā一个查某囡仔，面貌不止媠，這个馬兵邪心發動，命令伊停跤，共老人講「你是探偵有罪」，後來就小可笑講，「我可憐你是老人，不忍將你送到官辦罪；總是這个查某囡仔，著綴我到偏僻的所在，有話欲共伊講，你踮遮聽候，毋通綴我去，共伊講著聽我的話，若無欲用槍拍死--你」。查某囡仔姑不將趁伊，馬兵就用馬索縛佇家己的半腰，拄 teh thǹg 衫，也kah 查某囡仔thǹg 衫，閣叫伊將所giâ 的雨傘展開，無拍算雨傘一下展，馬著一驚，起跤就跑，頭殼giâ懸，直去，到兩里外路才停。將這个馬兵直拖直去，chhoè到liù皮liù褲，血流血滴，氣都欲絕去，人事不省。彼个老人真歡喜，chhoā彼个查某囡仔緊去，脫離災厄。
「人害人天毋肯，天害人佇目前」。這句的所講，報應真緊，天理現報。
郭水龍。