臨時中會
Lîm-sî Tiong-hoē
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 芥菜子 |
| 卷期 | 第 10 號 |
| 日期 | 1926/11 |
| 頁數 | 2-3 |
白話字（原文數位化）
Lîm-sî Tiong-hoē
Tī 11 ge̍h 9 ji̍t, ē-po͘ tiám-poàⁿ cheng, pak-pō͘ ê Lîm-sî Tiong-hoē ū chū-chi̍p tī Báng-kah Lé-pài tn̂g, hù-hoē ê gī-oân. Soan-kàu-su, Bo̍k-su, Tiúⁿ-ló, Chóng-kiōng ū 30 miâ, pông-thèng chiá 20 goā lâng. Gī-tiúⁿ Lâu Tiong-kian chhoā chèng-lâng lé-pài, tha̍k Iok-hān 15 chiuⁿ, chhiáⁿ 3 uī hoē-oân kî-tó khui-hoē, taⁿ chiong só͘ gī-tiāⁿ 2 hāng iàu- kín ê sū, siá tī ē-toé.
- Soan-kàu su lâu-jīm.
In-uī Ka-ná-tāi ê bú-hoē í-keng hun-choè 2 pêng. Chi̍t-pêng choè Liân-ha̍p Kàu-hoē, lán pak-pō͘ ê kàu-hoē, ū hun-phoè sio̍k tī chiàu kū Tiúⁿ-ló hoē hit pêng. Chóng-sī lán ê Soan-kàu su khah choē sī sio̍k tī Liân-ha̍p Kàu-hoē, só͘-í Tiong-hoē koat-gī ài kā tāi-ke lâu-jīm.
- Sîn-ha̍k-hāu liân-ha̍p ê uī-tì piàn-keng khì Tâi-tiong boē chiâⁿ.
Ū 3 hāng ê lí-iû siá tī ē-toé.
A. Pún-nî Tāi-hoē ê koat-gī chiong 11 nî chêng só͘ gī-tiāⁿ Sîn-ha̍k hāu liân-ha̍p ê uī-tì, hut-jiân piàn-keng khì Tâi-tiong, bô liōng-chá thong-ti Tiong-hoē bô chiàu kui-kú.
B. Tāi-hoē Ka-kī bô lí-iû thang piàn-keng, chiong Lam-pak Kàu-sū-hoē ê to͘-ha̍p choè lí-iû lâi piàn-keng, chit ê lí-iû bô chhiong-hun.
C. Lâm-pō͘ ê Kàu-sū-hoē iáu tī-teh, pak-pō͘ ê Kàu-hoē í-keng koé-oāⁿ, án-ni in só͘ chàn-sêng ê la̍t, kui tī khang-khang.
In-uī chiah-ê lí-iû, Liân-ha̍p Sîn ha̍k-hāu ê uī-tì piàn-keng tī Tâi-tiong boē chiâⁿ. Lūn pak-pō͘ ê Sîn-ha̍k-hāu, chiàu kū-nî pak-pō͘ ê tiong-hoē só͘ gī-tiāⁿ khì kap Lâm-pō͘ ê Sîn-ha̍k-hāu kiōng-ha̍k hit ê kî-hān oē kàu mā-nî 3 ge̍h bé. án-ni kàu hit-tia̍p pak-pō͘ ê Sîn-ha̍k-hāu, eng-kai tio̍h tò-tńg Ka-kī ê só͘-chāi.
Tân Chheng-gī kì.
漢羅（Ùi原文改寫）
臨時中會
佇 11月9日，下晡點半鐘，北部的臨時中會有聚集佇艋舺禮拜長，赴會的議員。宣教師、牧師、長老，總共有30名，旁聽者 20外人。議長劉中堅 chhoā眾人禮拜，讀約翰15章，請3 位會員祈禱開會，今將所議定2項要緊的事，寫佇下底。
1、 宣教師留任。
因為加拿大的母會已經分做2爿。一爿做聯合教會，咱北部的教會，有分配屬佇照舊長老會彼爿。總是咱的宣教師較濟是屬佇聯合教會，所以中會決議愛共大家留任。
2、 神學校聯合的位置變更去台中袂成。
有3項的理由寫佇下底。
A、 本年大會的決議將11年前所議定神學校聯合的位置，忽然變更去台中，無量早通知中會無照規矩。
B、 大會家己無理由通變更，將南北教士會的都合做理由來變更，這个理由無充分。
C、 南部的教士會猶佇teh，北部的教會已經改換，按呢in所贊成的力，歸佇空空。
因為遮个理由，聯合神學校的位置變更佇台中袂成。論北部的神學校，照舊年北部的中會所議定去佮南部的神學校共學彼个期限會到明年3月尾。按呢到彼tia̍p北部的神學校，應該著倒轉家己的所在。
陳清義 記。