人生的五不足
Jîn-seng ê Ngó͘-put-chiok
文獻資訊
| 項目 | 資料 |
|---|---|
| 作者 | 陳清忠 Tân Chheng-tiong |
| 卷期 | 芥菜子 |
| 卷期 | 第 10 號 |
| 日期 | 1926/11 |
| 頁數 | 8-9 |
白話字（原文數位化）
Jîn-seng ê Ngó͘-put-chiok (五不足)
Kó͘-chá ū chi̍t ê ha̍k-chiá kiò choè Kai-chhoan kî-oân (皆川淇園), i ū án-ni kóng:－
-
“I-ho̍k (衣服). Sím-mi̍h ìn-toaⁿ lâng tio̍h chhēng saⁿ?Sī in-uī beh ti-hông koâⁿ-joa̍h ê iân-kò͘. Nā-sī án-ni hō͘ seng-khu boē koâⁿ, hō͘ seng-khu boē joa̍h hit-khoán sò͘-sò͘ ê saⁿ, lâng eng-kai tio̍h boán-chiok chiah tio̍h. ài chhēng suí ê saⁿ sī iu-uī koâⁿ-joa̍h iáu-bē ji̍p seng-khu ê chèng-kù. Koâⁿ-joa̍h nā ji̍p seng-khu, chiū thǹg pak-theh á-sī kńg chháu-chhio̍h iā bô hiâm.
-
“Si̍t-bu̍t (食物). Lâng cháiⁿ-iūⁿ tio̍h chia̍h? Sī in-uī beh chhiong-moá khang-pak ê iân-kò͘. Nā-sī án-ni m̄-bián san-tin hái-bī tio̍h oē choè-tit chiah tio̍h. Teh kóng,－ ‘bô hó mih-phè, chia̍h boē lo̍h’ ê tiong-kan, thang chai i ê pak-tó͘ iáu-bē iau. Si̍t-chāi pak-tó͘ nā iau, chiū bí-khng mā bô-hiâm.
-
“Ka-ok (家屋). Lâng cháiⁿ-iūⁿ tio̍h khí-chhù?
Sī in-uī ài û-hông ú-lō͘ ê iân-kò͘. Nā-sī án-ni, ko-hâ tāi-koh m̄-bián khiā oē choè-tit. uī-tio̍h hé-chai chuí-hāi lâi sit-lo̍h chhù ê sî, chiū lâng ê nî-chîⁿ-kháu iā bô hiâm.
- “Chhe-chú (妻子). Lâng cháiⁿ-iūⁿ tio̍h chhoā-bó͘?
Sī in-uī ài thoân hō͘-sû ê in-toaⁿ. Nā-sī án-ni í-keng tit-tio̍h chú-lú ê lâng, eng-kai m̄-thang koh chhoā soè-î. Ū chhe-chú, koh-chài chhoā soè-î, chiah oē poa̍h-lo̍h tī sek-khut lâi tū-sí.
- “Châi-bu̍t (財物). Lâng cháiⁿ-iūⁿ tio̍h kiû châi-bu̍t? Sī in-uī ài pang-chān seng-kè, hō͘ i-si̍t kàu-gia̍h ê in-toaⁿ. Nā-sī án-ni, mí-sái phah-m̄-kìⁿ gī, boē kì-tit kiàn-siàu, lâi tham-chek chāi-bu̍t ah?”
漢羅（Ùi原文改寫）
人生的五不足
古早有一个學者叫做皆川淇園，伊有按呢講：－
1、 「衣服。」啥物因端人著穿衫？是因為欲持防寒熱的緣故。若是按呢予身軀袂寒，予身軀袂熱彼款素素的衫，人應該著滿足才著。愛穿媠的衫是因為寒熱猶未入身軀的證據。寒熱若入身軀，就thǹg pak-theh 抑是捲草蓆也無嫌。
2、 「食物。」人怎樣著食？是因為欲充滿空腹的緣故。若是按呢毋免山珍海味著會做得才著。Teh講，－ 「無好mih-phè，食袂落」 的中間，通知伊的腹肚猶未枵。實在腹肚若枵，就米糠嘛無嫌。
3、 「家屋。」人怎樣著起厝？是因為愛預防雨露的緣故。若是按呢，高廈大閣毋免徛會做得。為著火災-害來失落厝的時，就人的nî-chîⁿ口也無嫌。
4、 「妻子。」人怎樣著娶某？是因為愛傳後嗣的因端。若是按呢已經得著子女的人，應該毋通閣娶細姨。有妻子，閣再娶細姨，才會跋落佇色窟來tū死。
5、 「財物。」人怎樣著求財物？是因為愛幫贊生計，予衣食夠額的因端。若是按呢，mí-sái拍毋見義，袂記得見笑，來tham-chek財物 ah？」