教會的消息
Kàu-hoē ê siau-sit
文獻資訊
| 項目 | 資料 |
|---|---|
| 作者 | 傳道局 Thoân-tō-kio̍k |
| 卷期 | 芥菜子 |
| 卷期 | 第 9 號 |
| 日期 | 1926/10 |
| 頁數 | 13-14 |
白話字（原文數位化）
Kàu-hoē ê siau-sit.
- Báng-kah kàu-hoē ê iù-tī-oân, tuì 9 ge̍h 1 ji̍t khí, chiàu kū koh khui, hiān-chāi chhut-si̍t ê sò͘, téng-po͘ 36 ê, ē-po͘ 25 ê, Kàu-oân 2 miâ chiū-sī Siau-sī Bí-hoâi, Tiuⁿ sī Chu-lân.
Koh-chài hū-lú Sèng-keng gián-kiù-hoē, iā tuì 9 ge̍h thâu chit lé-pài khí, chiàu-kū koh khui, muí lé-pài ji̍t 9 tiám khí kàu 10 tiám. Gô͘ I-seng chiàu-kū koh lâi pang-chān.
-
Téng-siang-khoe ê kàu-hoē, kūn-lâi ū ke-thiⁿ kiû-tō-chiá 6 miâ tī chit-ge̍h-ji̍t ê tiong-kan, ū pò͘-tō tī Bú-tan-khiⁿ, Khōng-á-liâu, Ō-toé, chiah ê só͘-chāi lâi thiaⁿ ê lâng kiōng ū 320 miâ.
-
Thâu-uî kàu-hoē ê chí-bē Lâu sī A-bûn ū î-choán sio̍k Gio̍k-lí kàu-hoē.
-
Tang-sì-kak sin siat ê káng-gī-só͘, tī 9 ge̍h 23 ji̍t í-keng tit-tio̍h Tâi-tiong chiu ê jīm-khó. Tī 10 ge̍h 6 ji̍t ē-po͘ 4 tiám-cheng ū kú-hêng hoat-hoē-sek. Pún kio̍k ê lí-sū-tiúⁿ kap kàn-sū ū lîm-tiûⁿ. Tang-sì kūn ê kūn-siù, sī-ha̍k, kong-ha̍k-hāu tiúⁿ, chng tiong ê thâu lâng, bêng-bōng ka, sin-siong téng ū lâi chham-hoē. Káng-gī-só͘ chē kàu moá-moá, tâng hit ē-hng soà khui ián-soat-hoē, àn beh kóng chi̍t lé-pài-kú. Tāi-kah ê bo̍k-su, Biâu-le̍k, Kong-koán-chng ê thoân-tō-su kap Lâu Tiúⁿ-ló ū lâi tàu pang-chān. iā ū gín-ná lâi o̍h gîm-si kap o̍h lô-má-jī, lóng tio̍h ēng kheh lâng ê si kap jī-bú, soat-kàu iā tio̍h ēng kheh-oē. Chhiáⁿ lia̍t-uī hiaⁿ-chí pek-chhiat thoè chit-uī sin-siat ê só͘-chāi kî-tó, ǹg-bāng Chú ê tō-lí, oē tit ji̍p tī hia ê lâng ê sim.
-
Bâ-û ê kàu-hoē tī 9 ge̍h 12 ji̍t siú Sèng-chhan, lâm-lú kiōng ū 36 miâ, iā ū chiap-la̍p chi̍t ê gín-á niá soé-lé.
Koh ū khui toā ián-soat-hoē 10 ji̍t kú, tī oán-lí, ū chioh hì-hn̂g lâi choè hoē-tiûⁿ, koh ū chiáⁿ Tâi-tiong Ki-tok-kàu chheng-liân-thoân ê im-ga̍k-tuī lâi tàu pang-chān, lâi thiaⁿ ê lâng put-chí choē. ián-soat liáu, ū 6 ê siàu-liân lâng chì-goān ài gián-kiù pe̍h-oē-jī; koh ū chhiáⁿ chi̍t ê lú soan-tō-hū tī hia kà-sī hū-jîn lâng. Hiān-sî ū 10 goā lâng teh o̍h pe̍h-oē-jī kap Sèng-keng. Koh tī kuí-nā chng-thâu pò͘-tō, ki-hoē iā chin hó, lâi thiaⁿ ê lâng kiōng ū kuí-nā pah lâng, tāi-ke chin hoan-gêng, ū ê chì-goān chiap-soà beh koh lâi gián-kiù, iā ū pó-chiàⁿ lâi chhiáⁿ soan-tō-hū khì in ê chng-thâu kà-sī hū-jîn-lâng.
-
Sin-po͘ kàu-hoē ê chú-ji̍t-o̍h ū teh gián-kiù Kńg-tang ê jī-bú, chiū-sī Kheh-lâng ê pe̍h-oē-jī.
-
Pîⁿ-nâ-bé ê káng-gī-só͘, ū siat bián-lē-hoē kap kî-tó hoē tī hoē-iú ê ka-têng, thoân-tō su sūn ki-hoē pò͘-tō, chhut-si̍t ū 22 lâng, ki-hoē put-chí-hó, hit só͘-chāi ê hoē-iú lóng sī tiàm tī soaⁿ-ni̍h.
-
Lō-tong ê kàu-hoē, tī 9 ge̍h 19 ji̍t ū ke-thiⁿ 3 ê toā-lâng, 3 ê gín-ná niá soé-lé. Koh tī pún ge̍h kan ū khui pò͘-tō-hoē tī 4 ê chng-thâu, kiōng ū 200 lâng thiaⁿ tō-lí, iā ū lâng piān-pok, chóng-sī kàu-bé ū hâng-ho̍k.
-
Saⁿ-kak-po͘ ê kàu-hoē tī 9 ge̍h 12 ji̍t ū siú Sèng-chhan, lâm-lú kiōng 25 lâng. Bêng Bo̍k-su tī-hia chú-lí, iā ū kiâⁿ soé-lé hō͘ chi̍t soè-kiáⁿ.
-
Tām-chuí ê kàu-hoē ū kong-kú Tiuⁿ Kî-choân choè tiúⁿ-ló, tī 9 ge̍h 26 ji̍t ū siat-li̍p. Koh-chài Tân Chheng-tiong ê tē saⁿ hāu-siⁿ Tân Chun-bûn tī 9 ge̍h 7 ji̍t ū kè-óng.
-
Saⁿ-kak-éng ê kàu-hoē tī 10 ge̍h 3 ji̍t ū siú Sèng-chhan, kiōng 31 lâng, koh nn̄g ê toā lâng, 2 ê gín-ná niá soé-lé, chi̍t ê chiap siú Sèng-chhan.
-
Pak-tâu kap Kî-lî-gān ê toē-hng ū khui pò͘-tō-hoē 5 ji̍t-kú, thiaⁿ ê lâng-gia̍h kiōng ū 405 miâ, ki-hoē put-chí hó.
-
Chuí-téng-kha ê kàu-hoē tī 9 ge̍h tiong ū khui ián-soat-hoē 10 ji̍t kú, kiōng ū 900 lâng lâi thiaⁿ, tāi-ke put-chí hoan-gêng.
-
Toā-tiū-tiâⁿ ê kàu-hoē ū khui pò͘-tō-hoē 5 ji̍t kú, thiaⁿ ê lâng iok ū 2000 lâng. Koh-chài iù-tī-oân iā tuì 9 ge̍h 1 ji̍t koh khui.
-
Ge̍h-bâi ê kàu-hoē ū sin siat chú-ji̍t-o̍h, hiān-sî ha̍k-seng ū 20 miâ.
-
Tāi-kah ê kàu-hoē tī 9 ge̍h 5 ji̍t ū siú Sèng-chhan, lâm-lú kiōng 59 miâ, iā ū chi̍t ê gín-ná niá soé-lé.
漢羅（Ùi原文改寫）
教會的消息。
1、艋舺教會的幼稚園，對9月1日起，照舊閣開，現在出席的數，頂晡36 个，下晡25 个，教員 2名就是蕭氏美懷，張氏珠蘭。
閣再婦女聖經研究會，也對9月頭這禮拜起，照舊閣開，每禮拜日9點起到10點。吳醫生照舊閣來幫贊。
2、頂雙溪的教會，近來有加添求道者 6名佇這月日的中間，有佈道佇武丹坑、槓仔寮、澳底，遮个所在來聽的人共有320名。
3、頭圍教會的姊妹劉氏是阿紋有移轉屬玉里教會。
4、東勢角新設的講義所，佇9月23日已經得著台中州的認可。佇10月6日下晡4點鐘有舉行發會式。本局的理事長佮幹事有臨場。東勢郡的郡守，視學，公學校長，庄中的頭人，名望家，紳商等有來參會。講義所坐到滿滿，同彼下昏紲開演說會，按欲講一禮拜久。大甲的牧師，苗栗，公館庄的傳道師佮劉長老有來鬥幫贊。也有囡仔來學吟詩佮學羅馬字，攏著用客人的詩佮字母，說教也著用客話。請列位兄姐迫切替這位新設的所在祈禱，向望主的道理，會得入佇遐的人的心。
5、Bā-û的教會佇9月12日守聖餐，男女共有36名，也有接納一个囡仔領洗禮。
閣有開大演說會 10日久，佇宛裡，有借戲園來做會場，閣有請台中基督教青年傳的音樂隊來鬥幫贊，來聽的人不止濟。演說了，有6 个少年人志願愛研究白話字；閣有請一个女宣道婦佇遐教示婦人人。現時有10外人teh學白話字佮聖經。閣佇幾若庄頭佈道，機會也真好，來聽的人共有幾若百人，大家真歡迎，有的志願接紲欲閣來研究，也有保正來請宣道婦去in 的庄頭教示婦人人。
6、新埔教會的主日學有teh研究廣東的字母，就是客人的白話字。
7、坪林尾的講義所，有設勉勵會佮祈禱會佇會友的家庭，傳道師順機會佈道，出席有22人，機會不止好，彼所在的會友攏是踮佇山裡。
8、羅東的教會，佇9月19日有加添3个大人，3个囡仔領洗禮。閣佇本月間有開佈道會佇4个庄頭，共有200人聽道理，也有人辯駁，總是到尾有降服。
9、三角埔的教會佇9月12日有守聖餐，男女共25人。明牧師佇遐主理，也有行洗禮予一細囝。
10、淡水的教會有公舉張期全做長老，佇9月26日有設立。閣再陳清忠的第三後生陳遵文佇9月7日有過往。
11、三角湧的教會佇10月3日有守聖餐，共31人，閣兩个大人，2个囡仔領洗禮，一个chiap siú聖餐。
12、北投佮唭哩岸的地方有開佈道會5日久，聽的人額共有405名，機會不止好。
13、水頂跤的教會佇9月中有開演說會 10日久，共有900人來聽，大家不止歡迎。
14、大稻埕的教會有開佈道會5日久，聽的人約有2000人。閣再幼稚園也對9月1日閣開。
15、月眉的教會有新設主日學，現時學生有20名。
16、大甲的教會佇9月5日有守聖餐，男女共59名，也有一个囡仔領洗禮。