莫得驚
Bo̍h-tit kiaⁿ
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 芥菜子 |
| 卷期 | 第 8 號 |
| 日期 | 1926/9 |
| 頁數 | 2 |
白話字（原文數位化）
Bo̍h-tit kiaⁿ
Khé-sī-lio̍k 1 chiuⁿ 17 chat. Iok-hān tī Poa̍t-mô͘ hái-sū, tit-tio̍h Chú ê khé-sī. Ū khoàⁿ-kìⁿ Chú, chin kiaⁿ, chiū phak tī i ê kha-chêng chhin-chhiūⁿ sí. Chú ēng chhiú bong i Kóng, Boh-tit kiaⁿ. Iok-hān tī sè-kan ê sî, siông-siông oá tī Chú ê sin-piⁿ, lóng bô kiaⁿ, chái-iūⁿ chit pái khoàⁿ-kìⁿ i ê bīn, chiū kiaⁿ kàu beh sí; soà phak tī tē-ni̍h? In-uī hit-sî Chú ê iông-māu kap tī sè-kan ê sî ū koh-iūⁿ. Chiū-sī i ê pún-sèng hián-lō͘ kap Siōng-tè saⁿ-tâng. Só͘-í Iok-hān khoàⁿ-kìⁿ tòng boē tiâu. Chóng-sī Chú ū an-uì i, hō͘ i tit-tio̍h an-sim. Lán tiàm chit sè-kan, ū choē-choē hāng hō͘ lán ê sim kiaⁿ-hiâⁿ, lán tio̍h khiā-chāi. Chú iā beh an-uì lán, kā kóng bo̍h-tit kiaⁿ. Lâi Kóng 3 khoán, pâi-lia̍t tī ē-toé.
- Bo̍h-tit kiaⁿ choē-koà boē bô khì.
Lán í-keng chai choē-koà tī lán ê sim-lāi, chin lī-hāi, chhin-chhiūⁿ chhng-to̍k tī lâng ê thé-tiong. Kai-chài Siōng-tè ū chhe I ê Kiáⁿ Iâ-so͘ kàng-sè thoè lán sio̍k-choē, lán tuì sìn-khò I ê ji̍t khí, chiū chiâⁿ-choè bô choē ê lâng. Só͘-í bo̍h-tit kiaⁿ choē-koà iáu tī-teh: In-uī Chú Iâ-so͘ kā lán tû-khì, chhin-chhiūⁿ tang lī sai ê hn̄g. án-ni lán tio̍h an-sim m̄-bián kiaⁿ.
- Bo̍h-tit kiaⁿ bē lâi ê sū.
Chú ū èng-ún lán chiong-lâi só͘ beh tit-tio̍h ê ke-gia̍p, só͘-í lán m̄ bián kiaⁿ bô thang tit-tio̍h; In-uī Chú í-keng kā lán pī-pān, khoàⁿ i só͘ kóng chiū chai: I kóng, Goá khì thoè lín pī-pān só͘-chāi, nā khi pī-pān só͘-chāi, teh-beh koh lâi chiap-la̍p lín kui tī goá. Goá. Goá só͘ tī-teh, lín ia̍h tī-teh. án-ni lán thang an-sim m̄-bián kiaⁿ. Bián-kiaⁿ bô Thian-tông, bô hok-khì, bô tio̍h: In-uī Chú sī chin-si̍t ê Chú bô phiàn lâng. Só͘-í lán bo̍h-tit kiaⁿ bē lâi ê sū.
- Bo̍h-tit kiaⁿ sí-sit ê tāi-chì.
Siōng-tè hō͘ lán chhut-sì, hō͘ lán lī-khui sè-kan, lóng sī chiàu I ê chí-ì, lán bo̍h-tit kiaⁿ, ia̍h bo̍h-tit hiâm. Iok-hān kóng, Chú Iâ-so͘ chiáng Im-hú sí-bông ê só͘-chāi, chiū-sī siⁿ-sí ê koân lóng sio̍k I. Pó-lô kóng, oa̍h, sī sio̍k Chú; sí iā-sī sio̍k Chú. Só͘-í lán lâng tio̍h chiong sin-thé lêng-hûn kau-thok I, bo̍h-tit kiaⁿ. Lán ê sin-khu sui-jiân keng-kè sí; nā-sī lêng-hûn, éng-oán tī-teh. Só͘-í lán sìn Chú ê lâng tio̍h pí bē sìn Chú ê lâng, khah bêng-pe̍k. Bo̍h-tit kiaⁿ chit khoán ê sū, tio̍h hâng-ho̍k Siōng-tè, hō͘ i tī-lí. Chú Iâ-so͘ í-keng iâⁿ-kè sí, lán thang an-sim m̄-bián kiaⁿ.
漢羅（Ùi原文改寫）
莫得驚
啟示錄1章17節。約翰佇Poa̍t-mô͘海嶼，得著主的啟示。有看見主，真驚，就仆佇伊的跤前親像死。主用手摸伊講，莫得驚。約翰佇世間的時，常常倚佇主的身邊，攏無驚，怎樣這擺看見伊的面，就驚到欲死；紲仆佇地裡？因為彼時主的 容貌佮佇世間的時有koh樣。就是伊的本性顯露佮上帝相同。所以約翰看見擋袂牢。總是主有安慰伊，予伊得著安心。咱踮這世間，有濟濟項予咱的心驚惶，咱著徛在。主也欲安慰咱，共講莫得驚。來講3款，排列佇下底。
1、 莫得驚罪過未無去。
咱已經知罪過佇咱的心內，真厲害，親像瘡毒佇人的體中。佳哉上帝有差伊的囝耶穌降世替咱贖罪，咱對信靠伊的日起，就成做無罪的人。所以莫得驚罪koà猶佇teh：因為主耶穌共咱除去，親像東離西的遠。按呢咱著安心毋免驚。
2、 莫得驚未來的事。
主有應允咱將來所欲得著的家業，所以咱毋免驚無通得著；因為主已經共咱備辦，看伊所講就知：伊講，我去替恁備辦所在，若khi備辦所在，teh欲閣來接納恁歸佇我。我。我所佇teh，恁也佇teh。按呢咱通安心毋免驚。免驚無天堂，無福氣，無著：因為主是真實的主無騙人。所以咱莫得驚未來的事。
3、 莫得驚死失的代誌。
上帝予咱出世，予咱離開世間，攏是照伊的旨意，咱莫得驚，也莫得嫌。約翰講，主耶穌掌陰府死亡的所在，就是生死的權攏屬伊。保羅講，活，是屬主；死也是屬主。所以咱人著將身體靈魂交託伊，莫得驚。咱的身軀雖然經過死；但是靈魂，永遠佇teh。所以咱信主的人著比未信主的人，較明白。莫得驚這款的事，著降服上帝，予伊治理。主耶穌已經贏過死，咱通安心毋免驚。