名人的祈禱
Bêng-jîn ê kî-tó
文獻資訊
| 項目 | 資料 |
|---|---|
| 作者 | 陳清忠 Tân Chheng-tiong |
| 卷期 | 芥菜子 |
| 卷期 | 第 8 號 |
| 日期 | 1926/9 |
| 頁數 | 10-11 |
白話字（原文數位化）
Bêng-jîn ê kî-tó
(IV)
J. Norden (1548－1625)
Siān-liông ê Pē ah, goá ta̍k-ji̍t kiû-chhē Lí, Lí ta̍k-ji̍t hián-hiān tī goá; goá nā kiû Lí, bô-lūn tī sím-mi̍h sî, goá oē khoàⁿ tio̍h Lí,－bô-lūn tī ke-lāi, bô-lūn tī iá-goā, tī Sîn-tiān á-sī tī koe-lō͘ sī án-ni. Goá bô-lūn beh choè sím-mi̍h, Lí kap goá saⁿ-kap tī-teh; bô-lūn tī lim-chia̍h ê sî, giâ-pit á-sī choè kang ê sî, khiâ-bé á-sī tha̍k-chheh ê sî, be̍k-sióng á-sī kî-tó ê sî, Lí put-sî kap goá saⁿ-kap tī-teh, goá bô-lūn tī sím-mi̍h só͘-chāi, choè sím-mi̍h sū, goá sî-siông kám-tio̍h Lí ê un ài. Goá nā siū ap-pek ê sî, Lí thoè goá tî-hông; lâng nā oàn-hūn goá, Lí pó-hō͘ goá; goá nā pak-tó͘ iau, Lí iúⁿ-chhī goá; goá só͘ kî-goān ê, bô-lūn sím-mi̍h, Lí siúⁿ-sù goá. Ah, kiû lí éng-oán siúⁿ-sù chit ê un-ài hō͘ goá, thang hō͘ thong sè-kan ê lâng lâi chai-bat Lí só͘ pó-hō͘ goá ê khuì-la̍t, Lí ê un-huī, Lí ê thiàⁿ-thàng, koh siōng-chhiáⁿ hō͘ goá ê tuì-te̍k oē chai-bat Lí ê un-ài sī éng-oán bô-piàn.
(V)
Anselm (1033－1109)
Ah, Siōng-tè ah, Lí sī oa̍h-miā, Lì sī tì-huī, chin-lí phok-ài, chiok-hok, éng-oán to̍k-it ê Chin-sîn! Goá ê Chú goá ê Siōng-tè ah, Lí sī goá ê ǹg-bāng, sī goá ê hoaⁿ-hí. Goá ēng kám-siā lâi kò-pe̍h: Li ū ēng Lí ê hêng-siōng lâi chhòng-chō goá, goá beh chiong goá ê só͘ siūⁿ lâi kui Lí, lâi thiàⁿ Lí. Chú ah, hō͘ goá si̍t-chái oē bat Lí, tuì án-ni hō͘ goá thang chiām-chiām lâi thiàⁿ Lí, hoaⁿ-hí Lí, chiong Lí lâi choè goá ê só͘ ū.
án-ni, hiān-sè nā boē tit-thang oân-choân tit-tio̍h chit ê chiok-hok, chì-chió iā tio̍h hō͘ goá seng-tióng tī hit lāi-bīn, thang tī lâi-sè lâi oân-chiâⁿ. Kiû Lí tī hiān-sè ke-thiⁿ Lí ê tì-sek, lâi-sè thang oân-sêng--i; hiān-sè ke-thiⁿ Lí ê thiàⁿ, lâi-sè thang sêng-chiū--i. Tī-chia tuì hi-bōng lâi ke-thiⁿ hoaⁿ-hí, tī-hia oē tit-thang tit-tio̍h oân-choân ê kiat-si̍t. Sim só͘ goān.
(VI)
James Martineau (1805-1900)
Hiān-kim tī-teh, kó͘-chá tī-teh, bī-lâi iā tī-teh ê Siōng-tè ah, sè-chiūⁿ ê lâng tī Lí ê bīn-chêng heng-khí, tī Lí ba̍k-chêng bia̍t-bô; ta̍k sè-tāi lâng-lâng kiû chhē--Lí, chai Lí ê sìn-si̍t bô kiông-chīn. Goán ê chó͘-sian tī in ê lō͘-chiūⁿ ū tit-tio̍h Lí ê chhoā-lō͘, iā hioh-khùn tī Lí ê chû-ài; siōng-chhiáⁿ kàu in ê kiáⁿ-sun, Lí iáu-kú ji̍t-sî choè in ê hûn-thiāu, mî-sî choè in ê hé-thiāu. Goá tú-tio̍h chióng-chióng bê-he̍k ê sî, kan-ta Lí kūn-oá, Lí chai; tī siong-pi ê sî, Lí ê lîn-bín koh-oa̍h goá loán-jio̍k ê sim-lêng; tī sūn-kéng, hēng-hok ê sî, kan-ta Lí ê Sèng Sîn oē phah-phoà goá ê khoa-kháu, lâi chí-tō goá choè pi-bî. Ah, pêng-hô kap chèng-gī to̍k-it ê goân-choâⁿ ah! Kiû Lí sàu-tû goá sim-lāi ê lâ-sâm, hō͘ goá chiâⁿ-choè chi̍t ê, chhin-chhiūⁿ sìn Lí lâi bô kiàn-siàu ê Sèng-tô͘ á-sī Sian-ti lâng.
M̄-sī tuì tī goá ê kè-ta̍t, sī tuì tī Lí ê chû-ài lâi kî-tó. Sim só͘ goān.
漢羅（Ùi原文改寫）
名人的祈禱
(IV)
J.Norden (1548－1625)
善良的爸ah，我逐日求揣你，你逐日顯現佇我；我若求你，無論佇啥物時，我會看著你，－無論佇家內，無論佇野外，佇神殿抑是佇街路是按呢。我無論欲做啥物，你佮我saⁿ-kap佇teh；無論佇lim食的時，giâ筆抑是做工的時，騎馬抑是讀冊的時，默想抑是祈禱的時，你不時佮我saⁿ-kap佇teh，我無論佇啥物所在，做啥物事，我時常感著你的恩愛。我若受壓迫的時，你替我持防；人若怨恨我，你保護我；我若腹肚枵，你養飼我；我所祈願的，無論啥物，你賞賜我。Ah，求你永遠賞賜這个恩愛予我，通予通世間的人來知識你所保護我的氣力，你的恩惠，你的疼痛，閣尚且予我的對敵會知捌你的恩愛是永遠無變。
(V)
Anselm (1033－1109)
Ah，上帝ah，你是活命，你是智慧，真理博愛，祝福，永遠獨一的真神！我的主我的上帝ah，你是我的向望，是我的歡喜。我用感謝來告白：你有用你的形象來創造我，我欲將我的所想來歸你，來疼你。主ah，予我實在會捌你，對按呢予我通漸漸來疼你，歡喜你，將你來做我的所有。
按呢，現世若袂得通完全得著這个祝福，至少也著予我生長佇彼內面，通佇來世來完成。求你佇現世加添你的智識，來世通完成--伊；現世加添你的疼，來世通成就--伊。佇遮對希望來加添歡喜，佇遐會得通得著完全的結實。心所願。
(VI)
James Martineau (1805-1900)
現今佇teh，古早佇teh，未來掖佇teh 的上帝ah，世上的人佇你的面前興起，佇你目前滅無；逐世代人人求chhē--你，知你的信實無窮盡。阮的祖先佇in 的路上有得著你的 chhoā路，也歇睏佇你的慈愛；尚且到in 的囝孫，你iáu-kú日時做in 的雲柱，暝時做in 的火柱。我拄著種種迷惑的時，kan-ta你近倚，你知；佇傷悲的時，你的憐憫閣活我軟弱的心靈；佇順境，幸福的時，kan-ta你的聖神會拍破我的誇口，來指導我做卑微。Ah，平和佮正義獨一的源泉 ah！求你掃除我心內的 lâ-sâm，予我成做一个，親像信你來無見笑的聖徒抑是先知人。
毋是對佇我的價值，是對佇你的慈愛來祈禱。心所願。