淡中glee club達目的
Tām-tiong glee club Ta̍t bo̍k-tek
文獻資訊
| 項目 | 資料 |
|---|---|
| 作者 | 陳清忠 Tân Chheng-tiong |
| 卷期 | 芥菜子 |
| 卷期 | 第 7 號 |
| 日期 | 1926/8 |
| 頁數 | 11-14 |
白話字（原文數位化）
Tām-tiong glee club Ta̍t bo̍k-tek
Tām-chuí Tiong-ha̍k im-ga̍k-pō͘ glee club iú-chì cha̍p miâ, uī-tio̍h Kiaⁿ-to͘ khui im-ga̍k-hoē ê to͘-ha̍p, ū pí û-tēng ê kî-ji̍t khah-chá chi̍t-choā chûn khí-sin, chiū-sī tah 6 ge̍h 28 hō chhut-phâng ê In-phoan-oân. Chhit-ge̍h 2 hō kàu Sîn-hō͘, hit ē-po͘ soà kàu Kiaⁿ-to͘. Sui-bóng thâu-bé tī hia sī 9 ji̍t kú nā-tiāⁿ, iáu-kú ū tit-tio̍h put-chí hó ê ki-hoē. Hit tiong-kan ū khui 5 pái ê im-ga̍k-hoē, iā ū khì kūn-hū put-chí choē só͘-chāi kiàn-ha̍k.
Kî-tiong thang te̍k-kì ê, chiū-sī ū khì Tāi-pán chham-koan Tiau-ji̍t Sin-bûn-siā, iā ū khì Bû-tiān hòng-sòng-kio̍k (無電放送局) ián-chàu.
Pún-jiân táⁿ-sǹg ài tiàm khah-kú, thang khoàⁿ khah-choē só͘-chāi, put-hēng ū lâng tú-tio̍h phoà-pīⁿ, ko͘-put-chiong tio̍h khah chá tńg-lâi. Chhit-ge̍h 11 hō lī-khui Sîn-hō͘, tah Lia̍p-hō͘-oân, 15 hō chá-khí kàu Koe-lâng, tāi-ke pêng-an kàu chhù.
Chit pái ê lú-hêng, sui-jiân kî-kan sī té-té, kiám khoàⁿ put-chí choē só͘-chāi, iáu-kú ta̍k lâng chin toā moá-chiok, in-uī tuì chiūⁿ-lio̍k kàu lī-khui Sîn-hō͘, bô lūn khui im-ga̍k-hoē, kàu ta̍k só͘-chāi, siū-tio̍h choē-choē uī ê Sian-siⁿ pêng-iú ê chīn-la̍t, hó khoán-thāi. Chit-tia̍p ài chioh chit ê choá bīn, chhim-chhim kā in kám-siā, iā te̍k-pia̍t ài kā pún-hāu ê hāu-iú Ông Siú-ióng kun seh siā.
Taⁿ só͘ khǹg ê hi-bōng í-keng si̍t-hiān, só͘ ài ta̍t ê bo̍k-tek iā chiâⁿ!!
Lú-hêng ê ji̍t-thêng kán-lio̍k siá tī ē-bīn:－
Kin-nî uī-tio̍h Thoân-kàu su Siu-ióng-hoē ài khah-chá khui ê in-toaⁿ, ha̍k-hāu ū te̍k-pia̍t khah-chá soah, 6 ge̍h 26 hō chiū lóng chhì-giām bêng-pe̍k. Sī goán ê hok-khì! 27 ji̍t: Tām-chuí chhut-hoat, téng-po͘ tī Siang-liân kap g2-kah lé-pài, tī nn̄g-uī lóng ū gîm kuí-nā siú ê si tī lé-pài ê sî ē-po͘ ū khì hóng-mn̄g goán ê im-ga̍k ê sian-siⁿ Gô͘ Bo̍k-su niû. àm-sî 8 tiám tī Toā-tiū-tiâⁿ pài-tn̂g, (Chheng-liân-hoē chú-chhui) ū khui chàn-bí lé-pài; thèng-chiòng put-chí choē.
28 ji̍t: Chá-khí khì Koe-lâng, ē-tàu lo̍h chûn, 5 tiám chhut phâng. Khah choē sī thâu chi̍t-pái ê chē chûn, put-chí ū chhù-bī; hong-éng chin pîⁿ.
29 ji̍t: Thâu chi̍t-pái khoàⁿ-tio̍h thiⁿ khàm hái uí-tāi ê kong-kéng.
30 ji̍t: Ē-po͘ sî khoà-kìⁿ chi̍t ê sió hái-sū.
7 ge̍h 1 ji̍t: Thàu-chá kàu Bûn-su, it tông chiūⁿ-lio̍k. Thâu-chi̍t pái chia̍h tio̍h loē-tē te̍k-iú ê ké-chí, chin hoaⁿ-hí. 12 tiám chhut-phâng.
2 ji̍t: 8 tiám kàu Sîn-hō͘, pêng-iú Tiân-tó͘ kun lâi tán-chih, it-tông chiūⁿ-lio̍k. Hêng-lí kià chhia-thâu, tāi-ke kiâⁿ Sîn-hō͘ tē-it lāu-jia̍t ê koe-lō͘. āu-lâi hóng-mn̄g pêng-iú Chín-kok kun, i sī Sîn-hō͘ Siông-im lú-ha̍k-hāu ê Sian-siⁿ; i ū kap Hāu-tiúⁿ chhâm-siông, te̍k-pia̍t poah chi̍t-tiám cheng, chhiáⁿ goán tī hia khui im-ga̍k-hoē. Ha̍k-seng sian-siⁿ ū 500 goā lâng. Ē-po͘ 3 tiám poàⁿ kàu Kiaⁿ-to͘, choē-choē pêng-iû lâi tán-chih, hit-àm hun-siok tī in ê siok-sià.
3 ji̍t: 8 tiám kàu 9 tiám tī Tông-chì-siā Kong-hoē-tn̂g khui chàn-bí lé-pài. Boa̍t-kong Tiong-ha̍k-tiúⁿ, te̍k-pia̍t thê kióng chi̍t-tiám cheng, beh choè lióng-hāu chhin-bi̍t ê ki-hoē. Bē ián-chàu ê tāi-seng, goá ū kóng kuí-kù oē kā hāu-tiúⁿ kap lia̍t-uī ê Sian-siⁿ seh-siā, āu--lâi kóng-khí kuí-nā hāng lūn-khí Tông-chì-siā kap tām-chuí Tiong-o̍h ū te̍k-pia̍t chhin-bi̍t ê koan-hē ê só͘-chāi:－
-
Darvis phok-sū (Tông-chì-siā chhòng siat chiá ê chi̍t ê) kap Mackay phok-sū siâng-sî koh tah siâng-chûn lâi Tang-iûⁿ thoân kàu.
-
Lióng-hāu sī tuì siâng chú-gī lâi siat li̍p--ê.
-
Lióng-hāu sui-bóng só͘ sio̍k ê kàu-phài bô saⁿ-tâng, iáu-kú kūn-sî tī Ka-ná-tāi chit nn̄g phài ê kàu-hoē í-keng ū liân-ha̍p, só͘-í thang khoàⁿ-choè sī siâng kàu-phài.
-
Tām-tiong ū kuí-nā-uī, Tông-chì-siā ê chhut-sin-chiá teh choè kàu-oân.
-
Tām-tiong ū choē-choē ha̍k-seng khì Tông-chì-siā tha̍k.
-
Tām-tiong hāu-koa ê tiāu tú sī kap Tông-chì-siā ê chhòng li̍p chiá Sin-tó sian-siⁿ só͘ chhut-sin A-mo͘-su-to Amherst Tāi-ha̍k hāu-koa ê tiāu saⁿ-tâng.
ián-chàu liáu, Boa̍t-kong hāu-tiúⁿ khí-lâi kóng tap-sû, chha-put-to cha̍p goā hun kú, iû-goân sī lūn-khí Lióng-hāu chhin-bi̍t ê koan-hē, kóng-khí Tông-chì-siā Tiong-ha̍k-pō͘ ū 50 goā lâng ê Tâi-oân liû-ha̍k-seng teh tha̍k, chiông-tiong 30 goā lâng sī tuì tām-chuí lâi--ê, si̍t-chāi ū boē tit pun-khui ê koan-hē tī-teh; ǹg-g7 í-āu lióng-hāu kan oē tit-tio̍h ka-pē ê chhin-siān, oán-jiân ná hiaⁿ-tī, saⁿ-kap khan-chhiú lâi chīn in ê sú-bēng; sī só͘ hi-bōng--ê.
Ē-po͘ khì hù Tām-tiong ê liû-ha̍k-seng hoan-gêng-hoē, tī Sîn-ha̍k-koán ê lâu-téng, 1 tiám cheng kú saⁿ-kap khún-tâm chhin-bo̍k.
Ē-hng 7 tiám poàⁿ tī Saⁿ-tiân chheng-liân hoē-koán khui kong-khai ê im-ga̍k-hoē; thèng-chiòng io̍k-liōng 500. Tuì thâu kàu-bé bô thiaⁿ-kìⁿ chi̍t-kù kóng-oē ê siaⁿ, si̍t-chāi in ê tuì im-ga̍k ê lí-kái sī pí lán Tâi-oân sò͘ pē. Choē-choē pái siū-lâng encore (koh-chài chàu chi̍t-piàn lâi thiaⁿ cheh ê ì-sù), thang kóng sī toā sêng-kong, kî-tiong Piano ū tit-tio̍h ka-pē ê hoan-gêng. Chheng-liân-hoē ê chú-sū Siōng-iá kun sī ti-kí ê pêng-iú, i ū chiong hoē-tiûⁿ bô liāu chioh goán (nā-bô chi̍t-àm tio̍h ài 35 kho͘).
4 ji̍t: Chá-khí sî tī Lo̍k-iông kàu-hoē lé-pài, ū chhiáⁿ goán gîm nn̄g-siú si.
àm-sî 8 tiám tī Kiaⁿ-to͘ tē it suí ê pài-tn̂g Pêng-an kàu-hoē khui Im-ga̍k lé-pài, put-chí choē lâng lâi hù. San-kháu bo̍k-su soat-kàu put-chí ha̍p im-ga̍k lé pài, ta̍k-lâng siū kám-kek. Lé-pài liáu ū kap in ê hoē-oân, chán-bí-thoân khún-tâm chhin-bo̍k.
5 ji̍t: Téng-po͘ hiu-ióng, ē-po͘ chhī-tiong kiàn-bu̍t.
6 ji̍t: Téng-po͘ khì khoàⁿ Gín-ná ê Phok-lám-hoē, iā soà khoàⁿ sì-koè.
7 ji̍t: Khì Nāi-liông kiàn-ha̍k, khoàⁿ toā-pu̍t, khoàⁿ Sam-lia̍p soaⁿ, kap koai ê lo̍k choè pêng-iú kuí-nā tiám cheng-kú.－lán nā the̍h mi̍h hō͘ i chia̍h i oē kā lán kiâⁿ lé－Kéng-tì chin hó, Loē-tē ū chiūⁿ-sǹg ê bêng-só͘. Ta̍k-lâng chin boán-chiok.
8 ji̍t: Khì Tāi-pán kiàn-bu̍t, khoàⁿ toā keng ê siong-hâng. āu-lâi khì chham-koan Tiau-ji̍t Sin-bûn-siā, siā-oân chin hó-lé, ēng chheh sàng goán: iā ū kiò goán khì lâu-téng hip-siōng, iā àn-nāi goán khoàⁿ ìn Sin-bûn ê sūn-sū. In-chhat-ki chin toā, ūn-choán chin kín, chi̍t-tiám cheng-kú chi̍t tâi ê ki-khì oē ìn tit 4 7 pō͘ (ìn soà áu piān): ū 2 tâi teh ìn, só͘-í muí tiám cheng oē ìn tit 8 7 pō͘. Koh-chài ìn-siōng ê khì-khū, ìn soà kap kui-pún, muí tiám cheng oē ìn tit 1800 pún. Khoàⁿ chit-khoán, sit-chāi tit-tio̍h chin toā ê lī-ek, chin hoaⁿ-hí.
àm-sî 7 tiám khì Hòng-sòng-kio̍k ián-chàu, chiū-sī kià Bô-soàⁿ ê im-ga̍k hō͘ Ji̍t-pún choân-kok ê lâng thiaⁿ, thiaⁿ-kìⁿkóng Siōng-hái, Tâi-oân iā thiaⁿ oē tio̍h. Tuì Tâi-oân khì hia hòng-sòng ê, sī bô kuí lâng, lóng sī koaⁿ-lī, bîn-kan goán sǹg sī thâu chi̍t-pái, si̍t-chāi sī goán ê êng-kng. Tām-tiong ê miâ éng-oán beh tī in ê Hòng-sòng sú ê lāi-bīn. Liáu-āu ēng chū-tōng-chhia chài goán kàu chheng-liân hoē-koán. In-uī ū chi̍t lâng tú tio̍h phoà-pīⁿ ū hioh tī hia. Pīⁿ-lâng tī hia hioh-khùn 3 ji̍t kú, tit-tio̍h 2 uī ê sian-siⁿ kap chi̍t uī ê A-pô chin chhin-chhiat ê chiàu-kò͘.
9 ji̍t 10 ji̍t: 2 ji̍t kú chū-iû kiàn-ha̍k.
11 ji̍t: Chá-khí lī-khui Kiaⁿ-to͘ kàu Tāi-pán kap phoà-pīⁿ--ê, choè-tīn,
10 tiám goā kàu Sîn-hō͘,suî-sî lo̍h chûn. Saⁿ ê tông-chhong ū sàng goán kàu chûn-nih. 12 tiám chhut-phâng. Ē-po͘ koan-sióng Lāi-hái ê kong-kéng.
12 ji̍t: Thàu-chá kàu Bûn-su, chiūⁿ-lio̍k bé ké-chí. 12 tiám chhut-phâng. Hong-éng chin pîⁿ, 15 ji̍t 8 tiám poàⁿ kàu Koe-lâng. 10 tiám poàⁿ kàu Tâi-pak. It-tông kái-soàⁿ.
Chit-ê lú-hêng thâu-bé ū tit-tio̍h Siōng-chú ê chiàu-kò͘, pīⁿ-lâng chiām-chiām hó, it-tông pêng-an kàu chhù, chhim-chhim kā I kám-siā.
漢羅（Ùi原文改寫）
淡中glee club達目的
淡水中學音樂部 glee club 有志十名，為著京都開音樂會的都合，有比預定的期日較早一choā 船起身，就是搭 6月28號出航的 In-phoan丸。七月2號到神戶，彼下晡紲到京都。雖罔頭尾佇遐是9日久nā-tiāⁿ，iáu-kú有得著不止好的機會。彼中間有開5擺的音樂會，也有去kūn-hū不止濟所在見學。
其中通特記的，就是有去大阪參觀朝日新聞社，也有去無電放送局演奏。
本然打算愛踮較久，通看看較濟所在，不幸有人拄著破病，姑不將著較早轉來。七月11號離開神戶，搭 Lia̍p-hō͘丸，15號早起到基隆，大家平安到厝。
這擺的旅行，雖然期間是短短，減看不止濟所在，iáu-kú逐人真大滿足，因為對上陸到離開神戶，無論開音樂會，到逐所在，受著濟濟位的先生朋友的盡力，好款待。這tia̍p愛借這个紙面，深深共 in感謝，也特別愛共本校的校友王守養君說謝。
今所囥的希望已經實現，所愛達的目的也成！！
旅行的日程簡略寫佇下面：－
今年為著傳教師修養會愛較早開的因端，學校有特別較早煞，6月26號就攏試驗明白。是阮的福氣！27日：淡水出發，頂晡佇雙連佮艋舺禮拜，佇兩位攏有吟幾若首的詩佇禮拜的時下晡有去訪問阮的音樂的先生吳牧師娘。暗時8點佇大稻埕拜堂，(青年會主催)有開讚美禮拜；聽眾不止濟。
28日：早起去基隆，下晝落船，5點出航。較濟是頭一擺的坐船，不止有趣
味；風湧真平。
29日：頭一擺看著天蓋海偉大的光景。
30日：下晡時看見一个小海嶼。
7月1日：透早到Bun-su，一同上陸。頭一擺食著內地特有的果子，真歡喜。12點出航。
2日：8點到神戶，朋友田島君來等接，一同上陸。行李寄車頭，大家行神戶第一鬧熱的街路。後來訪問朋友振國君，伊是神戶Siông-im 女學校的先生；伊有佮校長參詳，特別撥一點鐘，請阮佇遐開音樂會。學生先生有500外人。下晡3點半到京都，濟濟朋友來等接，彼暗分宿佇in 的宿舍。
3日：8點到9點佇同志社公會堂開讚美禮拜。Boa̍t-kong中學長，特別提供一點鐘，欲做兩校親密的機會。未演奏的代先，我有講幾句話共校長佮列位的先生說謝，後來講起幾若項論起同志社佮淡水中學有特別親密的關係的所在：－
1、 Darvis博士(同志社創設者的一个)佮Mackay博士siâng時閣搭 siâng船來東洋傳教。
2、 兩校是對siâng主義來設立--的。
3、 兩校雖罔所屬的教派無相同，iáu-kú近時佇加拿大這兩派的教會已經有聯合，所以通看做是siâng教派。
4、 淡中有幾若位，同志社的出身者teh做教員。
5、 淡中有濟濟學生去同志社讀。
6、 淡中校歌的調tú是佮同志社的創立者新島先生所出身A-mo͘- su-to Amherst大學校歌的調相同。
演奏了，Boa̍t-kong校長起來講答詞，差不多十外分久，猶原是論起兩校親密的關係，講起同志社中學部有50外人的台灣留學生teh讀，從中30外人是對淡水來--的，實在有袂得分開的關係佇teh；向望以後兩校間會得著加倍的親善，宛然 ná兄弟，saⁿ-kap牽手來盡in 的使命；是所希望--的。
下晡去赴淡中的留學生歡迎會，佇神學館的樓頂，1點鐘久saⁿ-kap懇談親睦。
下昏 7點半佇三田青年會館開公開的音樂會；聽眾約量 500。對頭到尾無聽見一句講話的聲，實在in 的對音樂的理解是比咱台灣數倍。濟濟擺受人encore (閣再奏一遍來聽cheh 的意思)，通講是大成功，其中Piano有得著加倍的歡迎。青年會的主事上野君是知己的朋友，伊有將會場無料借阮(若無一暗著愛35箍)。
4日：早起時佇Lo̍k-iông教會禮拜，有請阮吟兩首詩。
暗時8點佇京都第一媠的拜堂平安教會開音樂禮拜，不止濟人來赴。山口牧師說教不止合音樂禮拜，逐人受感激。禮拜了有佮in 的會員，讚美團懇談親睦。
5日：頂晡休養，下晡市中見物。
6日：頂晡去看囡仔的博覽會，也紲看四界。
7日：去奈良見學，看大佛，看三笠山，佮乖的鹿做朋友幾若點鐘久。－咱若提物予伊食伊會共咱行禮－景緻真好，內地有上算的 名所。逐人真滿足。
8日：去大阪見物，看大間的商行。後來去參觀朝日新聞社，社員真好禮，用冊送阮：也有叫阮去樓頂hip相，也案內阮看印新聞的順序。In-chhat機真大，運轉真緊，一點鐘久一台的機器會印得4 萬部 (印紲áu 便)：有2 台 teh 印，所以每點鐘會印得8萬部。閣再印象的器具，印紲kap規本，每點鐘會印得1800本。看這款，實在得著真大的利益，真歡喜。
暗時7點去放送局演奏，就是寄無線的音樂予日本全國的人聽，聽見講上海，台灣也聽會著。對台灣去遐放送的，是無幾人，攏是官吏，民間阮算是頭一擺，實在是阮的榮光。淡中的名永遠欲佇in 的放送史 的內面。了後用自動車載阮到青年會館。因為有一人拄著破病有歇佇遐。病人佇遐歇睏3日久，得著2 位的先生佮一位的阿婆真親切的照顧。
9日10日：2日久自由見學。
11日：早起離開京都到大阪佮破病--的，做陣10點外到神戶，隨時落船。三个同窗有送阮到船裡。12點出航。下晡觀賞內海的光景。
12日：透早到文書，上陸買果子。12點出航。風湧真平，15日8點半到基隆。10點半到台北。一同解散。
這个旅行頭尾有得著上主的照顧，病人漸漸好，一同平安到厝，深深共伊感謝。