Bêng-jîn ê kî-tóPermalink

文獻資訊Permalink

白話字（原文數位化）Permalink

Bêng jîn ê kî-tó

(I)

Samuel Johnson (1709－1784)

O Chú ah, Lí ê chhiú chiáng-koán siⁿ kap sí, tuì tī Lí ê khuì-la̍t goá thang tit-tio̍h khiā-chāi, iā tuì tī Lí ê un-tián thang tit-tio̍h sià-bián, kiû Lí ēng lîn-bín àⁿ-lo̍h lâi khoàⁿ goá. Lí só͘ bēng-lēng goá tio̍h choè ê gī-bū, kàu taⁿ goá ū pàng choè boē iàu-kín, khang-khang kè ji̍t, choân-jiân bô lô-le̍k lâi oân-sêng Lí ê chí-ì, kiû lí sià-bián goá chit-khoán pîn-toāⁿ ê choē. Kiû Lí hō͘ goá oē kì-tit ta̍k-ji̍t sī Lí só͘ siúⁿ-sù--ê, eng-kai tio̍h chiàu Lí ê bēng-lēng lâi ēng hit ji̍t. Só͘-í kiû Lí hō͘ goá chhim-chhim hoán-hoé pîn-toāⁿ ê choē, thang tuì Lí tit-tio̍h un-tián, iā thang keng-kè, Lí iáu jiâu goá ê sìⁿ-miā tī sè-kan ê tiong-kan, iā lâi khûn-bián lô-le̍k tī Lí ê sèng-chí, oâ(oá)-khò Iâ-so͘ Ki-tok. Sim-só͘-goān.

(II)

Anselm (1033－1109)

O goá ê Chú, goá ê Siōng-tè ah, kiû Lí siúⁿ-sù goá choân-sim só͘ ì-hiòng ài beh tit-tio̍h ê un-tián; ēng chit ê sim-koaⁿ lâi chhē Lí, chhē Lí lâi thiàⁿ Lí; tuì tī thiàⁿ Lí hō͘ goá oē tit-thang oàn-hūn lí kiù goá thoat-chhut hit ê choē-khian. Sim-só͘-goān.

(III)

Bishop Ridley (1500－1555)

Ah, Thiⁿ-nih ê sîn, tì-sek, chhong-bêng ê Pē, khuì-la̍t ê Siōng-tè ah! Tài-liām Lí to̍k-siⁿ ê kiáⁿ, goán ê Chú Iâ-so͘, lâi lîn-bín goá, chhe Lí ê Sîn ji̍p goá ê sim; tuì Lí ê tì-huī, m̄-nā kan-ta hō͘ goá chai tio̍h cháiⁿ-iūⁿ lâi thun-lún chit ê chhì-liān, iā hō͘ goá bêng-pe̍k tio̍h ēng sím-mi̍h oē, lâi khah iâⁿ--i. Goá uī-tio̍h Lí ê êng-kng chhut tī chiàn-tiûⁿ ê sî, kiû Lí ēng Lí ê chiàⁿ-chhiú hû-chhî-goá, hō͘ goá tit-tio̍h khuì-la̍t, tuì án-ni hō͘ goá ióng-kám lâi kò͘-pe̍h goá ê sìn-gióng, tuì thâu kàu bé oē tit-thang oân-sêng hit ê sìn-gióng. oá-khò Chú Iâ-so͘ ê miâ lâi kiû. Sim-só͘-goān.

漢羅（Ùi原文改寫）Permalink

名人的祈禱

（I）

Samuel Johnson (1709－1784)

O主ah，你的手掌管生佮死，對佇你的氣力我通得著徛在，也對佇你的恩典通得著赦免，求你用憐憫àⁿ落來看我。你所命令我著做的義務，到今我有放做袂要緊，空空過日，全然無勞碌來完成你的旨意，求你赦免我這款貧惰的罪。求你予我會記得逐日是你所賞賜--的，應該著照你的命令來用彼日。所以求你予7我深深反悔貧惰的罪，通對你得著恩典，也通經過，你猶饒我的性命佇世間的中間，也來勤勉勞碌佇你的聖旨，倚靠耶穌基督。心所願。

(II)

Anselm (1033－1109)

O我的主，我的上帝ah，求你賞賜我全心所意向愛欲得著的恩典；用這个心肝來揣你，揣你來疼你；對佇疼你予我會得通怨恨你救我脫出彼个罪khian。心所願。

(III)

Bishop Ridley (1500－1555)

Ah，天裡的神，智識，聰明的爸，氣力的上帝ah！帶念你獨生的囝，阮的主耶穌，來憐憫我，差你的神入我的心；對你的智慧，毋但 kan-ta予我知著怎樣來吞忍這个試煉，也予我明白著用啥物話，來較贏--伊。我為著你的榮光出佇戰場的時，求你用你的正手扶持我，予我得著氣力，對按呢予我勇敢來告白我的信仰，對頭到尾會得通完成彼个信仰。倚靠主耶穌的名來求。心所願。