喜出望外

Hí-chhut bōng-goā

文獻資訊

項目	資料
作者	郭水龍 Keh Chuí-lêng
卷期	芥菜子
卷期	第 6 號
日期	1926/7
頁數	12

白話字（原文數位化）

Hí-chhut bōng-goā

Sin-tiàm kàu-hoē ê chip-sū Lô Ku, 74 hè, ba̍k-chiu tì loē-chiòng ê pīⁿ chiām bô khoàⁿ-kìⁿ, 4 nî chêng hō͘ Lân I-seng khoàⁿ. I-seng kóng chi̍t-ba̍k boē hó-lah, chi̍t ba̍k oē chhòng-tit, chóng-sī bô kā i i kū-nî chiū chin bô khoàⁿ-kìⁿ, kiâⁿ-lō͘ tio̍h giâ koáiⁿ-á, chiū ji̍p Má-kai i-īⁿ chi̍t lé-pài-kú kan-ta kā i boah-io̍h; kiû i chhiú-su̍t, i-seng bô kā i chhiú-su̍t, i chiū tńg-lâi, tú-tio̍h chi̍t-ê muî-lâng-pô pò i chi̍t-ê chhiah-kha-sian kā i i, ēng pe̍h-á chham bé-chî to̍k chi̍t-ē, ba̍k-chiu soà chhiⁿ-mî, lóng bô khoàⁿ-kìⁿ, tio̍h lâng khan, kng, àm, lóng m̄-chai, i-ê sim chin toā hoân-ló bô khoàⁿ-kìⁿ chin kan-khó͘, mî-ji̍t tiàm tī bîn-chhn̂g boē choè sū-gia̍p, chóng-sī i m̄ sí-sim, put-sî kiû Siōng-tè tio̍h koh hō͘ i khoàⁿ-kìⁿ. Bô ti bô tang ê sî, ū chi̍t ê hoē-iú kā i kóng An-ki-peh goá hé-chhia-lāi thiaⁿ-kìⁿ ū lâng kóng Lô-tong ū chi̍t-ê i-seng, chhòng ba̍k-chiu chin gâu, lí mā khì hō͘ i chhòng khoàⁿ. Lô Ku thiaⁿ-liáu kè-mî chhiàⁿ chit lâng khan, chiū-khì Lô-tong hō͘ i chhòng. Hit-ê sian-siⁿ kā-i chhiú-su̍t, 20 goā ji̍t-kú 2 ba̍k lóng ū khoàⁿ-kìⁿ. Ka-kī tńg-lâi kiâⁿ-lō͘ chū-iû, hoaⁿ-hí kàu boē kò͘-tit, toā kám-siā Siōng-tè èng-ún i ê kî-tó, chhin-chhiūⁿ sí koh oa̍h.

漢羅（Ùi原文改寫）

喜出望外

新店教會的執事羅居，74 歲，目睭tì內障的病漸無看見，4年前予蘭醫生看。醫生講一目袂好lah，一這目會創得，總是無共伊醫舊年就真無看見，行路著giâ柺仔，就入馬偕醫院一禮拜久kan-ta 共伊抹藥；求伊手術8，醫生無共伊手術，伊就轉來，拄著一个媒人婆報伊一个赤跤先共伊醫，用白仔掺馬薯毒一下，目睭紲青盲，攏無看見，著人khan，光、暗，攏毋知，伊的心真大煩惱無看見真艱苦，暝日踮佇眠床袂做事業，總是伊毋死心，不時求上帝著閣予伊看見。無ti無tang 的時，有一个會友共伊講An-ki伯我火車內聽見有人講羅東有一个醫生，創目睭真gâu，你嘛去予伊創看。羅居聽了過暝chhiàⁿ這人khan，就去羅東予伊創。彼个先生共伊手術，20外日久2 目攏有看見。家己轉來行路自由，歡喜到袂顧得，大感謝上帝應允伊的祈禱，親像死閣活。